ਹਾਕੀ: ਭਾਰਤ ਨੇ ਅਰਜਨਟੀਨਾ ਨੂੰ 1-1 ਨਾਲ ਡਰਾਅ ’ਤੇ ਰੋਕਿਆ
ਪੈਰਿਸ, 29 ਜੁਲਾਈ
ਆਖਰੀ ਸੀਟੀ ਵੱਜਣ ਤੋਂ ਇੱਕ ਮਿੰਟ ਪਹਿਲਾਂ ਪੈਨਲਟੀ ਕਾਰਨਰ ’ਤੇ ਕਪਤਾਨ ਹਰਮਨਪ੍ਰੀਤ ਸਿੰਘ ਦੇ ਗੋਲ ਸਦਕਾ ਭਾਰਤ ਨੇ ਅੱਜ ਪੈਰਿਸ ਓਲੰਪਿਕ ਪੁਰਸ਼ ਹਾਕੀ ਮੁਕਾਬਲੇ ਦੇ ਪੂਲ-ਬੀ ਮੈਚ ਵਿੱਚ ਰੀਓ ਓਲੰਪਿਕ ਚੈਂਪੀਅਨ ਅਰਜਨਟੀਨਾ ਨੂੰ 1-1 ਨਾਲ ਡਰਾਅ ’ਤੇ ਰੋਕ ਦਿੱਤਾ। ਅਰਜਨੀਟਾ ਵੱਲੋਂ ਲੁਕਾਸ ਮਾਰਟੀਨੇਜ਼ ਅਤੇ ਭਾਰਤ ਵੱਲੋਂ ਹਰਮਨਪ੍ਰੀਤ ਨੇ ਗੋਲ ਕੀਤਾ। ਭਾਰਤ ਨੂੰ ਇਸ ਮੈਚ ਵਿੱਚ ਮਿਲੇ ਦਸਵੇਂ ਪੈਨਲਟੀ ਕਾਰਨਰ ’ਤੇ ਪਹਿਲਾ ਗੋਲ ਆਇਆ।
ਟੋਕੀਓ ਓਲੰਪਿਕ ਵਿੱਚ ਕਾਂਸੇ ਦਾ ਤਗ਼ਮਾ ਜੇਤੂ ਭਾਰਤੀ ਟੀਮ ਪੂਰੇ ਮੈਚ ਦੌਰਾਨ ਲੈਅ ਵਿੱਚ ਨਜ਼ਰ ਨਹੀਂ ਆਈ। ਟੀਮ ਪੈਨਲਟੀ ਕਾਰਨਰਜ਼ ’ਤੇ ਗੋਲ ਨਹੀਂ ਕਰ ਸਕੀ। ਮਨਪ੍ਰੀਤ ਸਿੰਘ ਅਤੇ ਹਾਰਦਿਕ ਸਿੰਘ ਵਰਗੇ ਤਜਰਬੇਕਾਰ ਮਿਡਫੀਲਡਰ ਮੈਚ ਵਿੱਚ ਕਿਤੇ ਨਜ਼ਰ ਨਹੀਂ ਆਏ। ਇਸ ਤੋਂ ਇਲਾਵਾ ਅਹਿਮ ਮੌਕਿਆਂ ’ਤੇ ਫਾਰਵਰਡ ਲਾਈਨ ਨੇ ਵੀ ਕਈ ਗਲਤੀਆਂ ਕੀਤੀਆਂ ਅਤੇ ਮੌਕੇ ਗੁਆਏ।
ਅਰਜਨਟੀਨਾ ਨੇ 22ਵੇਂ ਮਿੰਟ ਵਿੱਚ ਲੁਕਾਸ ਮਾਰਟੀਨੇਜ਼ ਦੇ ਗੋਲ ਨਾਲ ਲੀਡ ਲੈ ਲਈ ਅਤੇ ਇਸ ਤੋਂ ਬਾਅਦ ਭਾਰਤੀ ਟੀਮ ਬਰਾਬਰੀ ਦੇ ਗੋਲ ਲਈ ਤਰਸਦੀ ਰਹੀ। ਭਾਰਤੀਆਂ ਨੇ ਸਰਕਲ ਦੇ ਅੰਦਰ ਕਈ ਹਮਲੇ ਕੀਤੇ ਪਰ ਅਰਜਨਟੀਨਾ ਦੇ ਗੋਲਕੀਪਰ ਨੇ ਸਾਰੇ ਭਾਰਤੀ ਹਮਲੇ ਨਾਕਾਮ ਕਰ ਦਿੱਤੇ। ਅਜਿਹਾ ਲੱਗ ਰਿਹਾ ਸੀ ਕਿ ਅਰਜਨਟੀਨਾ ਟੋਕੀਓ ਓਲੰਪਿਕ ਦੇ ਪੂਲ ਗੇੜ ਵਿੱਚ ਭਾਰਤ ਤੋਂ 1-3 ਨਾਲ ਮਿਲੀ ਹਾਰ ਦਾ ਬਦਲਾ ਲੈ ਲਵੇਗਾ ਪਰ ਕਿਸਮਤ ਨੇ ਭਾਰਤ ਦਾ ਸਾਥ ਦਿੱਤਾ ਅਤੇ 59ਵੇਂ ਮਿੰਟ ਵਿੱਚ ਅਹਿਮ ਪੈਨਲਟੀ ਕਾਰਨਰ ਮਿਲਿਆ। ਭਾਰਤੀ ਟੀਮ ਪੈਨਲਟੀ ਸਟ੍ਰੋਕ ਦੀ ਮੰਗ ਕਰ ਰਹੀ ਸੀ ਪਰ ਰੈਫਰਲ ਤੋਂ ਬਾਅਦ ਕਾਰਨਰ ਦਿੱਤਾ ਗਿਆ। ਹਰਮਨਪ੍ਰੀਤ ਨੇ ਇਸ ’ਤੇ ਗੋਲ ਕਰਕੇ ਸਟੇਡੀਅਮ ਵਿੱਚ ਮੌਜੂਦ ਭਾਰਤੀ ਦਰਸ਼ਕਾਂ ਨੂੰ ਨਿਰਾਸ਼ ਪਰਤਣ ਤੋਂ ਬਚਾਅ ਲਿਆ। -ਪੀਟੀਆਈ
