ਸੀਬੀਐੱਸਈ ਵੱਲੋਂ ਸਕੂਲਾਂ ਵਿਚ ਸੀਸੀਟੀਵੀ ਕੈਮਰੇ ਲਾਉਣੇ ਲਾਜ਼ਮੀ ਕਰਾਰ
ਸੀਬੀਐੱਸਈ ਨੇ ਐਫੀਲੀਏਸ਼ਨ ਨੇਮਾਂ ਵਿਚ ਸੋਧ ਕਰਦਿਆਂ ਸਕੂਲਾਂ ਵਿਚ ਪਖਾਨਿਆਂ (Toilet) ਨੂੰ ਛੱਡ ਕੇ ਹੋਰਨਾਂ ਸਾਰੀਆਂ ਥਾਵਾਂ ’ਤੇ ਰੀਅਲ ਟਾਈਮ ਆਡੀਓ-ਵਿਜ਼ੂਅਲ ਰਿਕਾਰਡਿੰਗ ਨਾਲ ਲੈਸ ਸੀਸੀਟੀਵੀ ਕੈਮਰੇ ਲਾਉਣੇ ਲਾਜ਼ਮੀ ਕਰ ਦਿੱਤੇ ਹਨ।
ਸੀਬੀਐੱਸਈ ਦੇ ਸਕੱਤਰ ਹਿਮਾਂਸ਼ੂ ਗੁਪਤਾ ਨੇ ਕਿਹਾ, ‘‘ਵਿਦਿਆਰਥੀਆਂ ਦੀ ਸੁਰੱਖਿਆ ਇੱਕ ਸਕੂਲ ਦੀ ਸਭ ਤੋਂ ਵੱਡੀ ਜ਼ਿੰਮੇਵਾਰੀ ਵਿੱਚੋਂ ਇੱਕ ਹੈ। ਵਿਦਿਆਰਥੀਆਂ ਲਈ ਸਕੂਲ ਵਿੱਚ ਸੁਰੱਖਿਅਤ ਅਤੇ ਇਕਸੁਰ ਈਕੋ-ਸਿਸਟਮ ਯਕੀਨੀ ਬਣਾਉਣਾ ਵੀ ਸਕੂਲ ਦਾ ਹੀ ਫ਼ਰਜ਼ ਹੈ। ਸੁਰੱਖਿਆ ਦੇ ਦੋ ਪਹਿਲੂ ਹਨ- (ਏ) ਗੈਰ-ਸਮਾਜਿਕ ਤੱਤਾਂ ਤੋਂ ਸੁਰੱਖਿਆ (b) ਧੱਕੇਸ਼ਾਹੀ ਅਤੇ ਹੋਰ ਅਪ੍ਰਤੱਖ ਖਤਰਿਆਂ ਦੇ ਹਵਾਲੇ ਨਾਲ ਬੱਚਿਆਂ ਦੀ ਸਮੁੱਚੀ ਭਲਾਈ ਲਈ ਸੁਰੱਖਿਆ। ਅਜਿਹੀਆਂ ਸਾਰੀਆਂ ਸੰਭਾਵਨਾਵਾਂ ਨੂੰ ਇੱਕ ਚੌਕਸ ਅਤੇ ਸੰਵੇਦਨਸ਼ੀਲ ਸਟਾਫ ਅਤੇ ਨਵੀਨਤਮ ਤਕਨਾਲੋਜੀ ਦੀ ਵਰਤੋਂ ਨਾਲ ਰੋਕਿਆ ਜਾ ਸਕਦਾ ਹੈ।’’
ਗੁਪਤਾ ਨੇ ਕਿਹਾ ਕਿ ਸਕੂਲਾਂ ਵਿਚ ਬੱਚਿਆਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ (ਸੀਬੀਐੱਸਈ) ਬੋਰਡ ਨੇ ਐਫੀਲੀਏਸ਼ਨ ਬਾਈ ਲਾਅਜ਼-2018 