ਇਰਾਨ ਇਜ਼ਰਾਈਲ ਜੰਗਬੰਦੀ ਦੀ ਉਲੰਘਣਾ ਕਾਰਨ ਬਾਜ਼ਾਰਾਂ ਨੇ ਵਾਧਾ ਗਵਾਇਆ; ਸੈਂਸੈਕਸ 150 ਅੰਕ ਚੜ੍ਹਿਆ

ਮੁੰਬਈ, 24 ਜੂਨ

ਇਕੁਇਟੀ ਬੈਂਚਮਾਰਕ ਸੈਂਸੈਕਸ ਅਤੇ ਨਿਫਟੀ ਨੇ ਮੰਗਲਵਾਰ ਨੂੰ ਦਿਨ ਦੌਰਾਨ ਹੋਏ ਤੇਜ਼ੀ ਨਾਲ ਹੋਏ ਵਾਧੇ ਨੂੰ ਗੁਆ ਦਿੱਤਾ ਹੈ। ਇਰਾਨ ਅਤੇ ਇਜ਼ਰਾਈਲ ਵਿਚਾਲੇ ਜੰਗਬੰਦੀ ਦੀ ਉਲੰਘਣਾ ਦੀਆਂ ਖ਼ਬਰਾਂ ਕਾਰਨ ਨਿਵੇਸ਼ਕਾਂ ਵਿੱਚ ਸਾਵਧਾਨੀ ਵਧਣ ਦੇ ਨਾਲ ਮੁਨਾਫ਼ਾ ਵਸੂਲੀ ਦੇ ਉਭਾਰ ਕਾਰਨ ਅਜਿਹਾ ਹੋਇਆ ਹੈ।

ਦਿਨ ਦੇ ਕਾਰੋਬਾਰ ਵਿੱਚ 1121.37 ਅੰਕ ਜਾਂ 1.36 ਫੀਸਦੀ ਵਧ ਕੇ 83,018.16 ’ਤੇ ਪਹੁੰਚਣ ਤੋਂ ਬਾਅਦ 30 ਸ਼ੇਅਰਾਂ ਵਾਲੇ ਸੈਂਸੈਕਸ ਨੇ ਬਾਅਦ ਵਿੱਚ ਆਪਣੇ ਜ਼ਿਆਦਾਤਰ ਲਾਭ ਗੁਆ ਦਿੱਤੇ। ਬੈਂਚਮਾਰਕ ਫਿਰ ਵੀ ਹਰੇ ਨਿਸ਼ਾਨ ਵਿੱਚ ਬੰਦ ਹੋਣ ਵਿੱਚ ਕਾਮਯਾਬ ਰਿਹਾ ਅਤੇ 158.32 ਅੰਕ ਜਾਂ 0.19 ਫੀਸਦੀ ਚੜ੍ਹ ਕੇ 82,055.11 ’ਤੇ ਬੰਦ ਹੋਇਆ। ਇਸੇ ਤਰ੍ਹਾਂ 50 ਸ਼ੇਅਰਾਂ ਵਾਲਾ ਨਿਫਟੀ 72.45 ਅੰਕ ਜਾਂ 0.29 ਫੀਸਦੀ ਚੜ੍ਹ ਕੇ 25,044.35 'ਤੇ ਬੰਦ ਹੋਇਆ। ਇਹ ਸੂਚਕਾਂਕ ਦਿਨ ਦੇ ਉੱਚੇ ਪੱਧਰ 25,317.70 ਤੋਂ ਹੇਠਾਂ ਡਿੱਗ ਗਿਆ।

