ਮਨਜੀਤ ਬੋਪਾਰਾਏ ਦੀ ਪੁਸਤਕ ‘ਕਾਫ਼ਿਰ ਹੀ ਪਵਿੱਤਰ ਮਨੁੱਖ’ ਲੋਕ ਅਰਪਣ ਅਤੇ ਗੋਸ਼ਟੀ
ਬ੍ਰਿਸਬਨ: ਆਸਟਰੇਲੀਆ ਦੀ ਸਾਹਿਤਕ ਸੰਸਥਾ ਇੰਡੋ-ਪੰਜਾਬੀ ਸਾਹਿਤ ਅਕਾਦਮੀ ਆਫ ਆਸਟਰੇਲੀਆ ਵੱਲੋਂ ਤਰਕਸ਼ੀਲ ਲੇਖਕ ਮਨਜੀਤ ਬੋਪਾਰਾਏ ਦੀ ਨਵ ਪ੍ਰਕਾਸ਼ਿਤ ਪੁਸਤਕ ‘ਕਾਫ਼ਿਰ ਹੀ ਪਵਿੱਤਰ ਮਨੁੱਖ’ ਬਾਰੇ ਵਿਚਾਰ ਗੋਸ਼ਟੀ ਅਤੇ ਲੋਕ ਅਰਪਣ ਦਾ ਸਮਾਗਮ ਕਰਵਾਇਆ ਗਿਆ। ਸਮਾਗਮ ਦੀ ਸ਼ੁਰੂਆਤ ਮਾਈਗ੍ਰੇਸ਼ਨ ਮਾਹਿਰ ਅਮਨਪ੍ਰੀਤ ਸਿੰਘ ਭੰਗੂ ਵੱਲੋਂ ਇਪਸਾ ਦੀ ਤਰਫ਼ੋਂ ਸਵਾਗਤੀ ਸ਼ਬਦਾਂ ਨਾਲ ਅਤੇ ਮਨਜੀਤ ਬੋਪਾਰਾਏ ਦੇ ਨਾਲ ਜੁੜੇ ਤਜਰਬਿਆਂ ਬਾਰੇ ਚਾਨਣਾ ਪਾਉਂਦਿਆਂ ਹੋਈ।
ਅਮਨ ਭੰਗੂ ਨੇ ਇਸ ਕਿਤਾਬ ਨੂੰ ਆਸਤਿਕਤਾ ਅਤੇ ਨਾਸਤਿਕਤਾ ਵਿੱਚ ਇੱਕ ਉਸਾਰੂ ਸੰਵਾਦ ਆਖਿਆ। ਮਨਜੀਤ ਬੋਪਾਰਾਏ ਨੇ ਆਪਣੀ ਕਿਤਾਬ ਦੇ ਸਫ਼ਰ, ਤਰਕਸ਼ੀਲ ਬਣਨ ਦੀ ਪ੍ਰੇਰਨਾ, ਜੀਵਨ ਵਿੱਚ ਆਏ ਵਿਰੋਧੀ ਹਾਲਾਤ ਅਤੇ ਕਿਤਾਬ ਵਿਚਲੇ ਮੈਟਰ ਨੂੰ ਪ੍ਰਭਾਸ਼ਿਤ ਕਰਦਿਆਂ ਕਿਹਾ ਕਿ ਇਹ ਉਸ ਦੀ ਸਮੁੱਚੀ ਜ਼ਿੰਦਗੀ ਦੇ ਅਨੁਭਵ ਅਤੇ ਅਧਿਐਨ ਦਾ ਨਿਚੋੜ ਹੈ। ਪੰਜਾਬ ਤੋਂ ਲੇਖਕ ਅਤੇ ਅਨੁਵਾਦਕ ਹਰਚਰਨ ਸਿੰਘ ਚਾਹਲ ਨੇ ਇਸ ਨੂੰ ਤਰਕਸ਼ੀਲ ਦਸਤਾਵੇਜ਼ਾਂ ਵਿੱਚ ਇੱਕ ਅਹਿਮ ਕਿਤਾਬ ਦੱਸਿਆ। ਉਸ ਨੇ ਰੱਬ ਦੀ ਧਾਰਨਾ, ਪਵਿੱਤਰ ਮਨੁੱਖ ਦੀ ਪੁਨਰ ਕਸੌਟੀ ਬਾਰੇ ਬਹੁਤ ਭਾਵਪੂਰਤ ਗੱਲਬਾਤ ਕੀਤੀ। ਤਰਕਸ਼ੀਲ ਲੇਖਕ ਜਸਵੰਤ ਸਿੰਘ ਜੀਰਖ ਨੇ ਇਸ ਕਿਤਾਬ ਦੀਆਂ ਪੜ੍ਹਤਾਂ ਅਤੇ ਸੁਧਾਈ ਵਿੱਚ ਸ਼ਾਮਲ ਹੋਣ ਦੀ ਗੱਲ ਕਰਦਿਆਂ ਤਾਈਦ ਕੀਤਾ ਕਿ ਇਹ ਕਿਤਾਬ ਖੋਜ ਅਤੇ ਅਧਿਐਨ ਦੇ ਅਗਲੇ ਦਰਵਾਜ਼ੇ ਖੋਲ੍ਹਦੀ ਹੈ।
