ਦਿੱਲੀ ’ਚ ਭਾਰੀ ਮੀਂਹ ਮਗਰੋਂ ਗਰਮੀ ਤੋਂ ਰਾਹਤ, ਆਵਾਜਾਈ ਬਣੀ ਆਫ਼ਤ

ਮੰਗਲਵਾਰ ਨੂੰ ਦਿੱਲੀ ਵਿੱਚ ਪਏ ਭਾਰੀ ਮੀਂਹ ਨੇ ਲੋਕਾਂ ਨੂੰ ਰਾਹਤ ਦਿੱਤੀ ਹੈ, ਪਰ ਤਿਉਹਾਰੀ ਸੀਜ਼ਨ ਦੇ ਚਲਦਿਆਂ ਭੀੜ ਨੇ ਦੋਹਰੀ ਮੁਸੀਬਤ ਖੜ੍ਹੀ ਕਰ ਦਿੱਤੀ ਹੈ। ਆਪਣੀਆਂ ਮੰਜ਼ਿਲਾਂ ਵੱਲ ਜਾ ਰਹੇ ਦਿੱਲੀ ਵਾਸੀਆਂ ਨੂੰ ਟਰੈਫਿਕ ਜਾਮ ਨਾਲ ਜੂਝਣਾ ਪਿਆ।

ਜਾਮੀਆ ਮਿਲੀਆ ਇਸਲਾਮੀਆ ਨੇੜੇ ਤਿਕੋਣਾ ਪਾਰਕ ਨੇੜੇ ਟਰੈਫਿਕ ਜਾਮ ਅਤੇ ਦਿੱਲੀ ਤੋਂ ਗੁਰੂਗ੍ਰਾਮ ਜਾਂਦੇ ਸਮੇਂ NH-48 'ਤੇ ਰੈਡੀਸਨ ਹੋਟਲ ਨੇੜੇ ਫਲਾਈਓਵਰ ’ਤੇ 25 ਮਿੰਟ ਤੱਕ ਵਾਹਨਾਂ ਦੇ ਫਸੇ ਹੋਣ ਕਾਰਨ ਲੋਕਾਂ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ।

ਉੱਤਰ-ਪੱਛਮੀ ਦਿੱਲੀ ਵਿੱਚ ਭਾਰੀ ਟਰੈਫਿਕ ਜਾਮ ਸੀ, ਜਦੋਂ ਕਿ ਪੀਤਮਪੁਰਾ ਵਿੱਚ ਨੇਤਾਜੀ ਸੁਭਾਸ਼ ਪਲੇਸ ਦੇ ਆਲੇ-ਦੁਆਲੇ ਦੇ ਖੇਤਰਾਂ ਦੇ ਨਾਲ-ਨਾਲ ਆਊਟਰ ਰਿੰਗ ਰੋਡ ਦੇ ਇੱਕ ਵੱਡੇ ਹਿੱਸੇ ਵਿੱਚ ਵਾਹਨਾਂ ਦੀ ਰਫ਼ਤਾਰ ਹੌਲੀ ਦੇਖੀ ਗਈ। ਹਾਲਾਂਕਿ, ਇਸ ਤੇਜ਼ ਮੀਂਹ ਨੇ ਗਰਮੀ ਅਤੇ ਹੁੰਮਸ ਭਰੇ ਮੌਸਮ ਤੋਂ ਬਾਅਦ ਕੁਝ ਰਾਹਤ ਦਿੱਤੀ।

ਦੱਖਣੀ ਦਿੱਲੀ ਦੇ ਹਿੱਸਿਆਂ ਮਹਾਤਮਾ ਗਾਂਧੀ ਰੋਡ, NH-48, ਅਤੇ ਲਾਜਪਤ ਨਗਰ ਤੋਂ ਕੈਪਟਨ ਗੌੜ ਮਾਰਗ ਸ਼ਾਮਲ ਹਨ, ਵਿੱਚ ਵੀ ਭਾਰੀ ਭੀੜ ਦੇਖੀ ਗਈ।

