ਰੇਲਵੇ ਪੁਲ ਦੇ ਖਤਰੇ ਦੇ ਨਿਸ਼ਾਨ ਨੂੰ ਛੂਹਣ ਲੱਗਾ ਸਤਲੁਜ ਦਾ ਪਾਣੀ

ਗਿੱਦੜਪਿੰਡੀ ਰੇਲਵੇ ਪੁਲ ਦੇ ਨੇੜਿਓਂ ਹੀ ਸਾਲ 2008 ਵਿੱਚ ਧੁੱਸੀ ਬੰਨ੍ਹ ਵਿੱਚ ਪਾੜ ਪੈ ਗਿਆ ਸੀ ਤੇ ਸਾਲ 2019 ਵਿੱਚ ਪਿੰਡ ਜਿਆਣੀਆਂ ਚਾਹਲ ਵਿੱਚ ਵੀ ਬਹੁਤ ਵੱਡਾ ਪਾੜ ਪਿਆ ਸੀ। ਜਿਆਣੀਆਂ ਚਾਹਲ ਪਿੰਡ ਗਿੱਦੜਪਿੰਡੀ ਤੋਂ ਕਰੀਬ 5 ਕਿਲੋਮੀਟਰ ਹੀ ਦੂਰ ਹੈ ਜਦ ਕਿ ਸਾਲ 2023 ਵਿੱਚ ਸਤਲੁਜ ਦਾ ਬੰਨ੍ਹ ਗੱਟਾ ਮੁੰਡੀ ਕਾਸੂ ਨੇੜਿਓਂ ਟੁੱਟਾ ਸੀ। ਗਿੱਦੜਪਿੰਡੀ ਪੁਲ ਹੇਠੋਂ ਗਾਰ ਨਾ ਕੱਢੇ ਜਾਣ ਕਾਰਨ ਇਹ ਤਿੰਨੋਂ ਪਾੜ ਪਏ ਸਨ।

ਲੰਘੀ ਰਾਤ ਹਿਮਾਚਲ ਅਤੇ ਪੰਜਾਬ ਵਿੱਚ ਲਗਾਤਾਰ ਪੈ ਰਹੇ ਮੀਂਹ ’ਤੇ ਸਥਿਤੀ ਨੂੰ ਕਾਫ਼ੀ ਗੰਭੀਰ ਬਣਾ ਦਿੱਤਾ ਹੈ। ਉਧਰ ਦੋਆਬੇ ਦੀਆਂ ਦੋਵੇਂ ਵੇਈਂਆਂ ਚਿੱਟੀ ਵੇਈਂ ਤੇ ਕਾਲੀ ਵੇਈਂ ਦਾ ਪਾਣੀ ਵੀ ਕੰਢਿਆਂ ਤੋਂ ਬਾਹਰ ਕੇ ਵੱਗਣ ਲੱਗ ਪਿਆ ਹੈ।ਦੋਵੇਂ ਨਦੀਆਂ ਵਿੱਚ 20 ਕਿਊਸਿਕ ਤੋਂ ਵੱਧ ਪਾਣੀ ਵੱਗਣ ਕਾਰਨ ਉਨ੍ਹਾਂ ਇਲਾਕਿਆਂ ਵਿੱਚ ਹੜ੍ਹ ਵਰਗੀ ਸਥਿਤੀ ਬਣ ਗਈ ਹੈ ਜਿੱਥੋਂ ਇਹ ਦੋਵੇਂ ਨਦੀਆਂ ਵਗ ਰਹੀਆਂ ਹਨ। ਸਤਲੁਜ ਦਰਿਆ ਵਿੱਚ ਚਿੱਟੀ ਵੇਈਂ ਦਾ 20 ਹਜ਼ਾਰ ਕਿਊਸਿਕ ਤੋਂ ਵੱਧ ਪਾਣੀ ਪੈ ਰਿਹਾ ਹੈ ਜਿਹੜਾ ਕਿ ਗਿੱਦੜਪਿੰਡੀ ਰੇਲਵੇ ਪੁਲ ਦੇ ਐਨ ਨਜ਼ਦੀਕ ਹੈ।

ਰਾਜ ਸਭਾ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ ਨੇ ਧੁੱਸੀ ਬੰਨ੍ਹ ’ਤੇ ਇੱਕਠੇ ਹੋਏ ਲੋਕਾਂ ਨੂੰ ਚੌਕਸ ਰਹਿਣ ਦਾ ਸੱਦਾ ਦਿੱਤਾ ਹੈ। ਉਨ੍ਹਾਂ ਦੱਸਿਆ ਕਿ 1 ਸਤੰਬਰ ਨੂੰ ਰੋਪੜ ਬੈਰਾਜ ਤੋਂ ਸਤਲੁਜ ਦਰਿਆ ਵਿੱਚ 1 ਲੱਖ 14 ਹਾਜ਼ਾਰ ਕਿਊਸਿਕ ਪਾਣੀ ਛੱਡਿਆ ਗਿਆ ਸੀ। ਉਨ੍ਹਾਂ ਕਿਹਾ ਸਤਲੁਜ ਦਰਿਆ ਦੀ ਸਮਰੱਥਾ 2 ਲੱਖ ਕਿਊਸਿਕ ਦੀ ਹੈ। ਸੰਤ ਸੀਚੇਵਾਲ ਨੇ ਕਿਹਾ ਕਿ ਜੇ ਹਿਮਾਚਲ ਪ੍ਰਦੇਸ਼ ਵਿੱਚ ਮੀਂਹ ਹੋਰ ਪੈਂਦਾ ਹੈ ਤਾਂ ਫਿਰ ਭਾਖੜਾ ਡੈਮ ਤੋਂ ਵਾਧੂ ਛੱਡਿਆ ਜਾਂਦਾ ਹੈ ਤਾਂ ਸਥਿਤੀ ਵਿਗੜ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਗਿੱਦੜਪਿੰਡੀ ਪੁਲ ਹੇਠਾਂ 1 ਲੱਖ 58 ਹਾਜ਼ਰ ਕਿਊਸਿਕ ਦੇ ਕਰੀਬ ਪਾਣੀ ਵਗਣ ਨਾਲ ਇਲਾਕੇ ਦੇ ਲੋਕਾਂ ਦੀ ਨੀਂਦ ਉਡ ਗਈ ਹੈ।

ਡਰੇਨੇਜ ਵਿਭਾਗ ਦੇ ਐਕਸੀਅਨ ਸਿਰਤਾਜ ਸਿੰਘ ਨੇ ਦੱਸਿਆ ਕਿ ਸਤਲੁਜ ਦਰਿਆ ਦਾ ਪਾਣੀ ਅਜੇ ਧੁੱਸੀ ਬੰਨ੍ਹ ਤੋਂ ਨੀਵਾਂ ਵਗ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਧੁੱਸੀ ਬੰਨ੍ਹ ਦੀ ਮਜ਼ਬੂਤੀ ਅਤੇ ਨਜ਼ਰਸਾਨੀ ਕਰਨ ਵਿੱਚ ਵਿਭਾਗ ਦੇ ਐੱਸਡੀਓ ਤੇ ਜੇਈ ਹਮੇਸ਼ਾਂ ਉਥੇ ਹੁੰਦੇ ਹਨ।