ਮਾਧੋਪੁਰ ਹੈੱਡਵਰਕਸ ’ਤੇ ਸਥਿਤੀ ਕਾਬੂ ਹੇਠ: ਮੁੱਖ ਇੰਜਨੀਅਰ
ਵਾਟਰ ਰਿਸੋਰਸਜ਼ ਵਿਭਾਗ ਦੇ ਮੁੱਖ ਇੰਜਨੀਅਰ ਸ਼ੇਰ ਸਿੰਘ ਨੇ ਅੱਜ ਮਾਧੋਪੁਰ ਦਾ ਦੌਰਾ ਕੀਤਾ ਅਤੇ ਉਥੇ ਲੰਘੇ ਕੱਲ੍ਹ ਟੁੱਟ ਗਏ ਤਿੰਨ ਗੇਟਾਂ ਅਤੇ ਰੁੜ੍ਹ ਗਏ ਇੱਕ ਮੁਲਾਜ਼ਮ ਵਾਲੀ ਜਗ੍ਹਾ ਦਾ ਜਾਇਜ਼ਾ ਲਿਆ।
ਉਨ੍ਹਾਂ ਉਥੇ ਮੌਜੂਦ ਇੰਜੀਨੀਅਰਾਂ ਨਾਲ ਵੀ ਮੀਟਿੰਗ ਕੀਤੀ ਤੇ ਬਾਅਦ ਵਿੱਚ ਉਹ ਮਾਧੋਪੁਰ ਤੋਂ ਹੜ੍ਹ ਦੇ ਪਾਣੀ ਨਾਲ ਪ੍ਰਭਾਵਿਤ ਹੋਰ ਸਥਾਨਾਂ ਦਾ ਵੀ ਜਾਇਜ਼ਾ ਲੈਣ ਚਲੇ ਗਏ। ਇਸ ਪੱਤਰਕਾਰ ਨਾਲ ਸਵਾਲਾਂ ਦਾ ਜਵਾਬ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਲੰਘੇ ਦਿਨ ਜੋ ਤਿੰਨ ਗੇਟ ਟੁੱਟ ਕੇ ਰੁੜ੍ਹ ਗਏ ਹਨ, ਉਨ੍ਹਾਂ ਤੋਂ ਘਬਰਾਉਣ ਦੀ ਕੋਈ ਲੋੜ ਨਹੀਂ। ਹੈੱਡਵਰਕਸ ਦੇ ਕੁੱਲ 54 ਗੇਟ ਹਨ ਅਤੇ ਅੰਗਰੇਜ਼ਾਂ ਵੇਲੇ ਦੇ ਬਣੇ ਹੋਏ ਹਨ। ਇਹ ਤਾਂ ਇੱਕ ਤਰ੍ਹਾਂ ਨਾਲ ਖੰਡਰਾਤ ਹੀ ਹਨ ਕਿਉਂਕਿ ਹੁਣ ਸ਼ਾਹਪੁਰਕੰਢੀ ਡੈਮ ਦਾ ਹੈਡ ਰੈਗੂਲੇਟਰ ਬਣ ਚੁੱਕਾ ਹੈ ਅਤੇ ਉਥੇ ਵੀ ਰਣਜੀਤ ਸਾਗਰ ਡੈਮ ਦੀ ਝੀਲ ਦੇ ਇਲਾਵਾ ਇੱਕ ਨਵੀਂ ਝੀਲ ਹੋਂਦ ਵਿੱਚ ਆ ਚੁੱਕੀ ਹੈ। ਉਥੋਂ ਹੀ ਨਵੇਂ ਹੈਡ ਰੈਗੂਲੇਟਰ ਤੋਂ ਪਾਣੀ ਕੰਟਰੋਲ ਕੀਤਾ ਜਾਵੇਗਾ ਭਾਵ ਪੰਜਾਬ ਦੀਆਂ ਨਹਿਰਾਂ (ਯੂਬੀਡੀਸੀ ਹਾਈਡਲ ਤੇ ਐਮਬੀ ਲਿੰਕ ਨਹਿਰ) ਨੂੰ ਛੱਡਿਆ ਜਾਵੇਗਾ।
