ਰਾਸ ਕਲਾ ਮੰਚ ਵੱਲੋਂ ਰਮਾਇਣ ਦਾ ਮੰਚਨ

ਅੰਤਰਰਾਸ਼ਟਰੀ ਗੀਤਾ ਮਹੋਤਸਵ ਦੇ ਮੁੱਖ ਪ੍ਰੋਗਰਾਮਾਂ ਦੀ ਲੜੀ ਤਹਿਤ ਦਰਸ਼ਕਾਂ ਸਾਹਮਣੇ ਰਮਾਇਣ ਦਾ ਨਾਟਕੀ ਰੂਪਾਂਤਰਣ ਪੇਸ਼ ਕੀਤਾ ਗਿਆ, ਜਿਸ ਨੂੰ ਦੇਖਣ ਲਈ ਵੱਡੀ ਗਿਣਤੀ ਵਿੱਚ ਦਰਸ਼ਕ ਪੁੱਜੇ। ਰਾਸ ਕਲਾ ਮੰਚ ਸਫੀਦੋਂ ਵੱਲੋਂ ਪੇਸ਼ ਕੀਤੇ ਗਏ ਇਸ ਪ੍ਰੋਗਰਾਮ ਦੀ ਸਾਰਿਆਂ ਨੇ ਭਰਪੂਰ ਸ਼ਲਾਘਾ ਕੀਤੀ। ਇਸ ਮੌਕੇ ਹਰਿਆਣਾ ਦੇ ਵਿਕਾਸ ਤੇ ਪੰਚਾਇਤ ਮੰਤਰੀ ਕ੍ਰਿਸ਼ਨ ਲਾਲ ਪੰਵਾਰ ਨੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ ਅਤੇ ਪ੍ਰੋਗਰਾਮ ਦਾ ਰਸਮੀ ਉਦਘਾਟਨ ਕੀਤਾ।

ਰੀ ਪੰਵਾਰ ਨੇ ਕਿਹਾ ਕਿ ਅਜਿਹੇ ਆਯੋਜਨ ਨਵੀਂ ਪੀੜ੍ਹੀ ਨੂੰ ਆਪਣੀ ਸੰਸਕ੍ਰਿਤੀ ਅਤੇ ਵਿਰਸੇ ਨਾਲ ਜੋੜਨ ਦਾ ਯੱਗ ਹਨ। ਉਨ੍ਹਾਂ ਕਿਹਾ ਕਿ ਭਗਵਾਨ ਰਾਮ ਦੇ ਜਨਮ ਤੋਂ ਲੈ ਕੇ ਉਨ੍ਹਾਂ ਦੇ ਰਾਜ ਤਿਲਕ ਤੱਕ ਦੇ ਸਫ਼ਰ ਨੂੰ ਮੰਚ ’ਤੇ ਪੇਸ਼ ਕਰਨਾ ਇੱਕ ਸ਼ਲਾਘਾਯੋਗ ਉਪਰਾਲਾ ਹੈ, ਜਿਸ ਨਾਲ ਨੌਜਵਾਨਾਂ ਨੂੰ ਆਪਣੀ ਸੰਸਕ੍ਰਿਤੀ ਬਾਰੇ ਅਹਿਮ ਗਿਆਨ ਮਿਲੇਗਾ। ਰਮਾਇਣ ਫੈਸਟੀਵਲ ਦੇ ਡਾਇਰੈਕਟਰ ਰਵੀ ਮੋਹਨ ਭਾਰਦਵਾਜ ਨੇ ਦੱਸਿਆ ਕਿ ਇਸ ਨਾਟਕੀ ਰੂਪਾਂਤਰਣ ਦੀ ਤਿਆਰੀ ਵਿੱਚ ਕਈ ਸਾਲ ਲੱਗੇ ਅਤੇ ਇਸ ਵਿੱਚ ਦੇਸ਼ ਭਰ ਦੇ ਵੱਖ-ਵੱਖ ਖੇਤਰਾਂ ਦੇ ਕਲਾਕਾਰਾਂ ਨੇ ਹਿੱਸਾ ਲਿਆ। ਉਨ੍ਹਾਂ ਨਾਟਕ ਰਾਹੀਂ ਇਹ ਪੱਖ ਉਭਾਰਿਆ ਕਿ ਰਾਣੀ ਕੈਕਈ ਨੇ ਕਦੇ ਵੀ ਭਗਵਾਨ ਰਾਮ ਲਈ ਬਨਵਾਸ ਜਾਂ ਆਪਣੇ ਪੁੱਤਰ ਭਰਤ ਲਈ ਰਾਜ ਨਹੀਂ ਸੀ ਮੰਗਿਆ। ਅਸਲ ਵਿੱਚ ਉਹ ਭਗਵਾਨ ਰਾਮ ਨੂੰ ਹੀ ਰਾਜਾ ਬਣਾਉਣਾ ਚਾਹੁੰਦੀ ਸੀ, ਪਰ ਭਗਵਾਨ ਰਾਮ ਨੇ ਖੁਦ ਮਾਂ ਕੈਕਈ ਨੂੰ ਕਿਹਾ ਸੀ ਕਿ ਉਹ ਰਾਜ ਕਰਨ ਲਈ ਨਹੀਂ, ਸਗੋਂ ਦੈਂਤਾਂ ਦਾ ਨਾਸ਼ ਕਰਨ ਅਤੇ ਦਸ਼ਰਥ ਕੋਲੋਂ ਚੋਰੀ ਹੋਏ ਤਾਜ ਨੂੰ ਬਾਲੀ ਤੋਂ ਵਾਪਸ ਲੈਣ ਲਈ ਜਨਮੇ ਹਨ।