ਵਪਾਰਕ ਐੱਲਪੀਜੀ ਸਿਲੰਡਰ 15.50 ਰੁਪਏ ਮਹਿੰਗਾ ਹੋਇਆ
ਏਵੀਏਸ਼ਨ ਟਰਬਾਈਨ ਈਂਧਣ ਦੀ ਕੀਮਤ ਵਿਚ 3.3 ਫੀਸਦ ਦਾ ਵਾਧਾ; ਏਅਰਲਾਈਨਾਂ ਦਾ ਅਾਪਰੇਟਿੰਗ ਖਰਚਾ 40 ਫੀਸਦ ਵਧਣ ਦੇ ਅਾਸਾਰ
ਤੇਲ ਕੰਪਨੀਆਂ ਨੇ ਆਲਮੀ ਕੀਮਤਾਂ ’ਤੇ ਨਜ਼ਰਸਾਨੀ ਮਗਰੋਂ ਹਵਾਈ ਜਹਾਜ਼ਾਂ ਲਈ ਵਰਤੇ ਜਾਂਦੇ ਏਵੀਏਸ਼ਨ ਟਰਬਾਈਨ ਈਂਧਣ(ATF) ਦੀ ਕੀਮਤ ਵਿਚ ਤਿੰਨ ਫੀਸਦ ਜਦੋਂਕਿ ਵਪਾਰਕ ਐੱਲਪੀਜੀ ਦੇ ਭਾਅ ਵਿਚ ਪ੍ਰਤੀ ਸਿਲੰਡਰ 15.50 ਰੁਪਏ ਦਾ ਇਜ਼ਾਫ਼ਾ ਕੀਤਾ ਹੈ।
ਸਰਕਾਰੀ ਮਾਲਕੀ ਵਾਲੇ ਈਂਧਣ ਪ੍ਰਚੂਨ ਵਿਕਰੇਤਾਵਾਂ ਅਨੁਸਾਰ, ਕੌਮੀ ਰਾਜਧਾਨੀ ਵਿੱਚ ਜੈੱਟ ਫਿਊਲ (ATF) ਦੀ ਕੀਮਤ 3,052.5 ਰੁਪਏ ਪ੍ਰਤੀ ਕਿਲੋਲਿਟਰ, ਜਾਂ 3.3 ਫੀਸਦ ਦੇ ਵਾਧੇ ਨਾਲ 93,766.02 ਰੁਪਏ ਪ੍ਰਤੀ ਕਿਲੋਲਿਟਰ ਹੋ ਗਈ। ਇਹ ਵਾਧਾ ਪਿਛਲੇ ਮਹੀਨੇ 1.4 ਫੀਸਦ (1,308.41 ਰੁਪਏ ਪ੍ਰਤੀ ਕਿਲੋਲਿਟਰ) ਦੀ ਕਟੌਤੀ ਤੋਂ ਬਾਅਦ ਆਇਆ ਹੈ। ਕੀਮਤਾਂ ਵਿਚ ਵਾਧੇ ਨਾਲ ਕਮਰਸ਼ਲ ਏਅਰਲਾਈਨਾਂ ਦੀ ਆਪਰੇਟਿੰਗ ਲਾਗਤ ਕਰੀਬ 40 ਫੀਸਦ ਵਧ ਜਾਵੇਗੀ।
ਇਸ ਦੇ ਨਾਲ ਹੀ ਤੇਲ ਕੰਪਨੀਆਂ ਨੇ ਹੋਟਲਾਂ ਅਤੇ ਰੈਸਟੋਰੈਂਟਾਂ ਵਿੱਚ ਵਰਤੀ ਜਾਣ ਵਾਲੀ ਵਪਾਰਕ ਐੱਲਪੀਜੀ ਦੀ ਕੀਮਤ ਵਿੱਚ 15.50 ਰੁਪਏ ਪ੍ਰਤੀ ਸਿਲੰਡਰ ਦਾ ਵਾਧਾ ਕੀਤਾ ਹੈ। 19 ਕਿਲੋਗ੍ਰਾਮ ਦੇ ਵਪਾਰਕ ਐਲਪੀਜੀ ਸਿਲੰਡਰ ਦੀ ਕੀਮਤ ਹੁਣ ਕੌਮੀ ਰਾਜਧਾਨੀ ਵਿੱਚ 1,595.50 ਰੁਪਏ ਹੈ। ਇਹ ਵਾਧਾ ਛੇ-ਮਹੀਨਿਆਂ ਦੀ ਕਟੌਤੀ ਤੋਂ ਬਾਅਦ ਹੋਇਆ ਹੈ। ਪਿਛਲੇ ਮਹੀਨੇ ਪਹਿਲੀ ਸਤੰਬਰ ਨੂੰ ਵਪਾਰਕ ਐੱਲਪੀਜੀ ਸਿਲੰਡਰ 51.50 ਰੁਪਏ ਸਸਤਾ ਹੋਇਆ ਸੀ।
