ਜੀਐੱਸਟੀ ਸੋਧ ਬਿੱਲ: ਛੋਟੇ ਵਪਾਰੀਆਂ ’ਤੇ ਪਵੇਗਾ ਮਾੜਾ ਅਸਰ: ਆਤਿਸ਼ੀ
ਦਿੱਲੀ ਵਿਧਾਨ ਸਭਾ ਵਿੱਚ ਜੀਐੱਸਟੀ ਸੋਧ ਬਿੱਲ ਪੇਸ਼ ਕੀਤਾ ਗਿਆ। ਸਾਬਕਾ ਮੁੱਖ ਮੰਤਰੀ ਆਤਿਸ਼ੀ ਨੇ ਇਸ ਬਿੱਲ ‘ਤੇ ਚਿੰਤਾ ਪ੍ਰਗਟ ਕੀਤੀ ਅਤੇ ਦਿੱਲੀ ਦੀ ਭਾਜਪਾ ਸਰਕਾਰ ‘ਤੇ ਨਿਸ਼ਾਨਾ ਸਾਧਿਆ। ਬਿੱਲ ਬਾਰੇ ਉਨ੍ਹਾਂ ਕਿਹਾ ਕਿ ਇਸ ਬਿੱਲ ਦਾ ਛੋਟੇ ਵਪਾਰੀਆਂ ‘ਤੇ ਬੁਰਾ ਪ੍ਰਭਾਵ ਪਵੇਗਾ, ਜਦੋਂ ਕਿ ਵੱਡੇ ਵਪਾਰੀਆਂ ਨੂੰ ਫਾਇਦਾ ਹੋਵੇਗਾ। ਆਤਿਸ਼ੀ ਨੇ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਕਿਹਾ ਕਿ ਸ਼ੁੱਕਰਵਾਰ ਨੂੰ ਉਹ ਦਿੱਲੀ ਦੇ ਕਈ ਵਪਾਰੀਆਂ ਅਤੇ ਕਾਰੋਬਾਰੀਆਂ ਨਾਲ ਮਿਲੇ ਸਨ। ਵਪਾਰੀਆਂ ਵੱਲੋਂ ਆਤਿਸ਼ੀ ਕੋਲ ਖ਼ਦਸ਼ਿਆਂ ਮਗਰੋਂ ਉਨ੍ਹਾਂ ਮੀਡੀਆ ਨੂੰ ਸੰਬੋਧਨ ਕੀਤਾ। ਆਤਿਸ਼ੀ ਨੇ ਕਿਹਾ ਕਿ ਵਪਾਰੀਆਂ ਨੇ ਕਿਹਾ ਕਿ ਇਨ੍ਹਾਂ ਸੋਧਾਂ ਨਾਲ ਛੋਟੇ ਵਪਾਰੀਆਂ ਨੂੰ ਮੁਸ਼ਕਲ ਆਵੇਗੀ, ਜਦੋਂ ਕਿ ਭਾਜਪਾ ਦੇ ਵੱਡੇ ਦੋਸਤਾਂ ਨੂੰ ਫਾਇਦਾ ਹੋਵੇਗਾ।
“ਮਾਪਿਆਂ ਵਿਰੋਧੀ ਹੈ ਸਕੂਲ ਫ਼ੀਸ ਨਿਯਮ ਬਿੱਲ”
ਬੁੱਧਵਾਰ ਨੂੰ ਆਤਿਸ਼ੀ ਨੇ ਸਕੂਲ ਫ਼ੀਸ ਨਿਯਮ ਬਿੱਲ ਨੂੰ ਲੈ ਕੇ ਦਿੱਲੀ ਸਰਕਾਰ ‘ਤੇ ਨਿਸ਼ਾਨਾ ਸਾਧਿਆ। ਉਨ੍ਹਾਂ ਕਿਹਾ ਸੀ ਕਿ ਇਹ ਬਿੱਲ ‘ਮਾਪਿਆਂ ਵਿਰੋਧੀ ਅਤੇ ਪ੍ਰਬੰਧਕਾਂ ਪੱਖੀ’ ਹੈ। ਇਸ ਤੋਂ ਬਾਅਦ ਵਿਰੋਧੀ ਪਾਰਟੀ ਨੇ ਮਾਪਿਆਂ ਦੇ ਅਧਿਕਾਰਾਂ ਦੀ ਰੱਖਿਆ ਲਈ ਬਿੱਲ ਵਿੱਚ ਚਾਰ ਸੋਧਾਂ ਕਰਨ ਦਾ ਪ੍ਰਸਤਾਵ ਰੱਖਿਆ ਸੀ। ਆਤਿਸ਼ੀ ਨੇ ਕਿਹਾ ਕਿ ਆਮ ਆਦਮੀ ਪਾਰਟੀ ਨੇ ਭਾਜਪਾ ਸਰਕਾਰ ਨੂੰ ਬਿੱਲ ਵਿੱਚ ਚਾਰ ਸੋਧਾਂ ਕਰਨ ਦਾ ਪ੍ਰਸਤਾਵ ਦਿੱਤਾ ਹੈ। ਇਨ੍ਹਾਂ ਵਿੱਚ ਸਕੂਲ ਖਾਤਿਆਂ ਦੇ ਆਡਿਟ, ਕਮੇਟੀ ਵਿੱਚ ਚੁਣੇ ਹੋਏ ਮਾਪਿਆਂ ਦੀ ਪ੍ਰਤੀਨਿਧਤਾ, ਕਮੇਟੀ ਦੇ ਫ਼ੈਸਲਿਆਂ ਨੂੰ ਅਦਾਲਤ ਵਿੱਚ ਚੁਣੌਤੀ ਦੇਣ ਦਾ ਅਧਿਕਾਰ ਅਤੇ ਆਸਾਨ ਸ਼ਿਕਾਇਤ ਸੀਮਾ ਸ਼ਾਮਲ ਹਨ।
