ਨੇਤਨਯਾਹੂ ਲਈ ਟਰੰਪ ਦਾ ਝਲਕਿਆ ਪਿਆਰ; ਹਰਗੋਜ਼ ਨੂੰ ਨੇਤਨਯਾਹੂ ਨੂੰ ਮੁਆਫ਼ ਕਰਨ ਲਈ ਕਿਹਾ

ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਸੰਬੋਧਨ ਦੌਰਾਨ ਇਜ਼ਰਾਈਲ ਦੇ ਰਾਸ਼ਟਰਪਤੀ ਇਸਹਾਕ ਹਰਜ਼ੋਗ ਨੂੰ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੂੰ ਮੁਆਫ਼ ਕਰਨ ਲਈ ਕਿਹਾ।

ਟਰੰਪ ਨੇਤਨਯਾਹੂ ਵੱਲ ਇਸ਼ਾਰਾ ਕਰਦੇ ਹੋਏ ਕਿਹਾ, “ਮੇਰੇ ਕੋਲ ਇੱਕ ਵਿਚਾਰ ਹੈ ਸ਼੍ਰੀਮਾਨ ਰਾਸ਼ਟਰਪਤੀ: ਤੁਸੀਂ ਉਸ ਨੂੰ ਮੁਆਫ਼ ਕਿਉਂ ਨਹੀਂ ਦਿੰਦੇ?”

ਇਜ਼ਰਾਈਲੀ ਪ੍ਰਧਾਨ ਮੰਤਰੀ ’ਤੇ ਸਾਲ 2019 ਵਿੱਚ ਰਿਸ਼ਵਤਖੋਰੀ, ਧੋਖਾਧੜੀ ਅਤੇ ਵਿਸ਼ਵਾਸਘਾਤ ਦੇ ਦੋਸ਼ ਲਾਏ ਗਏ ਸਨ। ਹਾਲਾਂਕਿ ਉਹ ਆਪਣੇ ਉੱਤੇ ਲੱਗੇ ਇਨ੍ਹਾਂ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕਰਦੇ ਹਨ।

ਜ਼ਿਕਰਯੋਗ ਹੈ ਕਿ ਨਿਆਂ ਮੰਤਰਾਲੇ ਨੇ ਸਾਲਾਂ ਦੀ ਜਾਂਚ ਤੋਂ ਬਾਅਦ 2019 ਵਿੱਚ ਤਿੰਨ ਮਾਮਲਿਆਂ ਵਿੱਚ ਦੋਸ਼ਾਂ ਦਾ ਐਲਾਨ ਕੀਤਾ। ਨੇਤਨਯਾਹੂ ਅਤੇ ਉਨ੍ਹਾਂ ਦੀ ਪਤਨੀ ਸਾਰਾ ਨੇ ਜਨਤਾ ਦੇ ਖਰਚੇ ’ਤੇ ਮਹਿੰਗੀ ਜੀਵਨ ਸ਼ੈਲੀ ਦਾ ਆਨੰਦ ਮਾਣਨ ਲਈ ਇਜ਼ਰਾਈਲ ਵਿੱਚ ਨਾਮਣਾ ਖੱਟਿਆ ਹੈ।

ਸਰਕਾਰੀ ਵਕੀਲਾਂ ਦਾ ਦੋਸ਼ ਹੈ ਕਿ ਉਸਨੇ ਸਕਾਰਾਤਮਕ ਕਵਰੇਜ ਲਈ ਮੀਡੀਆ ਕਾਰਜਕਾਰੀਆਂ ਨਾਲ ਰੈਗੂਲੇਟਰੀ ਪੱਖਾਂ ਦਾ ਸੌਦਾ ਕੀਤਾ ਅਤੇ ਇੱਕ ਅਰਬਪਤੀ ਤੋਂ ਮਹਿੰਗੇ ਤੋਹਫ਼ੇ ਸਵੀਕਾਰ ਕੀਤੇ। ਮੁਕੱਦਮੇ ਵਿੱਚ ਲਗਭਗ 140 ਗਵਾਹਾਂ ਨੇ ਗਵਾਹੀ ਦਿੱਤੀ ਹੈ, ਜਿਨ੍ਹਾਂ ਵਿੱਚ ਨੇਤਨਯਾਹੂ ਦੇ ਕੁਝ ਨਜ਼ਦੀਕੀ ਸਾਬਕਾ ਸਹਿਯੋਗੀ ਵੀ ਸ਼ਾਮਲ ਹਨ।

ਜਮ੍ਹਾਂ ਕਰਵਾਏ ਗਏ ਸਬੂਤਾਂ ਵਿੱਚ ਰਿਕਾਰਡਿੰਗਾਂ, ਟੈਕਸਟ ਸੁਨੇਹੇ ਅਤੇ ਪੁਲੀਸ ਦਸਤਾਵੇਜ਼ ਸ਼ਾਮਲ ਹਨ। ਖਾਸ ਤੌਰ ’ਤੇ ਹਾਲੀਵੁੱਡ ਨਿਰਮਾਤਾ ਅਰਨਨ ਮਿਲਚਨ ਸਮੇਤ ਮੁੱਖ ਹਸਤੀਆਂ ਦੀ ਗਵਾਹੀ ਨੇ ਨੇਤਨਯਾਹੂ ਅਤੇ ਉਨ੍ਹਾਂ ਦੀ ਪਤਨੀ ਨੂੰ ਕਥਿਤ ਤੌਰ ’ਤੇ ਦਿੱਤੇ ਗਏ ਬੇਮਿਸਾਲ ਤੋਹਫ਼ਿਆਂ ਨੂੰ ਸਾਹਮਣੇ ਲਿਆਂਦਾ ਹੈ, ਜਿਸ ਵਿੱਚ ਸ਼ੈਂਪੇਨ ਅਤੇ ਸਿਗਾਰ ਸ਼ਾਮਲ ਹਨ।

ਉੱਧਰ ਸੁਰੱਖਿਆ ਦੇ ਆਧਾਰ ’ਤੇ ਜੂਨ ਵਿੱਚ ਮੁਕੱਦਮੇ ਨੂੰ ਮੁਲਤਵੀ ਕਰ ਦਿੱਤਾ ਗਿਆ ਸੀ।