ਦੇ ਚੈਪਟਰ 4 (ਭੌਤਿਕ ਬੁਨਿਆਦੀ ਢਾਂਚਾ) ਵਿੱਚ ਸੋਧ ਕਰਕੇ ਸੀਸੀਟੀਵੀ ਲਾਉਣ ਬਾਰੇ ਇੱਕ ਧਾਰਾ ਸ਼ਾਮਲ ਕੀਤੀ ਹੈ। ਉਨ੍ਹਾਂ ਕਿਹਾ, ‘‘ਸਕੂਲ ਨੂੰ ਸਾਰੇ ਪ੍ਰਵੇਸ਼ ਅਤੇ ਨਿਕਾਸ ਸਥਾਨਾਂ, ਲਾਬੀਆਂ, ਗਲਿਆਰਿਆਂ, ਪੌੜੀਆਂ, ਸਾਰੇ ਕਲਾਸਰੂਮਾਂ, ਪ੍ਰਯੋਗਸ਼ਾਲਾਵਾਂ, ਲਾਇਬਰੇਰੀ, ਕੰਟੀਨ ਖੇਤਰ, ਸਟੋਰ ਰੂਮ, ਖੇਡ ਮੈਦਾਨ ਅਤੇ ਟਾਇਲਟ ਅਤੇ ਵਾਸ਼ਰੂਮਾਂ ਨੂੰ ਛੱਡ ਕੇ ਹੋਰ ਆਮ ਖੇਤਰਾਂ ਵਿੱਚ ਆਡੀਓ ਵਿਜ਼ੂਅਲ ਸਹੂਲਤ ਵਾਲੇ ਉੱਚ ਰੈਜ਼ੋਲਿਊਸ਼ਨ ਵਾਲੇ ਸੀਸੀਟੀਵੀ ਕੈਮਰੇ ਲਗਾਉਣੇ ਚਾਹੀਦੇ ਹਨ, ਜਿਨ੍ਹਾਂ ਵਿੱਚ ਰੀਅਲ ਟਾਈਮ ਆਡੀਓ ਵਿਜ਼ੂਅਲ ਰਿਕਾਰਡਿੰਗ ਹੋਵੇ।’’
ਗੁਪਤਾ ਨੇ ਕਿਹਾ, ‘‘ਇਹ ਸੀਸੀਟੀਵੀ ਕੈਮਰੇ ਘੱਟੋ-ਘੱਟ 15 ਦਿਨਾਂ ਦੀ ਫੁਟੇਜ ਰੱਖਣ ਦੀ ਸਮਰੱਥਾ ਵਾਲੇ ਸਟੋਰੇਜ ਡਿਵਾਈਸ ਨਾਲ ਲੈਸ ਹੋਣੇ ਚਾਹੀਦੇ ਹਨ। ਇਹ ਯਕੀਨੀ ਬਣਾਇਆ ਜਾਵੇਗਾ ਕਿ ਘੱਟੋ-ਘੱਟ 15 ਦਿਨਾਂ ਦਾ ਬੈਕਅੱਪ ਸੁਰੱਖਿਅਤ ਰੱਖਿਆ ਜਾਵੇ, ਜਿਸ ਤੱਕ ਲੋੜ ਪੈਣ ’ਤੇ ਅਧਿਕਾਰੀਆਂ ਵੱਲੋਂ ਪਹੁੰਚ ਕੀਤੀ ਜਾ ਸਕਦੀ ਹੈ।’’ ਸਕੂਲਾਂ ਵਿੱਚ ਬੱਚਿਆਂ ਦੀ ਸੁਰੱਖਿਆ ਅਤੇ ਸੁਰੱਖਿਆ ਬਾਰੇ ਮੈਨੂਅਲ, NCPCR ਅਨੁਸਾਰ, ‘ਸਕੂਲ ਸੁਰੱਖਿਆ’ ਨੂੰ ਬੱਚਿਆਂ ਲਈ ਇੱਕ ਸੁਰੱਖਿਅਤ ਵਾਤਾਵਰਣ ਬਣਾਉਣ ਵਜੋਂ ਪਰਿਭਾਸ਼ਿਤ ਕੀਤਾ ਗਿਆ ਹੈ।
