ਭਾਅ ਜੀ ਗੁਰਸ਼ਰਨ ਸਿੰਘ ਦਾ ਜਨਮ ਦਿਨ ਮਨਾਇਆ
ਸੁਚੇਤਕ ਸਕੂਲ ਆਫ਼ ਐਕਟਿੰਗ ਸਟੂਡੀਓ, ਸੈਕਟਰ 70 ਵਿੱਚ ਪੰਜਾਬੀ ਰੰਗਮੰਚ ਦੇ ਸ਼ਾਹ ਅਸਵਾਰ ਗੁਰਸ਼ਰਨ ਸਿੰਘ ਦਾ ਜਨਮ ਦਿਨ ਮਨਾਇਆ ਗਿਆ। ਇਸ ਮੌਕੇ ਦਸਤਾਵੇਜ਼ੀ ਫ਼ਿਲਮ ‘ਕ੍ਰਾਂਤੀ ਦਾ ਕਲਾਕਾਰ : ਗੁਰਸ਼ਰਨ ਸਿੰਘ ਵੀ ਵਿਖਾਈ ਗਈ।
ਸੁਚੇਤਕ ਰੰਗਮੰਚ ਵੱਲੋਂ ਅਨੀਤਾ ਸ਼ਬਦੀਸ਼ ਦੀ ਨਿਰਦੇਸ਼ਨਾ ਹੇਠ ਤਿਆਰ ਪਹਿਲਾ ਦਸਤਾਵੇਜ਼ ਹੈ, ਜਿਸ ਨੇ ਗੁਰਸ਼ਰਨ ਸਿੰਘ ਨਾਟ-ਜਗਤ ਨਾਲ ਜੁੜਨ ਤੇ ਜੀਵਨ ਦੇ ਆਖਰੀ ਸਾਹ ਤੱਕ ਸਮਰਪਣ ਦੀ ਭਾਵਨਾ ਨੂੰ ਜ਼ਾਹਰ ਕੀਤਾ ਹੈ।
ਇਸ ਮੌਕੇ ਗੁਰਸ਼ਰਨ ਸਿੰਘ ਹੁਰਾਂ ਦੇ ਸ਼ਾਗਿਰਦ ਤੇ ਸਿਨੇਮਾ ਜਗਤ ਦੇ ਜਾਣੇ-ਪਛਾਣੇ ਅਦਾਕਾਰ ਹਰੀਸ਼ ਵਰਮਾ ਤੇ ਜਸਵਿੰਦਰ ਸਿੰਘ ਨੇ ਆਪਣੇ ਅਨੁਭਵ ਸਾਂਝੇ ਕੀਤੇ। ਸੁਚੇਤਕ ਸਕੂਲ ਆਫ਼ ਐਕਟਿੰਗ ਦੀਆਂ ਦੋ ਕਲਾਕਾਰ ਅਵਨੂਰ ਤੇ ਮੰਨਤ ਸ਼ਰਮਾ, ਜਿਨ੍ਹਾਂ ਦਾ ਫ਼ਿਲਮ ਜਗਤ ਵਿੱਚ ਦਾਖ਼ਲਾ ਹੋਇਆ ਹੈ, ਨੇ ਵੀ ਦਸਤਾਵੇਜ਼ੀ ਫ਼ਿਲਮ ਬਾਰੇ ਗੱਲਬਾਤ ਕੀਤੀ।
ਇਸ ਦਸਤਾਵੇਜ਼ੀ ਫ਼ਿਲਮ ਦੀ ਸਕ੍ਰਿਪਟ ਲਿਖਣ ਵਾਲ਼ੇ ਸ਼ਬਦੀਸ਼ ਨੇ ਦੱਸਿਆ ਕਿ ਇਸ ਦਾ ਫਿਲਮਾਂਕਣ ਕਰਨ ਵੇਲ਼ੇ ਸਾਡਾ ਇਸ ਖੇਤਰ ਦਾ ਗਿਆਨ ਬਹੁਤ ਸੀਮਤ ਸੀ, ਪਰ ਇੱਕ ਗੱਲ ਤੈਅ ਕਰ ਲਈ ਸੀ ਕਿ ਇਸ ਵਿੱਚ ਸਵਾਲ ਕਰਨ ਵਾਲ਼ੇ ਨਜ਼ਰ ਨਹੀਂ ਆਉਣਗੇ, ਤਾਂਕਿ ਅਸੀਂ ਆਪਣੇ ਨਾਇਕ ਦਾ ਪੱਖ ਉਨ੍ਹਾਂ ਦੀ ਜ਼ੁਬਾਨੀ ਹੀ ਸਾਹਮਣੇ ਰੱਖ ਸਕੀਏ। ਇਹ 2007 ਵਿੱਚ ਮੁਕੰਮਲ ਹੋਈ ਸੀ ਤੇ ਉਨ੍ਹਾਂ ਦੇ ਵਿਦਾ ਹੋਣ ਵੇਲ਼ੇ ਇਕਲੌਤੀ ਵੀਡੀਓ ਸੀ, ਜੋ ਵਿਖਾਈ ਜਾ ਸਕਦੀ ਸੀ। ਇਹ ਨੈਸ਼ਨਲ ਸਕੂਲ ਆਫ਼ ਡਰਾਮਾ ਵਿੱਚ ਵਿਖਾਈ ਗਈ ਤੇ ਸਾਡੇ ਕੋਲੋਂ ਆਗਿਆ ਲੈ ਕੇ ਦੂਰਦਰਸ਼ਨ ਨੇ ਵੀ ਇਸਤੇਮਾਲ ਕੀਤੀ।
ਨਿਰਦੇਸ਼ਕ ਅਨੀਤਾ ਸ਼ਬਦੀਸ਼ ਨੇ ਦੱਸਿਆ ਕਿ ਅਸੀਂ ਗੁਰਸ਼ਰਨ ਸਿੰਘ ਨਾਟ ਉਤਸਵ ਦਾ ਆਗਾਜ਼ 2004 ਵਿੱਚ ਕੀਤਾ ਸੀ। ਅਸੀਂ ਲੋਕਾਂ ਨਾਲ ਵਾਅਦਾ ਕੀਤਾ ਕਿ ਬਹੁਤ ਛੇਤੀ ਦਸਤਾਵੇਜ਼ੀ ਫ਼ਿਲਮ ਤਿਆਰ ਕਰਾਂਗੇ, ਪਰ ਇਸਦੇ ਜਾਣਕਾਰਾਂ ਦਾ ਦੱਸਿਆ ਬਜਟ ਵਿਤੋਂ ਬਾਹਰਾ ਸੀ। ਇਸੇ ਲਈ ਪਹਿਲਾ ਯਤਨ ਸਿਰਫ਼ ਤਸਵੀਰਾਂ ਦਾ ਦਸਤਾਵੇਜ਼ੀਕਰਨ ਸੀ, ਜਿਸਦੀ ਪੇਸ਼ਕਾਰੀ ਲਈ ਨਾਟਕਕਾਰ ਪਾਲੀ ਭੁਪਿੰਦਰ ਸਿੰਘ ਖ਼ਾਸ ਯੋਗਦਾਨ ਸੀ। ਇਸ ਵਿਚ ਆਵਾਜ਼ ਗੁਰਪ੍ਰੀਤ ਸਿੰਘ ਵੜੈਚ ਦੀ ਲਈ ਗਈ।
