Constitution Club ਚੋਣਾਂ ’ਚ ਰਾਜੀਵ ਪ੍ਰਤਾਪ ਰੂਡੀ ਦਾ ਦਬਦਬਾ ਕਾਇਮ

Constitution Club Elections ਭਾਜਪਾ ਸੰਸਦ ਮੈਂਬਰ ਰਾਜੀਵ ਪ੍ਰਤਾਪ ਰੂਡੀ ਨੇ Constitution Club of India ਵਿਚ ਆਪਣੀ 25 ਸਾਲ ਪੁਰਾਣੀ ਪਕੜ ਨੂੰ ਬਰਕਰਾਰ ਰੱਖਦੇ ਹੋਏ ਸਕੱਤਰ (ਪ੍ਰਸ਼ਾਸਨ) ਦੇ ਅਹੁਦੇ ਲਈ ਹੋਈ ਚੋਣ ਵਿਚ ਭਾਜਪਾ ਆਗੂ ਸੰਜੀਵ ਬਾਲਿਆਨ ਨੂੰ ਹਰਾਇਆ ਹੈ। ਇਹ ਮੁਕਾਬਲਾ ਕਲੱਬ ਦੇ ਇਤਿਹਾਸ ਵਿਚ ਸਭ ਤੋਂ ਫਸਵੇਂ ਮੁਕਾਬਲਿਆਂ ਵਿਚੋਂ ਇਕ ਮੰਨਿਆ ਜਾ ਰਿਹਾ ਹੈ ਜਿਸ ਵਿਚ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ, ਭਾਜਪਾ ਪ੍ਰਧਾਨ ਜੇਪੀ ਨੱਢਾ, ਕਾਂਗਰਸ ਆਗੂ ਸੋਨੀਆ ਗਾਂਧੀ ਤੇ ਮਲਿਕਾਰਜੁਨ ਖੜਗੇ ਸਣੇ ਕਈ ਦਿੱਗਜ ਆਗੂਆਂ ਨੇ ਵੋਟ ਪਾਈ।

ਰੂਡੀ ਨੇ ਅੱਧੀ ਰਾਤ ਮਗਰੋਂ ਪੱਤਰਕਾਰਾਂ ਨੂੰ ਕਿਹਾ ਕਿ ਉਨ੍ਹਾਂ ਨੇ 100 ਤੋਂ ਵੱਧ ਵੋਟਾਂ ਨਾਲ ਜਿੱਤ ਦਰਜ ਕੀਤੀ ਹੈ ਤੇ ਉਨ੍ਹਾਂ ਦੀ ਟੀਮ ਦੇ ਹੋਰ ਮੈਂਬਰ ਵੀ ਜੇਤੂ ਰਹੇ ਹਨ। ਉਨ੍ਹਾਂ ਨੇ ਇਸ ਨੂੰ ‘ਸਾਰੇ ਸੰਸਦ ਮੈਂਬਰਾਂ ਤੇ ਸਮਰਥਕਾਂ ਲਹੀ ਖ਼ੂਬਸੂਰਤ ਜਿੱਤ’ ਕਰਾਰ ਦਿੱਤਾ।

ਕਲੱਬ ਚੋਣਾਂ ਜਿੱਤਣ ’ਤੇ ਭਾਜਪਾ ਦੇ ਸੰਸਦ ਮੈਂਬਰ ਰਾਜੀਵ ਪ੍ਰਤਾਪ ਰੂਡੀ ਨੇ ਕਿਹਾ, ‘‘...ਮੈਂ 100 ਤੋਂ ਵੱਧ ਵੋਟਾਂ ਨਾਲ ਜਿੱਤਿਆ ਹਾਂ ਅਤੇ ਜੇਕਰ ਇਸ ਨੂੰ 1000 ਵੋਟਾਂ ਨਾਲ ਗੁਣਾ ਕੀਤਾ ਜਾਵੇ, ਤਾਂ ਇਹ ਗਿਣਤੀ 1 ਲੱਖ ਹੋ ਜਾਂਦੀ ਹੈ। ਇਹ ਮੇਰੇ ਪੈਨਲ ਦੀ ਜਿੱਤ ਹੈ ਅਤੇ ਮੈਂ ਆਪਣਾ ਧੰਨਵਾਦ ਪ੍ਰਗਟ ਕਰਨਾ ਚਾਹੁੰਦਾ ਹਾਂ। ਸਾਰੀਆਂ ਪਾਰਟੀਆਂ ਦੇ ਨੇਤਾਵਾਂ ਨੇ ਇਸ ਵਿੱਚ ਹਿੱਸਾ ਲਿਆ... ਮੇਰੇ ਪੈਨਲ ਵਿੱਚ ਭਾਜਪਾ, ਕਾਂਗਰਸ, ਸਪਾ, ਟੀਐਮਸੀ, ਟੀਡੀਪੀ ਅਤੇ ਆਜ਼ਾਦ ਉਮੀਦਵਾਰਾਂ ਦੇ ਮੈਂਬਰ ਸਨ। ਇਹ ਸਫਲਤਾ ਸਾਰਿਆਂ ਦੀ ਸਖ਼ਤ ਮਿਹਨਤ ਕਾਰਨ ਪ੍ਰਾਪਤ ਹੋਈ ਹੈ, ਇਸ ਲਈ ਮੈਂ ਉਨ੍ਹਾਂ ਸਾਰਿਆਂ ਦਾ ਧੰਨਵਾਦ ਕਰਨਾ ਚਾਹੁੰਦਾ ਹਾਂ... ਮੈਨੂੰ ਲੱਗਦਾ ਹੈ ਕਿ ਮੇਰੇ ਸੰਸਦ ਮੈਂਬਰ ਦੋਸਤਾਂ ਅਤੇ ਮੇਰੀ ਟੀਮ ਅਤੇ ਮੈਨੂੰ ਪਿਛਲੇ ਦੋ ਦਹਾਕਿਆਂ ਦੀ ਸਖ਼ਤ ਮਿਹਨਤ ਦਾ ਫਲ ਮਿਲਿਆ ਹੈ।’’