ਉਨ੍ਹਾਂ ਸਪੱਸ਼ਟ ਕਿਹਾ ਕਿ ਪੰਜਾਬ ਵਾਸੀਆਂ ਨੂੰ ਕਿਸੇ ਵੀ ਤਰ੍ਹਾਂ ਘਬਰਾਉਣ ਦੀ ਜ਼ਰੂਰਤ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਇਸ ਵੇਲੇ ਮਾਧੋਪੁਰ ਹੈੱਡਵਰਕਸ ਰਾਹੀਂ ਛੋਟੀਆਂ ਖੱਡਾਂ ਅਤੇ ਚਮੇਰਾ ਡੈਮ ਦੀ ਤਰਫੋਂ ਆ ਰਿਹਾ ਪਾਣੀ ਹੀ ਅੱਗੇ ਜਾ ਰਿਹਾ ਹੈ। ਅੱਜ ਰਣਜੀਤ ਸਾਗਰ ਡੈਮ ਦੀ ਝੀਲ ਅੰਦਰ ਪਾਣੀ ਦਾ ਪੱਧਰ 525.150 ਮੀਟਰ ਦਰਜ ਕੀਤਾ ਗਿਆ ਅਤੇ ਚਮੇਰਾ ਦੀ ਤਰਫੋਂ ਝੀਲ ਵਿੱਚ 61 ਹਜ਼ਾਰ 831 ਕਿਊਸਿਕ ਪਾਣੀ ਦਾਖਲ ਹੋ ਰਿਹਾ ਸੀ, ਜਦ ਕਿ ਡੈਮ ਤੋਂ 73 ਹਜ਼ਾਰ 936 ਕਿਊਸਿਕ ਪਾਣੀ ਮਾਧੋਪੁਰ ਦੀ ਤਰਫ ਛੱਡਿਆ ਜਾ ਰਿਹਾ ਸੀ।
ਮੌਕਾ ਦੇਖਣ ’ਤੇ ਪਤਾ ਲੱਗਿਆ ਕਿ ਰਾਵੀ ਦਰਿਆ ਦਾ ਪਾਣੀ ਜੰਮੂ ਕਸ਼ਮੀਰ ਦੇ ਲਖਨਪੁਰ ਵਾਲੇ ਪਾਸੇ ਬੰਦ ਹੋ ਚੁੱਕੇ ਪੁਲ ਨਾਲ ਲੱਗਦੀ ਸੜਕ ਨੂੰ ਹੋਰ ਖੋਰਾ ਲਗਾ ਰਿਹਾ ਹੈ, ਜਿਸ ਨਾਲ ਉਥੇ ਜੰਮੂ ਕਸ਼ਮੀਰ ਦੇ ਐਨੀਮਲ ਹਸਬੈਂਡਰੀ ਵਿਭਾਗ ਦੀ ਇਮਾਰਤ ਨੂੰ ਵੀ ਖਤਰਾ ਪੈਦਾ ਹੋ ਗਿਆ ਹੈ। ਉਥੇ ਸਿਰਫ ਹੁਣ ਦੋ ਪੁਲਾਂ ਵਿੱਚੋਂ ਸਿਰਫ ਇੱਕ ਪੁਲ ਨੂੰ ਹੀ ਵਰਤਿਆ ਜਾ ਰਿਹਾ ਹੈ, ਜਿਸ ਕਾਰਨ ਮਾਧੋਪੁਰ ਵਿਖੇ ਪੰਜਾਬ ਦੀ ਤਰਫੋਂ ਜੰਮੂ ਨੂੰ ਜਾਣ ਵਾਲੇ ਟਰੱਕਾਂ ਦੀ ਕਰੀਬ 2-3 ਕਿਲੋਮੀਟਰ ਲੰਬੀ ਲਾਈਨ ਲੱਗੀ ਹੋਈ ਸੀ ਕਿਉਂਕਿ ਪੁਲ ਤੋਂ ਹੌਲੀ-ਹੌਲੀ ਟਰੈਫਿਕ ਲੰਘਾਇਆ ਜਾ ਰਿਹਾ ਹੈ।
ਦੂਜੇ ਪਾਸੇ ਦੋ ਦਿਨ ਪਹਿਲਾਂ ਆਏ ਹੜ੍ਹ ਦੇ ਪਾਣੀ ਨੇ ਕਥਲੌਰ ਵਿੱਚ ਧੁੱਸੀ ਬੰਨ੍ਹ ਨੂੰ ਤੋੜ ਦਿੱਤਾ ਸੀ ਅਤੇ ਪਾਣੀ ਕੋਹਲੀਆਂ, ਪੋਲਾ ਆਦਿ ਪਿੰਡਾਂ ਵਿੱਚ ਜਾ ਵੜਿਆ ਸੀ। ਇੱਕ ਨੌਂ ਸਾਲਾ ਗੁੱਜਰ ਬੱਚੀ ਦੀ ਲਾਸ਼ ਅੱਜ ਹੜ੍ਹ ਦੇ ਪਾਣੀ ਵਿੱਚ ਤੈਰਦੀ ਮਿਲੀ, ਜਦ ਕਿ ਉਸ ਦੇ ਤਿੰਨ ਹੋਰ ਪਰਿਵਾਰਕ ਮੈਂਬਰ ਲਾਪਤਾ ਹਨ।
