ਪ੍ਰਦੂਸ਼ਣ ਕਾਰਨ ਦਿੱਲੀ ਵਾਸੀਆਂ ਦਾ ਸਾਹ ਘੁਟਿਆ

ਕੌਮੀ ਰਾਜਧਾਨੀ ਵਿੱਚ ਅੱਜ ਸਵੇਰੇ ਸੰਘਣੀ ਸਮੌਗ ਛਾਈ ਨਜ਼ਰ ਆਈ। ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਬੋਰਡ (ਸੀ ਪੀ ਸੀ ਬੀ) ਦੇ ਅੰਕੜਿਆਂ ਅਨੁਸਾਰ ਸਵੇਰੇ 8 ਵਜੇ ਸ਼ਹਿਰ ਦਾ ਹਵਾ ਗੁਣਵੱਤਾ ਸੂਚਕ ਅੰਕ (ਏ ਕਿਊ ਆਈ) 384 ਦਰਜ ਕੀਤਾ ਗਿਆ, ਜੋ ‘ਬਹੁਤ ਖਰਾਬ’ ਸ਼੍ਰੇਣੀ ਵਿੱਚ ਆਉਂਦਾ ਹੈ। ਇਸ ਤੋਂ ਪਹਿਲਾਂ 27 ਨਵੰਬਰ ਨੂੰ ਸ਼ਾਮ 4 ਵਜੇ ਏ ਕਿਊ ਆਈ 377 ਸੀ। ਭਾਵੇਂ ਹਾਲਾਤ ਥੋੜ੍ਹੇ ਵਿਗੜੇ ਹਨ ਪਰ ਹਵਾ ਦੀ ਗੁਣਵੱਤਾ ਲਗਾਤਾਰ ‘ਬਹੁਤ ਖਰਾਬ’ ਬਣੀ ਹੋਈ ਹੈ।

ਸ਼ਹਿਰ ਦੇ ਕਈ ਇਲਾਕਿਆਂ ਵਿੱਚ ਏ ਕਿਊ ਆਈ ‘ਗੰਭੀਰ’ ਸ਼੍ਰੇਣੀ ਵਿੱਚ ਦਰਜ ਕੀਤਾ ਗਿਆ। ਸੀ ਪੀ ਸੀ ਬੀ ਮੁਤਾਬਕ ਅਸ਼ੋਕ ਨਗਰ ਵਿੱਚ 417, ਬਵਾਨਾ ਵਿੱਚ 413, ਚਾਂਦਨੀ ਚੌਕ ਵਿੱਚ 408, ਜਹਾਂਗੀਰਪੁਰੀ ਵਿੱਚ 420, ਜਵਾਹਰ ਲਾਲ ਨਹਿਰੂ ਸਟੇਡੀਅਮ ਵਿੱਚ 401 ਅਤੇ ਬੁਰਾੜੀ ਕਰਾਸਿੰਗ ਵਿੱਚ 403 ਏ ਕਿਊ ਆਈ ਰਿਹਾ। ਆਨੰਦ ਵਿਹਾਰ ਵਿੱਚ ਵੀ ਸੰਘਣੀ ਧੁੰਦ ਰਹੀ ਅਤੇ ਇੱਥੇ ਏ ਕਿਊ ਆਈ 408 ਦਰਜ ਕੀਤਾ ਗਿਆ। ਇਸੇ ਤਰ੍ਹਾਂ ਮੰਦਰ ਮਾਰਗ (320), ਆਈ ਟੀ ਓ (393), ਨਜਫਗੜ੍ਹ (365), ਸਿਰੀਫੋਰਟ (394) ਅਤੇ ਸ੍ਰੀ ਅਰਬਿੰਦੋ ਮਾਰਗ (354) ਵਿੱਚ ਹਵਾ ‘ਬਹੁਤ ਖਰਾਬ’ ਰਹੀ। ਸ਼ਹਿਰ ਦੇ ਵਸਨੀਕ ਵਿਨੋਦ ਨੇ ਦਾਅਵਾ ਕੀਤਾ ਕਿ ਸਰਕਾਰ ਨੇ ਕਲਾਊਡ ਸੀਡਿੰਗ ਰਾਹੀਂ ਨਕਲੀ ਮੀਂਹ ਪਾਉਣ ਵਰਗੇ ਕਦਮ ਚੁੱਕੇ ਸਨ ਪਰ ਇਹ ਕੋਸ਼ਿਸ਼ਾਂ ਨਾਕਾਮ ਰਹੀਆਂ।

ਜ਼ਿਕਰਯੋਗ ਹੈ ਕਿ ਏ ਕਿਊ ਆਈ ਦੇ ਪੱਧਰ ਵਿੱਚ ਕੁਝ ਸੁਧਾਰ ਨੂੰ ਦੇਖਦਿਆਂ ‘ਕਮਿਸ਼ਨ ਫਾਰ ਏਅਰ ਕੁਆਲਿਟੀ ਮੈਨੇਜਮੈਂਟ’ (ਸੀ ਏ ਕਿਊ ਐੱਮ) ਨੇ ਬੁੱਧਵਾਰ ਨੂੰ ਗ੍ਰੇਡਿਡ ਰਿਸਪਾਂਸ ਐਕਸ਼ਨ ਪਲਾਨ (ਗ੍ਰੈਪ) ਦੇ ਤੀਜੇ ਪੜਾਅ (ਸਟੇਜ-3) ਤਹਿਤ ਲੱਗੀਆਂ ਪਾਬੰਦੀਆਂ ਨੂੰ ਤੁਰੰਤ ਪ੍ਰਭਾਵ ਨਾਲ ਹਟਾ ਦਿੱਤਾ ਸੀ। ਹਾਲਾਂਕਿ ਅਧਿਕਾਰੀਆਂ ਨੂੰ ਇਹ ਯਕੀਨੀ ਬਣਾਉਣ ਲਈ ਕਿਹਾ ਗਿਆ ਹੈ ਕਿ ਪ੍ਰਦੂਸ਼ਣ ਮੁੜ ਖਤਰਨਾਕ ਪੱਧਰ ’ਤੇ ਨਾ ਪਹੁੰਚੇ, ਇਸ ਲਈ ਗ੍ਰੈਪ ਦੇ ਪਹਿਲੇ ਅਤੇ ਦੂਜੇ ਪੜਾਅ (ਸਟੇਜ-1 ਤੇ 2) ਤਹਿਤ ਕਾਰਵਾਈ ਤੇਜ਼ ਕੀਤੀ ਜਾਵੇ। ਹੁਕਮਾਂ ਵਿੱਚ ਇਹ ਵੀ ਕਿਹਾ ਗਿਆ ਹੈ ਕਿ ਨਿਯਮਾਂ ਦੀ ਉਲੰਘਣਾ ਕਰਨ ਕਰਕੇ ਬੰਦ ਕੀਤੀਆਂ ਗਈਆਂ ਉਸਾਰੀ ਵਾਲੀਆਂ ਥਾਵਾਂ ਨੂੰ ਕਮਿਸ਼ਨ ਦੀ ਵੱਖਰੀ ਮਨਜ਼ੂਰੀ ਤੋਂ ਬਿਨਾਂ ਦੁਬਾਰਾ ਕੰਮ ਸ਼ੁਰੂ ਕਰਨ ਦੀ ਇਜਾਜ਼ਤ ਨਹੀਂ ਹੋਵੇਗੀ।