ਕਰੀਬ 1,295 ਮੌਜੂਦਾ ਅਤੇ ਸਾਬਕਾ ਸੰਸਦ ਮੈਂਬਰਾਂ ਦੀ ਵੋਟਰ ਸੂਚੀ ਵਿੱਚੋਂ, 680 ਤੋਂ ਵੱਧ ਵੈਧ ਵੋਟਾਂ ਪਈਆਂ, ਜੋ ਕਿ ਹੁਣ ਤੱਕ ਦੀ ਸਭ ਤੋਂ ਵੱਧ ਵੋਟਿੰਗ ਫੀਸਦ ਵਿੱਚੋਂ ਇੱਕ ਹੈ। ਇਸ ਤੋਂ ਪਹਿਲਾਂ ਰੂਡੀ ਕਈ ਵਾਰ ਬਿਨਾਂ ਵਿਰੋਧ ਚੁਣੇ ਗਏ ਸਨ, ਪਰ ਇਸ ਵਾਰ ਦੋ ਵਾਰ ਦੇ ਸਾਬਕਾ ਸੰਸਦ ਮੈਂਬਰ ਸੰਜੀਵ ਬਾਲਿਆਨ ਨੇ ਉਨ੍ਹਾਂ ਨੂੰ ਚੁਣੌਤੀ ਦਿੱਤੀ ਸੀ।

ਚੋਣ ਵਿੱਚ 11 ਕਾਰਜਕਾਰੀ ਮੈਂਬਰ ਅਹੁਦਿਆਂ ਲਈ 14 ਉਮੀਦਵਾਰ ਵੀ ਮੈਦਾਨ ਵਿੱਚ ਸਨ। ਰੂਡੀ ਨੇ ਆਪਣੇ ਕਾਰਜਕਾਲ ਦੌਰਾਨ ਆਧੁਨਿਕ ਸਹੂਲਤਾਂ ਜੋੜਨ ਅਤੇ ਕਲੱਬ ਦੀ ਪੁਨਰ ਸੁਰਜੀਤੀ ਦਾ ਹਵਾਲਾ ਦਿੰਦੇ ਹੋਏ ਸਮਰਥਨ ਮੰਗਿਆ, ਜਦੋਂ ਕਿ ਬਾਲਿਆਨ ਨੇ ਬਦਲਾਅ ਦਾ ਨਾਅਰਾ ਦਿੱਤਾ ਅਤੇ ਕਲੱਬ ਨੂੰ ਸਿਰਫ਼ ਸੰਸਦ ਮੈਂਬਰਾਂ ਅਤੇ ਸਾਬਕਾ ਸੰਸਦ ਮੈਂਬਰਾਂ ਲਈ ਕੇਂਦਰਿਤ ਕਰਨ ਦੀ ਗੱਲ ਕੀਤੀ। ਸੰਵਿਧਾਨ ਕਲੱਬ ਦਾ ਸਾਬਕਾ ਪ੍ਰਧਾਨ ਲੋਕ ਸਭਾ ਸਪੀਕਰ ਹੁੰਦਾ ਹੈ, ਪਰ ਸਕੱਤਰ ਦਾ ਅਹੁਦਾ ਕਾਰਜਕਾਰੀ ਕੰਮਕਾਜ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦਾ ਹੈ।