ਇੱਕ ਉਪਭੋਗਤਾ ਨੇ ਸੋਸ਼ਲ ਮੀਡੀਆ 'ਤੇ ਲਿਖਿਆ, "ਮਥੁਰਾ ਰੋਡ, ਓਲਡ ਰੋਹਤਕ ਰੋਡ, ਆਈਟੀਓ ਦੇ ਕੁਝ ਹਿੱਸਿਆਂ, ਅਤੇ ਮਹਾਤਮਾ ਗਾਂਧੀ ਰੋਡ ਤੋਂ ਜੀਟੀ ਕਰਨਾਲ ਰੋਡ ਤੱਕ ਟ੍ਰੈਫਿਕ ਬੰਪਰ-ਟੂ-ਬੰਪਰ ਸੀ।"

ਭਾਰਤ ਮੌਸਮ ਵਿਗਿਆਨ ਵਿਭਾਗ (IMD) ਨੇ ਦੱਸਿਆ ਕਿ ਮੰਗਲਵਾਰ ਨੂੰ ਵੱਧ ਤੋਂ ਵੱਧ ਤਾਪਮਾਨ 35 ਡਿਗਰੀ ਸੈਲਸੀਅਸ ਦੇ ਆਸ-ਪਾਸ ਰਹਿਣ ਦੀ ਉਮੀਦ ਹੈ, ਜਦੋਂ ਕਿ ਘੱਟੋ-ਘੱਟ ਤਾਪਮਾਨ 28.7 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ, ਜੋ ਆਮ ਨਾਲੋਂ 5.4 ਡਿਗਰੀ ਵੱਧ ਹੈ। ਸਵੇਰੇ 8:30 ਵਜੇ ਹਵਾ ਵਿੱਚ ਨਮੀ 74 ਫੀਸਦੀ ਦਰਜ ਕੀਤੀ ਗਈ।

IMD ਅਨੁਸਾਰ ਸ਼ਹਿਰ ਵਿੱਚ ਦਿਨ ਭਰ ਆਮ ਤੌਰ ’ਤੇ ਬੱਦਲਵਾਈ ਅਤੇ ਹਲਕੀ ਬਾਰਿਸ਼ ਜਾਂ ਬੂੰਦਾ-ਬਾਂਦੀ ਹੋਣ ਦੀ ਸੰਭਾਵਨਾ ਹੈ।

ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ (CPCB) ਦੇ ਅਨੁਸਾਰ ਸਵੇਰੇ 8 ਵਜੇ ਦਿੱਲੀ ਦਾ ਹਵਾ ਗੁਣਵੱਤਾ ਸੂਚਕਾਂਕ (AQI) 114 ਦਰਜ ਕੀਤਾ ਗਿਆ, ਜੋ ਕਿ 'ਮੱਧਮ' ਸ਼੍ਰੇਣੀ ਵਿੱਚ ਹੈ। ਟ੍ਰੈਫਿਕ ਪੁਲਿਸ ਨੇ ਯਾਤਰੀਆਂ ਨੂੰ ਉਸ ਅਨੁਸਾਰ ਆਪਣੀਆਂ ਯਾਤਰਾਵਾਂ ਦੀ ਯੋਜਨਾ ਬਣਾਉਣ ਅਤੇ ਪਾਣੀ ਭਰੇ ਹਿੱਸਿਆਂ ਤੋਂ ਬਚਣ ਦੀ ਸਲਾਹ।

ਦਿੱਲੀ ਵਿਚ ਮੰਗਲਵਾਰ ਦੁਪਹਿਰੇ ਖਰਾਬ ਮੌਸਮ ਕਰਕੇ ਘੱਟੋ ਘੱਟ ਪੰਜ ਉਡਾਣਾਂ ਨੂੰ ਡਾਈਵਰਟ ਕਰਨਾ ਪਿਆ। ਅਧਿਕਾਰੀਆਂ ਨੇ ਕਿਹਾ ਕਿ 12.15 ਤੋਂ 12.30 ਤੱਕ ਉਡਾਣਾ ਨੂੰ ਜੈਪੂਰ ਭੇਜ ਦਿੱਤਾ ਗਿਆ। -ਪੀਟੀਆਈ