ਨਿਵੇਸ਼ਕਾਂ ਦੀ ਭਾਵਨਾ ਅਤੇ ਬਾਜ਼ਾਰ ਦਾ ਦ੍ਰਿਸ਼

ਜੀਓਜੀਤ ਇਨਵੈਸਟਮੈਂਟਸ ਲਿਮਿਟੇਡ ਦੇ ਖੋਜ ਮੁਖੀ ਵਿਨੋਦ ਨਾਇਰ ਨੇ ਕਿਹਾ, ‘‘ਜੰਗਬੰਦੀ ਦੇ ਐਲਾਨ ਅਤੇ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਤੇਜ਼ੀ ਨਾਲ ਗਿਰਾਵਟ ਕਾਰਨ ਘਰੇਲੂ ਬਾਜ਼ਾਰ ਵਿੱਚ ਸ਼ੁਰੂਆਤੀ ਲਾਭ ਥੋੜ੍ਹੇ ਸਮੇਂ ਲਈ ਰਹੇ ਕਿਉਂਕਿ ਮੱਧ ਪੂਰਬ ਵਿੱਚ ਨਵੇਂ ਭੂ-ਰਾਜਨੀਤਿਕ ਤਣਾਅ ਨੇ ਨਿਵੇਸ਼ਕਾਂ ਦੀ ਭਾਵਨਾ ਨੂੰ ਚਿੰਤਤ ਕਰ ਦਿੱਤਾ।’’

ਕੀ ਰਹੀ ਸ਼ੇਅਰਾਂ ਦੀ ਸਥਿਤੀ ?

ਸੈਂਸੈਕਸ ਦੇ ਸ਼ੇਅਰਾਂ ਵਿੱਚੋਂ ਅਡਾਨੀ ਪੋਰਟਸ, ਟਾਟਾ ਸਟੀਲ, ਕੋਟਕ ਮਹਿੰਦਰਾ ਬੈਂਕ, ਅਲਟਰਾਟੈਕ ਸੀਮਿੰਟ, ਬਜਾਜ ਫਿਨਸਰਵ ਅਤੇ ਟਾਈਟਨ ਸਭ ਤੋਂ ਵੱਧ ਲਾਭ ਪ੍ਰਾਪਤ ਕਰਨ ਵਾਲਿਆਂ ਵਿੱਚੋਂ ਸਨ। ਇਸ ਦੇ ਉਲਟ ਪਾਵਰ ਗਰਿੱਡ, ਟ੍ਰੈਂਟ, ਐਨਟੀਪੀਸੀ, ਮਾਰੂਤੀ, ਐਚਸੀਐੱਲ ਟੈੱਕ ਅਤੇ ਭਾਰਤ ਇਲੈਕਟ੍ਰੋਨਿਕਸ ਘਾਟਾ ਸਹਿਣ ਵਾਲਿਆਂ ਵਿੱਚੋਂ ਸਨ।

ਗਲੋਬਲ ਬਾਜ਼ਾਰ ਅਤੇ ਤੇਲ ਦੀਆਂ ਕੀਮਤਾਂ

ਏਸ਼ੀਆਈ ਬਾਜ਼ਾਰਾਂ ਵਿੱਚ ਦੱਖਣੀ ਕੋਰੀਆ ਦਾ ਕੋਸਪੀ, ਜਾਪਾਨ ਦਾ ਨਿੱਕੀ 225 ਸੂਚਕਾਂਕ, ਸ਼ੰਘਾਈ ਦਾ SSE ਕੰਪੋਜ਼ਿਟ ਸੂਚਕਾਂਕ ਅਤੇ ਹਾਂਗਕਾਂਗ ਦਾ ਹੈਂਗ ਸੇਂਗ ਕਾਫ਼ੀ ਉੱਚੇ ਬੰਦ ਹੋਏ। ਯੂਰਪੀਅਨ ਬਾਜ਼ਾਰ ਮੱਧ-ਸੈਸ਼ਨ ਦੇ ਕਾਰੋਬਾਰ ਵਿੱਚ ਲਾਭ ਦੇ ਨਾਲ ਵਪਾਰ ਕਰ ਰਹੇ ਸਨ। ਗਲੋਬਲ ਤੇਲ ਬੈਂਚਮਾਰਕ ਬ੍ਰੈਂਟ ਕਰੂਡ 3.20 ਪ੍ਰਤੀਸ਼ਤ ਡਿੱਗ ਕੇ 69.13 ਡਾਲਰ ਪ੍ਰਤੀ ਬੈਰਲ ਹੋ ਗਿਆ।

ਉਧਰ ਕੱਚੇ ਤੇਲ ਦੀਆਂ ਕੀਮਤਾਂ ਡਿੱਗਣ ਕਾਰਨ ਰੁਪੱਈਆ ਅਮਰੀਕੀ ਡਾਲਰ ਦੇ ਮੁਕਾਬਲੇ 75 ਪੈਸੇ ਵਧ ਕੇ 86.03 ’ਤੇ ਬੰਦ ਹੋਇਆ। -ਪੀਟੀਆਈ