ਘੱਗਰ ਦਰਿਆ ਵਿੱਚ ਪਾਣੀ ਦਾ ਪੱਧਰ ਵਧਿਆ
ਕਰਮਜੀਤ ਸਿੰਘ ਚਿੱਲਾ
ਬਨੂੜ, 29 ਜੂਨ
ਬਨੂੜ ਖੇਤਰ ਵਿੱਚੋਂ ਲੰਘਦੇ ਘੱਗਰ ਦਰਿਆ ਵਿੱਚ ਅੱਜ ਸਵੇਰੇ ਅਚਾਨਕ ਪਾਣੀ ਦਾ ਪੱਧਰ ਕਾਫੀ ਵਧ ਗਿਆ ਜੋ ਸ਼ਾਮ ਤੱਕ ਆਮ ਵਾਂਗ ਹੋ ਗਿਆ। ਦਰਿਆ ਦੇ ਕਿਨਾਰੇ ਵੱਸੇ ਪਿੰਡਾਂ ਦੇ ਵਸਨੀਕਾਂ ਦੇ ਦੱਸਣ ਅਨੁਸਾਰ ਸਵੇਰੇ ਛੇ ਵਜੇ ਪਾਣੀ ਵਧਣਾ ਸ਼ੁਰੂ ਹੋਇਆ ਅਤੇ ਗਿਆਰਾਂ ਵਜੇ ਤੱਕ ਪਾਣੀ ਲਗਾਤਾਰ ਵਧਦਾ ਰਿਹਾ। ਬਾਰ੍ਹਾਂ ਵਜੇ ਪਾਣੀ ਘਟਣਾ ਸ਼ੁਰੂ ਹੋ ਗਿਆ, ਜਿਸ ਮਗਰੋਂ ਲੋਕਾਂ ਨੇ ਸੁੱਖ ਦਾ ਸਾਹ ਲਿਆ। ਸ਼ਾਮੀ ਪੰਜ ਵਜੇ ਪਾਣੀ ਦਾ ਪੱਧਰ ਆਮ ਵਾਂਗ ਹੋ ਗਿਆ।
ਸਿੰਜਾਈ ਵਿਭਾਗ ਨੇ ਘੱਗਰ ਵਿੱਚ ਪਾਣੀ ਵਧਣ ਦੀ ਪੁਸ਼ਟੀ ਕੀਤੀ ਹੈ। ਉਨ੍ਹਾਂ ਦੱਸਿਆ ਕਿ ਸਵੇਰੇ ਛੇ ਵਜੇ ਘੱਗਰ ਦਰਿਆ ਵਿੱਚ ਪਾਣੀ ਦਾ ਵਹਿਣ ਸਾਢੇ ਤਿੰਨ ਫੁੱਟ ਦੀ ਉਚਾਈ ’ਤੇ ਸੀ, ਜੋ 7242 ਕਿਊਸਿਕ ਬਣਦਾ ਹੈ। ਇਸ ਮਗਰੋਂ ਸਵੇਰੇ ਸੱਤ ਵਜੇ ਇਹ ਵਧ ਕੇ ਛੇ ਫੁੱਟ ਦੀ ਉਚਾਈ ’ਤੇ ਪਹੁੰਚ ਗਿਆ, ਜੋ 15764 ਕਿਊਸਿਕ ਬਣਦਾ ਹੈ। ਉਨ੍ਹਾਂ ਦੱਸਿਆ ਕਿ ਅੱਠ ਵਜੇ ਪਾਣੀ ਦਾ ਪੱਧਰ ਹੋਰ ਵਧ ਕੇ ਸਾਢੇ ਛੇ ਫੁੱਟ ਦੀ ਉਚਾਈ ’ਤੇ ਪਹੁੰਚ ਗਿਆ, ਜੋ ਕਿ 18731 ਕਿਊਸਿਕ ਬਣਦਾ ਹੈ ਤੇ ਇਸੇ ਸਮਰੱਥਾ ਵਿੱਚ ਇਹ ਪਾਣੀ ਲਗਾਤਾਰ ਗਿਆਰਾਂ ਵਜੇ ਤੱਕ ਵਹਿੰਦਾ ਰਿਹਾ।
ਇਸ ਤੋਂ ਬਾਅਦ ਘੱਗਰ ਵਿੱਚ ਪਾਣੀ ਘਟਣਾ ਸ਼ੁਰੂ ਹੋ ਗਿਆ ਅਤੇ ਬਾਰ੍ਹਾਂ ਵਜੇ ਪਾਣੀ ਦਾ ਪੱਧਰ ਘਟ ਕੇ ਤਿੰਨ ਫੁੱਟ ’ਤੇ ਰਹਿ ਗਿਆ ਸੀ, ਜੋ ਕਿ 6384 ਕਿਊਸਿਕ ਬਣਦਾ ਹੈ। ਸ਼ਾਮ ਪੰਜ ਵਜੇ ਪਾਣੀ ਦਾ ਪੱਧਰ ਡੇਢ ਫੁੱਟ ਉੱਪਰ ਆ ਗਿਆ ਸੀ। ਆਮ ਦਿਨਾਂ ਵਿੱਚ ਘੱਗਰ ਵਿੱਚ ਪਾਣੀ ਦਾ ਵਹਿਣ ਇੱਕ ਤੋਂ ਡੇਢ ਫੁੱਟ ਤੱਕ ਹੀ ਰਹਿੰਦਾ ਹੈ। ਪਾਣੀ ਵਧਣ ਦਾ ਕਾਰਨ ਪਹਾੜੀ ਖੇਤਰ ਵਿੱਚ ਜ਼ਿਆਦਾ ਮੀਂਹ ਦੱਸਿਆ ਜਾ ਰਿਹਾ ਹੈ। ਪਾਣੀ ਵਧਣ ਸਮੇਂ ਪਿੰਡ ਮਨੌਲੀ ਸੂਰਤ ਸਣੇ ਕਈ ਪਿੰਡਾਂ ਦੇ ਕਿਸਾਨਾਂ ਵੱਲੋਂ ਘੱਗਰ ਦਰਿਆ ਦੇ ਬੰਨ੍ਹ ਦੇ ਅੰਦਰਲੇ ਪਾਸੇ ਫ਼ਸਲਾਂ ਵਿੱਚ ਪਾਣੀ ਭਰ ਗਿਆ। ਇੰਨੀ ਸਮਰੱਥਾ ਵਿੱਚ ਘੱਗਰ ਵਿੱਚੋਂ ਗਿਆ ਪਾਣੀ ਨੀਵੇਂ ਖ਼ੇਤਰਾਂ ਵਿੱਚ ਲੋਕਾਂ ਲਈ ਮੁਸ਼ਕਿਲਾਂ ਖੜ੍ਹੀਆਂ ਕਰ ਸਕਦਾ ਹੈ। ਸਥਾਨਕ ਕਰਮਚਾਰੀਆਂ ਵੱਲੋਂ ਇਸ ਸਬੰਧੀ ਉੱਚ ਅਧਿਕਾਰੀਆਂ ਨੂੰ ਜਾਣੂ ਕਰਵਾਇਆ ਗਿਆ ਹੈ। ਦੱਸਣਯੋਗ ਹੈ ਕਿ ਸੱਤ ਫੁੱਟ ਦੀ ਉਚਾਈ ’ਤੇ ਵਹਿੰਦੇ ਪਾਣੀ ਨੂੰ ਫਲੱਡ ਦੀ ਲੋਅ ਚਿਤਾਵਨੀ ਵਜੋਂ ਗਿਣਿਆ ਜਾਂਦਾ ਹੈ।
