ਟੈਕਸ ਲਾਉਣ ਸਬੰਧੀ ਅਮਰੀਕਾ ਦੀ ਅਪੀਲ ਆਰਥਿਕ ਦਬਾਅ ਬਣਾਉਣ ਦੀ ਕੋਸ਼ਿਸ਼: ਚੀਨ

ਚੀਨ ਨੇ ਅਮਰੀਕਾ ਵੱਲੋਂ ਜੀ-7 ਅਤੇ ਨਾਟੋ ਦੇਸ਼ਾਂ ਨੂੰ ਆਪਣੇ (ਚੀਨ) ਉੱਪਰ ਤੇ ਰੂਸ ਤੋਂ ਤੇਲ ਖਰੀਦ ਰਹੇ ਹੋਰ ਦੇਸ਼ਾਂ ’ਤੇ ਟੈਕਸ ਲਾਉਣ ਦੀ ਅਪੀਲ ਨੂੰ ਇਕਪਾਸੜ ਢੰਗ ਨਾਲ ‘ਧੌਂਸ ਜਮਾਉਣ’ ਅਤੇ ‘ਆਰਥਿਕ ਦਬਾਅ’ ਬਣਾਉਣ ਦੀ ਕਾਰਵਾਈ ਕਰਾਰ ਦਿੱਤਾ ਤੇ ਚਿਤਾਵਨੀ ਦਿੱਤੀ ਕਿ ਜੇ ਅਮਰੀਕਾ ਦੀ ਇਸ ਅਪੀਲ ’ਤੇ ਅਮਲ ਕੀਤਾ ਗਿਆ ਤਾਂ ਉਹ ਜਵਾਬੀ ਕਦਮ ਚੁੱਕੇਗਾ। ਚੀਨ ਦੀ ਇਹ ਪ੍ਰਤੀਕਿਰਿਆ ਅਜਿਹੇ ਸਮੇਂ ਆਈ ਹੈ ਜਦੋਂ ਅੱਜ ਸਪੇਨ ’ਚ ਅਮਰੀਕਾ ਤੇ ਚੀਨ ਦੇ ਵਫ਼ਦ ਆਰਥਿਕ ਤੇ ਵਪਾਰਕ ਮੁੱਦਿਆਂ ’ਤੇ ਦੂਜੀ ਵਾਰ ਮੀਟਿੰਗ ਕਰ ਰਹੇ ਹਨ।

ਜੀ-7 ਦੁਨੀਆ ਦੀਆਂ ਸੱਤ ਅਹਿਮ ਵਿਕਸਿਤ ਤੇ ਉਦਯੋਗਿਕ ਸ਼ਕਤੀਆਂ ਦਾ ਇੱਕ ਸਮੂਹ ਹੈ ਜਿਸ ’ਚ ਅਮਰੀਕਾ, ਕੈਨੇਡਾ, ਬਰਤਾਨੀਆ, ਫਰਾਂਸ, ਜਰਮਨੀ, ਇਟਲੀ ਤੇ ਜਪਾਨ ਸ਼ਾਮਲ ਹਨ। ਉੱਤਰੀ ਅਟਲਾਂਟਿਕ ਸੰਧੀ ਸੰਗਠਨ (ਨਾਟੋ) ਫੌਜੀ ਗੱਠਜੋੜ ਹੈ ਜਿਸ ’ਚ ਪ੍ਰਮੁੱਖ ਪੱਛਮੀ ਦੇਸ਼ਾਂ ਨੇ ਮਿਲ ਕੇ ਸੁਰੱਖਿਆ ਯਕੀਨੀ ਬਣਾਉਣ ਲਈ ਸਮਝੌਤਾ ਕੀਤਾ ਹੈ ਅਤੇ ਇਸ ’ਚ ਅਮਰੀਕਾ, ਕੈਨੇਡਾ, ਬਰਤਾਨੀਆ, ਫਰਾਂਸ, ਜਰਮਨੀ, ਇਟਲੀ ਸਮੇਤ 30 ਮੈਂਬਰ ਮੁਲਕ ਸ਼ਾਮਲ ਹਨ। ਇੱਕ ਨਿਯਮਿਤ ਪ੍ਰੈੱਸ ਵਾਰਤਾ ’ਚ ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਲਿਨ ਜਿਆਨ ਨੇ ਕਿਹਾ ਕਿ ਰੂਸ ਸਮੇਤ ਦੁਨੀਆ ਭਰ ਦੇ ਦੇਸ਼ਾਂ ਨਾਲ ਚੀਨ ਦਾ ਸਾਧਾਰਨ ਆਰਥਿਕ ਤੇ ਊਰਜਾ ਸਹਿਯੋਗ ਪੂਰੀ ਤਰ੍ਹਾਂ ਵੈਧ ਤੇ ਕਾਨੂੰਨ ਅਨੁਸਾਰ ਹੈ ਅਤੇ ਇਸ ’ਚ ਕੁਝ ਵੀ ਗਲਤ ਨਹੀਂ ਹੈ। ਅਮਰੀਕਾ ਦੀ ਅਪੀਲ ਬਾਰੇ ਉਨ੍ਹਾਂ ਕਿਹਾ, ‘ਇਹ ਅਮਰੀਕਾ ਦਾ ਆਰਥਿਕ ਦਬਾਅ ਬਣਾਉਣ ਤੇ ਇੱਕਪਾਸੜ ਢੰਗ ਨਾਲ ਧੌਂਸ ਦਿਖਾਉਣ ਵਾਲਾ ਕਦਮ ਹੈ ਜੋ ਕੌਮਾਂਤਰੀ ਵਪਾਰ ਨਿਯਮਾਂ ਨੂੰ ਕਮਜ਼ੋਰ

ਕਰਦਾ ਹੈ।’