ਸਮਾਗਮ ਦੇ ਅੰਤ ਵਿੱਚ ਇਨਕਲਾਬੀ ਕਵੀ ਅਤੇ ਵਿਚਾਰਕ ਸਰਬਜੀਤ ਸੋਹੀ ਨੇ ਮਨਜੀਤ ਬੋਪਾਰਾਏ ਦੇ ਨਾਲ ਆਪਣੇ 17 ਸਾਲਾਂ ਦੇ ਸਬੰਧ ਅਤੇ ਤਰਕਸ਼ੀਲ ਸਮਾਜ ਸਿਰਜਣ ਲਈ ਕੀਤੇ ਉਪਰਾਲਿਆਂ ਦਾ ਜ਼ਿਕਰ ਕੀਤਾ। ਸਰਬਜੀਤ ਸੋਹੀ ਨੇ ਕਿਤਾਬ ਦੇ ਸਿਰਲੇਖ ਅਤੇ ਇੱਕ ਤਰਕਸ਼ੀਲ ਵਿਅਕਤੀ ਦੀ ਸਮਾਜਿਕ ਜ਼ਿੰਮੇਵਾਰੀ ਬਾਰੇ ਵਿਚਾਰ ਦਿੱਤੇ। ਸਰਬਜੀਤ ਸੋਹੀ ਨੇ ਮਨਜੀਤ ਬੋਪਾਰਾਏ ਦੀ ਜੀਵਨ ਘਾਲਣਾ ਬਾਰੇ ਕਈ ਪਹਿਲੂਆਂ ਬਾਰੇ ਚਾਨਣਾ ਪਾਇਆ। ਇਸ ਮੌਕੇ ਡਾ. ਪਰਮਜੀਤ ਸਿੰਘ, ਰਘਬੀਰ ਸਿੰਘ ਸਰਾਏ, ਬਿਕਰਮਜੀਤ ਸਿੰਘ ਚੰਦੀ, ਪਾਲ ਸਿੰਘ ਰਾਊਕੇ, ਪ੍ਰਦੀਪ ਸ਼ਿੰਜਰ, ਗੁਰਵਿੰਦਰ ਸਿੰਘ ਖੱਟੜਾ, ਬਲਵਿੰਦਰ ਸਿੰਘ ਮੋਰੋਂ, ਜਤਿੰਦਰ ਸਿੰਘ ਢਿੱਲੋਂ, ਭੁਪਿੰਦਰ ਸਿੰਘ ਭੱਪੀ, ਉਂਕਾਰ ਸਿੰਘ, ਦੀਪਇੰਦਰ ਸਿੰਘ, ਦਲਬੀਰ ਸਿੰਘ ਬੋਪਾਰਾਏ, ਨਵੀ ਥਿੰਦ, ਹਰਜਿੰਦ ਕੌਰ ਮਾਂਗਟ, ਸਤਵਿੰਦਰ ਟੀਨੂੰ, ਤਜਿੰਦਰ ਭੰਗੂ, ਦਲਵੀਰ ਹਲਵਾਰਵੀ, ਪ੍ਰਣਾਮ ਹੇਅਰ, ਰਾਜੂ ਜੀਰਖ, ਸੁਰਜੀਤ ਸੰਧੂ, ਹਰਜੀਤ ਸੰਧੂ, ਗੁਲਜ਼ਾਰ ਸਿੰਘ, ਮੁਖਤਿਆਰ ਢਿੱਲੋਂ, ਰਮਨ ਸੇਖੋਂ, ਰੋਮਨ ਬਾਜਵਾ, ਆਤਮਾ ਸਿੰਘ ਹੇਅਰ, ਰਾਜਦੀਪ ਲਾਲੀ ਆਦਿ ਹਾਜ਼ਰ ਸਨ। ਸਟੇਜ ਸੈਕਟਰੀ ਦੀ ਭੂਮਿਕਾ ਰੁਪਿੰਦਰ ਸੋਜ਼ ਵੱਲੋਂ ਬਾਖੂਬੀ ਨਿਭਾਈ ਗਈ।
