ਹਾਕੀ: ਐੱਫ ਸੀ ਆਈ ਅਤੇ ਰੇਲ ਕੋਚ ਫੈਕਟਰੀ ਫਾਈਨਲ ’ਚ
ਪਰਮਜੀਤ ਸਿੰਘ ਨੂੰ ਮੈਨ ਆਫ ਦਿ ਪਲੇਅਰ ਐਲਾਨਿਆ; ਸੰਸਦ ਮੈਂਬਰ ਮਨੀਸ਼ ਤਿਵਾਡ਼ੀ ਨੇ ਖਿਡਾਰੀਆਂ ਦੀ ਹੌਸਲਾ-ਅਫ਼ਜ਼ਾਈ ਕੀਤੀ
ਮੁਹਾਲੀ ਦੇ ਸੈਕਟਰ 63 ਦੇ ਬਲਬੀਰ ਸਿੰਘ ਸੀਨੀਅਰ ਕੌਮਾਂਤਰੀ ਹਾਕੀ ਸਟੇਡੀਅਮ ਵਿੱਚ ਚੱਲ ਰਹੇ ਪਹਿਲੇ ਆਲ ਇੰਡੀਆ ਮੁਹਾਲੀ ਗੋਲਡ ਕੱਪ ਪੁਰਸ਼ ਹਾਕੀ ਟੂਰਨਾਮੈਂਟ-2025 ਵਿੱਚ ਅੱਜ ਹੋਏ ਸੈਮੀਫਾਈਨਲ ਮੁਕਾਬਲਿਆਂ ਵਿਚ ਐੱਫ ਸੀ ਆਈ ਦਿੱਲੀ ਅਤੇ ਰੇਲ ਕੋਚ ਫੈਕਟਰੀ ਕਪੂਰਥਲਾ ਦੀਆਂ ਟੀਮਾਂ ਆਪਣੀਆਂ ਜਿੱਤਾਂ ਦਰਜ ਕਰਕੇ ਫਾਈਨਲ ਵਿੱਚ ਪਹੁੰਚ ਗਈਆਂ ਹਨ। ਦੋਹਾਂ ਟੀਮਾਂ ਦੌਰਾਨ ਫਾਈਨਲ ਮੈਚ 30 ਨਵੰਬਰ ਐਤਵਾਰ ਨੂੰ ਖੇਡਿਆ ਜਾਵੇਗਾ।
ਅੱਜ ਲੋਕ ਸਭਾ ਮੈਂਬਰ ਮਨੀਸ਼ ਤਿਵਾੜੀ, ਰਵਿੰਦਰ ਕੁਮਾਰ ਗੁਪਤਾ ਅਤੇ ਕਪਿਲ ਦੇਵ ਪ੍ਰਾਸ਼ਰ ਨੇ ਵਿਸ਼ੇਸ਼ ਤੌਰ ’ਤੇ ਸ਼ਮੂਲੀਅਤ ਕਰਦਿਆਂ ਟੀਮਾਂ ਦੀ ਹੌਸਲਾ-ਅਫ਼ਜ਼ਾਈ ਕੀਤੀ ਅਤੇ ਪ੍ਰਬੰਧਕਾਂ ਦੇ ਉਪਰਾਲੇ ਦੀ ਸ਼ਲਾਘਾ ਕੀਤੀ।
ਉਨ੍ਹਾਂ ਆਪਣੇ ਵੱਲੋਂ ਹਾਕੀ ਨੂੰ ਪ੍ਰਫੁੱਲਿਤ ਕਰਨ ਲਈ ਪੂਰਨ ਸਹਿਯੋਗ ਦਾ ਭਰੋਸਾ ਦਿਵਾਇਆ।
ਅੱਜ ਸੈਮੀ-ਫਾਈਨਲ ਦੇ ਖੇਡੇ ਗਏ ਪਹਿਲੇ ਮੁਕਾਬਲੇ ਵਿੱਚ ਐੱਫ ਸੀ ਆਈ ਦਿੱਲੀ ਨੇ ਪੀ ਐਸ ਬੀ ਜਲੰਧਰ ਨੂੰ 5-2 ਗੋਲਾਂ ਦੇ ਅੰਤਰ ਨਾਲ ਹਰਾਇਆ। ਇਸ ਮੈਚ ਦੌਰਾਨ ਐਫ ਸੀ ਆਈ ਦੇ ਅਲਮਾਜ਼ ਖਾਨ ਨੂੰ ਮੈਚ ਆਫ਼ ਦਾ ਪਲੇਅਰ ਐਲਾਨਿਆ ਗਿਆ।
ਆਰਮੀ ਇਲੈਵਨ ਜਲੰਧਰ ਤੇ ਆਰ ਸੀ ਐਫ ਕਪੂਰਥਲਾ ਵਿਚਕਾਰ ਖੇਡੇ ਗਏ ਸੈਮੀ-ਫਾਈਨਲ ਦੇ ਦੂਜੇ ਮੈਚ ਵਿੱਚ ਆਰ ਸੀ ਐਫ ਨੇ ਆਰਮੀ ਇਲੈਵਨ ਨੂੰ 4-2 ਗੋਲਾਂ ਦੇ ਅੰਤਰ ਨਾਲ ਹਰਾਇਆ। ਆਰਮੀ ਇਲੈਵਨ ਦੇ ਖਿਡਾਰੀ ਪਰਮਜੀਤ ਸਿੰਘ ਨੂੰ ਮੈਨ ਆਫ ਦਿ ਪਲੇਅਰ ਐਲਾਨਿਆ ਗਿਆ।
