ਕਿਸਾਨਾਂ ਨੇ ਨੈਸ਼ਨਲ ਹਾਈਵੇਅ ਤੋਂ ਧਰਨਾ ਚੁੱਕਿਆ

ਨੈਸ਼ਨਲ ਹਾਈਵੇਅ ਅਧਿਕਾਰੀਆਂ ਨੇ ਲਾਂਘਾ ਛੱਡਣ ਲਈ ਹਰ ਸੰਭਵ ਕੋਸ਼ਿਸ਼ ਦਾ ਭਰੋਸਾ ਦਿੱਤਾ: ਕੰਗ

shashi pal jain

ਖਰੜ, 05:37 AM Nov 30, 2025 IST

ਕਿਸਾਨਾਂ ਤੋਂ ਮੰਗ ਪੱਤਰ ਲੈਂਦੇ ਹੋਏ ਜਗਮੋਹਨ ਸਿੰਘ ਕੰਗ।

ਹਲਕਾ ਖਰੜ ਤੋਂ ਕਾਂਗਰਸ ਪਾਰਟੀ ਦੇ ਸੀਨੀਅਰ ਆਗੂ ਅਤੇ ਸਾਬਕਾ ਮੰਤਰੀ ਪੰਜਾਬ ਜਗਮੋਹਨ ਸਿੰਘ ਕੰਗ ਪਿੰਡ ਮੱਛਲੀ ਖੁਰਦ ਵਿੱਚ ਐੱਨ ਐੱਚ ਏ ਆਈ 205-ਏ ਹਾਈਵੇਅ ਖ਼ਿਲਾਫ਼ ਕਿਸਾਨਾਂ ਦੇ ਜਾਰੀ ਧਰਨੇ ’ਚ ਨੈਸ਼ਨਲ ਹਾਈਵੇਅ ਦੇ ਅਧਿਕਾਰੀਆਂ ਨਾਲ ਪਹੁੰਚੇ। ਪਿੰਡ ਮੱਛਲੀ ਕਲਾਂ, ਮੱਛਲੀ ਖੁਰਦ, ਗਿੱਦੜਪੁਰ, ਚੂਹੜਮਾਜਰਾ, ਮੌਜ਼ਪੁਰ, ਭਾਰਤਪੁਰ, ਪਵਾਲਾ, ਤਾਜਪੁਰਾ, ਚਡਿਆਲਾ ਸੂਦਾ, ਸੋਏ ਮਾਜਰਾ ਅਤੇ ਪਾਤੜਾਂ ਦੇ ਵਾਸੀ ਮੰਗ ਕਰ ਰਹੇ ਹਨ ਕਿ ਇਸ ਨੈਸ਼ਨਲ ਹਾਈਵੇਅ ਨਾਲ ਦੇ ਪਿੰਡਾਂ ਨੂੰ ਆਉਣ-ਜਾਣ ਲਈ ਢੁੱਕਵਾਂ ਲਾਂਘਾ ਛੱਡਿਆ ਜਾਵੇ।

ਸਾਬਕਾ ਮੰਤਰੀ ਕੰਗ ਮੌਕੇ ’ਤੇ ਪੁੱਜੇ ਅਤੇ ਨੈਸ਼ਨਲ ਹਾਈਵੇਅ ਦੇ ਨੁਮਾਇੰਦਿਆਂ ਅਤੇ ਉੱਚ ਅਧਿਕਾਰੀਆਂ ਨਾਲ ਗੱਲਬਾਤ ਕੀਤੀ। ਉਨ੍ਹਾਂ ਕਿਹਾ ਕਿ ਅਧਿਕਾਰੀਆਂ ਨੇ ਇਹ ਭਰੋਸਾ ਦਿਵਾਇਆ ਕਿ ਨਕਸ਼ੇ ਪਹਿਲਾਂ ਹੀ ਬਣ ਚੁਕੇ ਸਨ ਪਰ ਫਿਰ ਵੀ ਲੋਕ ਹਿੱਤ ਵਿੱਚ ਹਰ ਸੰਭਵ ਢੁੱਕਵੀਂ ਤਬਦੀਲੀ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਵੇਗੀ। ਕੰਗ ਨੇ ਕਿਹਾ ਕਿ ਇਸ ਮਸਲੇ ਬਾਰੇ ਸਾਰਾ ਕੇਸ ਬਣਾ ਕੇ ਭਾਰਤ ਸਰਕਾਰ ਦੇ ਸੜਕ ਆਵਾਜਾਈ ਅਤੇ ਰਾਜਮਾਰਗ ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਨੂੰ ਲੋੜੀਂਦੀ ਕਾਰਵਾਈ ਕਰਨ ਲਈ ਭੇਜਿਆ ਜਾ ਰਿਹਾ ਹੈ। ਇਸ ਭਰੋਸੇ ਮਗਰੋਂ ਕਿਸਾਨਾਂ ਨੇ ਨੈਸ਼ਨਲ ਹਾਈਵੇਅ 205ਏ/ਮੱਛਲੀ ਖੁਰਦ ਤੋਂ ਧਰਨਾ ਖਤਮ ਕਰ ਦਿੱਤਾ। ਇਸ ਮੌਕੇ ਸਰਪੰਚ ਸਰਬਜੀਤ ਸਿੰਘ ਟੋਡਰਮਾਜਰਾ, ਦਲੀਪ ਸਿੰਘ ਬਾਜਵਾ, ਸੰਤ ਰਾਮ, ਲਾਭ ਸਿੰਘ, ਸਰਪੰਚ ਜਸਵੰਤ ਸਿੰਘ, ਸਵਰਨ ਸਿੰਘ ਨੰਬਰਦਾਰ, ਅਮਰੀਕ ਸਿੰਘ, ਮਨਪ੍ਰੀਤ ਕੌਰ ਸਰਪੰਚ, ਵਿਧੀ ਚੰਦ, ਸੋਨੂੰ, ਅਮਰ ਸਿੰਘ, ਹੈਪੀ ਸਰਪੰਚ, ਕੁਸ ਰਾਣਾ ਹਾਜ਼ਰ ਸਨ।