ਨਰਮੇ ਦਾ ਢੁੱਕਵਾਂ ਭਾਅ ਨਾ ਮਿਲਣ ਤੋਂ ਦੁਖੀ ਕਿਸਾਨਾਂ ਨੇ ਬੋਲੀ ਰੁਕਵਾਈ

ਮੰਡੀ ’ਚ ਨਰਮੇ ਦਾ ਕਿਸਾਨਾਂ ਨੂੰ ਭਾਅ ਨਾ ਮਿਲਣ ਤੋਂ ਨਾਰਾਜ਼ ਕਿਸਾਨਾਂ ਨੇ ਅੱਜ ਬੋਲੀ ਰੁਕਵਾ ਕੇ ਨਰਮਾ ਵਪਾਰੀ ਤੇ ਸਰਕਾਰ ਖ਼ਿਲਾਫ਼ ਨਾਅਰੇਬਾਜ਼ੀ ਕੀਤੀ। ਕਿਸਾਨਾਂ ਨੇ ਦੱਸਿਆ ਕਿ ਭਾਵੇਂ ਸਰਕਾਰ ਵੱਲੋਂ ਨਰਮੇ ਦਾ ਭਾਅ ਤੈਅ ਕੀਤਾ ਹੋਇਆ ਹੈ ਪਰ ਵਪਾਰੀ ਕਿਸਾਨਾਂ ਤੋਂ ਔਣੇ-ਪੌਣੇ ਰੇਟ ’ਚ ਨਰਮਾ ਖਰੀਦ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਜਿਹੜੇ ਰੇਟ ਵਿੱਚ ਨਰਮੇ ਦੀ ਬੋਲੀ ਹੁੰਦੀ ਹੈ, ਫੈਕਟਰੀ ਵਿੱਚ ਪਹੁੰਚਣ ’ਤੇ ਉਸ ’ਤੇ ਵੀ ਵੱਟਾ ਲਾਇਆ ਜਾ ਰਿਹਾ ਹੈ।

ਭਾਰਤੀ ਕਿਸਾਨ ਏਕਤਾ ਦੇ ਸੂਬਾਈ ਪ੍ਰਧਾਨ ਲਖਵਿੰਦਰ ਸਿੰਘ ਔਲਖ ਨੇ ਦੱਸਿਆ ਕਿ ਵਪਾਰੀ ਨਰਮੇ ਦੀ ਕੁਆਲਟੀ ਮਾੜੀ ਦੱਸ ਕੇ ਕਿਸਾਨਾਂ ਨੂੰ ਲੁੱਟ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਐਤਕੀਂ ਮੀਂਹ ਵੱਧ ਪੈਣ ਕਾਰਨ ਕੁਆਲਟੀ ’ਤੇ ਅਸਰ ਤਾਂ ਪਿਆ ਹੈ ਪਰ ਹੁਣ ਰਹਿੰਦੀ ਕਸਰ ਵਪਾਰੀ ਕੱਢ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਸਰਕਾਰ ਵੱਲੋਂ ਤੈਅ ਕੀਤੇ ਗਏ ਰੇਟ ਮੁਤਾਬਕ ਹੀ ਨਰਮੇ ਦੀ ਖਰੀਦ ਕੀਤੀ ਜਾਣੀ ਚਾਹੀਦੀ ਹੈ। ਉਧਰ ਵਪਾਰੀਆਂ ਨੇ ਦੱਸਿਆ ਨਰਮੇ ਦੀ ਕੁਆਲਟੀ ਅਨੁਸਾਰ ਹੀ ਉਸ ਦੇ ਰੇਟ ਤੈਅ ਹੁੰਦੇ ਹਨ। ਉਨ੍ਹਾਂ ਦੱਸਿਆ ਕਿ ਮੀਂਹ ਕਾਰਨ ਨਰਮੇ ਦੀ ਕੁਆਲਟੀ ਬਹੁਤ ਹੀ ਹੇਠਲੇ ਪੱਧਰ ਦੀ ਹੈ, ਇਸ ਕਰਕੇ ਕੁਆਲਟੀ ਮੁਤਾਬਕ ਹੀ ਨਰਮੇ ਦਾ ਰੇਟ ਤੈਅ ਹੁੰਦਾ ਹੈ।