ਹੁਣ ਵੋਟਰ ਸੂਚੀ ਵਿੱਚੋਂ ਨਾਮ ਹਟਾਉਣਾ ਆਸਾਨ ਨਹੀਂ; ਚੋਣ ਕਮਿਸ਼ਨ ਨੇ ਈ -ਵੈਰੀਫਿਕੇਸ਼ਨ ਸਿਸਟਮ ਕੀਤਾ ਲਾਗੂ

ਚੋਣ ਕਮਿਸ਼ਨ ਨੇ ਵੋਟਰ ਸੂਚੀ ਵਿੱਚੋਂ ਨਾਂ ਹਟਾਉਣ ਦੀ ਪ੍ਰਕਿਰਿਆ ਦੇ ਦੁਰਪਯੋਗ ਰੋਕਣ ਲਈ ਇੱਕ ਨਵਾਂ ਈ-ਵੈਰੀਫਿਕੇਸ਼ਨ ਸਿਸਟਮ ਲਾਗੂ ਕੀਤਾ ਹੈ।

ਹੁਣ ਜੇ ਕੋਈ ਵਿਅਕਤੀ ਕਿਸੇ ਦਾ ਨਾਂ ਹਟਵਾਉਣ ਜਾਂ ਸ਼ਾਮਲ ਹੋਣ ’ਤੇ ਇਤਰਾਜ਼ ਕਰਦਾ ਹੈ ਤਾਂ ਉਸ ਦੇ ਰਜਿਸਟਰਡ ਮੋਬਾਈਲ ’ਤੇ OTP ਆਵੇਗਾ, ਜੋ ਦੱਸੇਗਾ ਕਿ ਅਸਲ ਵਿਅਕਤੀ ਹੀ ਅਰਜ਼ੀ ਦੇ ਰਿਹਾ ਹੈ। ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਪਹਿਲਾਂ ਕੁਝ ਲੋਕ ਕਿਸੇ ਹੋਰ ਦੇ ਨਾਂ ਜਾਂ ਨੰਬਰ ਦੀ ਵਰਤੋਂ ਕਰ ਕੇ ਨਾਂ ਹਟਵਾਉਣ ਦੀ ਕੋਸ਼ਿਸ਼ ਕਰਦੇ ਸਨ ਪਰ ਹੁਣ ਇਹ ਸਿਸਟਮ ਇਸ ਤਰ੍ਹਾਂ ਦੀ ਧੋਖਾਧੜੀ ਨੂੰ ਰੋਕੇਗਾ। ਇਹ ਸਿਸਟਮ ਇੱਕ ਹਫ਼ਤਾ ਪਹਿਲਾਂ ਲਾਗੂ ਹੋਇਆ ਹੈ।

ਚੋਣ ਕਮਿਸ਼ਨ ਨੇ ਕਿਹਾ ਕਿ ਇਹ ਕਿਸੇ ਖਾਸ ਘਟਨਾ ਦਾ ਜਵਾਬ ਨਹੀਂ ਪਰ ਇਕ ਨਵਾਂ ਸੁਰੱਖਿਆ ਕਦਮ ਹੈ।

ਦੱਸ ਦਈਏ ਕਿ ਕਰਨਾਟਕ ਦੇ ਅਲੰਦ ਹਲਕੇ ਵਿੱਚ ਨਾਅ ਹਟਵਾਉਣ ਲਈ 6,018 ਫਾਰਮ, ਜਿਨ੍ਹਾਂ ਵਿੱਚ ਸੱਤ ਆਨਲਾਈਨ ਭਰੇ ਗਏ ਸਨ ਪਰ ਜਾਂਚ ਦੌਰਾਨ ਸਿਰਫ਼ 24 ਅਸਲੀ ਨਿਕਲੇ। 5,994 ਫਰਜ਼ੀ ਨਿਕਲੇ, ਜੋ ਰੱਦ ਕਰ ਦਿੱਤੇ ਗਏ।

ਕਾਂਗਰਸ ਆਗੁੂ ਰਾਹੁਲ ਗਾਂਧੀ ਨੇ ਕਿਹਾ ਕਿ ਚੋਣ ਕਮਿਸ਼ਨ ਨੇ ਇਹ LOCK SYSTEM ਉਦੋਂ ਲਾਗੂ ਕੀਤਾ, ਜਦੋਂ ਉਨ੍ਹਾਂ ਨੇ ‘ਵੋਟ ਚੋਰੀ’ ਦੀ ਗੱਲ ਚੁਕੀ।

ਉਨ੍ਹਾਂ ਨੇ ਮੁੱਖ ਚੋਣ ਕਮਿਸ਼ਨਰ ਗਿਆਨੇਸ਼ ਕੁਮਾਰ ਨੂੰ ਸਵਾਲ ਕੀਤਾ ਕਿ ਉਹ ਅਲੰਦ ’ਚ ਹੋਈ ਚੋਰੀ ਦੀ ਜਾਂਚ ਸਬੰਧੀ ਸਬੂਤ ਕਦੋਂ ਦੇਣਗੇ?