ਹੁਨਰਮੰਦ ਪਰਵਾਸੀਆਂ ਦਾ ਸਵਾਗਤ: ਟਰੰਪ

ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਨੇ ਕਿਹਾ ਕਿ ਉਹ ਅਜਿਹੇ ਹੁਨਰਮੰਦ ਪਰਵਾਸੀਆਂ ਦਾ ਮੁਲਕ ’ਚ ਸਵਾਗਤ ਕਰਨਗੇ ਜੋ ਅਮਰੀਕੀ ਵਰਕਰਾਂ ਨੂੰ ਚਿਪ ਅਤੇ ਮਿਜ਼ਾਈਲਾਂ ਜਿਹੇ ਉਤਪਾਦ ਬਣਾਉਣ ਦੀ ਤਕਨੀਕ ਸਿਖਾਉਣਗੇ। ਉਨ੍ਹਾਂ ਇਹ ਵੀ ਮੰਨਿਆ ਕਿ ਇਸ ਮੁੱਦੇ ’ਤੇ ਉਨ੍ਹਾਂ ਨੂੰ ਆਪਣੇ ਸਮਰਥਕਾਂ ਤੋਂ ਥੋੜ੍ਹੀ ਆਲੋਚਨਾ ਝੱਲਣੀ ਪੈ ਸਕਦੀ ਹੈ ਜੋ ਸਖ਼ਤ ਇਮੀਗਰੇਸ਼ਨ ਪਾਬੰਦੀਆਂ ਦੀ ਹਮਾਇਤ ਕਰਦੇ ਹਨ। ਉਨ੍ਹਾਂ ਅਮਰੀਕਾ-ਸਾਊਦੀ ਅਰਬ ਨਿਵੇਸ਼ ਫੋਰਮ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਅਮਰੀਕਾ ’ਚ ਵੱਡੀ ਗਿਣਤੀ ਪਲਾਂਟ ਬਣ ਰਹੇ ਹਨ ਜਿਨ੍ਹਾਂ ’ਚੋਂ ਕਈ ਬੇਹੱਦ ਗੁੰਝਲਦਾਰ ਕੰਮਾਂ ਨਾਲ ਜੁੜੇ ਹਨ ਅਤੇ ਉਹ ਦੇਸ਼ ਦੀ ਆਰਥਿਕ ਵਿਕਾਸ ਦਰ ’ਚ ਵੱਡਾ ਯੋਗਦਾਨ ਦੇਣਗੇ।

ਸ੍ਰੀ ਟਰੰਪ ਨੇ ਸਾਊਦੀ ਅਰਬ ਦੇ ਸ਼ਹਿਜ਼ਾਦੇ ਮੁਹੰਮਦ ਬਿਨ ਸਲਮਾਨ ਦੀ ਹਾਜ਼ਰੀ ’ਚ ਕਿਹਾ, ‘‘ਕੰਪਨੀਆਂ ਨੂੰ ਆਪਣੇ ਲੋਕ ਲਿਆਉਣੇ ਪੈਣਗੇ ਤਾਂ ਜੋ ਕਾਰਖਾਨੇ ਸ਼ੁਰੂ ਹੋ ਸਕਣ। ਅਸੀਂ ਚਾਹੁੰਦੇ ਹਾਂ ਕਿ ਉਹ ਆਉਣ ਅਤੇ ਸਾਡੇ ਲੋਕਾਂ ਨੂੰ ਕੰਪਿਊਟਰ ਚਿਪ ਅਤੇ ਹੋਰ ਉਤਪਾਦ ਬਣਾਉਣਾ ਸਿਖਾਉਣ। ਉਨ੍ਹਾਂ ਨੂੰ ਹਜ਼ਾਰਾਂ ਲੋਕ ਲਿਆਉਣੇ ਪੈਣਗੇ ਅਤੇ ਮੈਂ ਉਨ੍ਹਾਂ ਦਾ ਸਵਾਗਤ ਕਰਾਂਗਾ।’’ ਅਮਰੀਕੀ ਕੰਪਨੀਆਂ ਐੱਚ-1ਬੀ ਅਤੇ ਐੱਚ1 ਵੀਜ਼ਾ ਦੀ ਵਰਤੋਂ ਕਰਕੇ ਵਿਦੇਸ਼ੀ ਉੱਚ ਹੁਨਰਮੰਦ ਵਰਕਰਾਂ ਨੂੰ ਨਿਯੁਕਤ ਕਰਦੀਆਂ ਹਨ। ਟਰੰਪ ਦੇ ਸਮਰਥਕਾਂ ਨੇ ਐੱਚ-1ਬੀ ਵੀਜ਼ਾ ਪ੍ਰਣਾਲੀ ’ਤੇ ਸਖ਼ਤੀ ਵਧਾਉਣ ਦੀ ਮੰਗ ਕਰਦਿਆਂ ਦਾਅਵਾ ਕੀਤਾ ਹੈ ਕਿ ਅਮਰੀਕੀ ਨੌਜਵਾਨ ਬੇਰੁਜ਼ਗਾਰ ਹੋ ਰਹੇ ਹਨ।