Lost voices: ਗ਼ੈਰ-ਕੁਦਰਤੀ ਮੌਤ ਕਰਕੇ ਭਰ ਜਵਾਨੀ ’ਚ ਜਹਾਨੋਂ ਤੁਰ ਗਏ ਗਾਇਕ

ਰਾਜਵੀਰ ਜਵੰਦਾ(35) ਦੀ ਮੌਤ ਨਾਲ ਇਕ ਹੋਰ ਪੰਜਾਬੀ ਗਾਇਕ ਜੋ ਆਪਣੇ ਕਰੀਅਰ ਦੀ ਸਿਖਰ ’ਤੇ ਸੀ, ਗੈਰ-ਕੁਦਰਤੀ ਮੌਤ ਕਰਕੇ ਜਹਾਨੋਂ ਤੁਰ ਗਿਆ। ਜਵੰਦਾ

27 ਸਤੰਬਰ ਨੂੰ ਹਿਮਾਚਲ ਪ੍ਰਦੇਸ਼ ਦੇ ਬੱਦੀ ਨੇੜੇ ਮੋਟਰਸਾਈਕਲ ਹਾਦਸੇ ਵਿਚ ਗੰਭੀਰ ਜ਼ਖ਼ਮੀ ਹੋ ਗਿਆ ਸੀ। ਉਹ 11 ਦਿਨਾਂ ਜ਼ਿੰਦਗੀ ਤੇ ਮੌਤ ਦੀ ਲੜਾਈ ਲੜਦਾ ਵੈਂਟੀਲੇਟਰ ’ਤੇ ਸੰਘਰਸ਼ ਕਰਦਾ ਰਿਹਾ। ਗਾਇਕ ਦੇ ਸਿਰ ਅਤੇ ਰੀੜ੍ਹ ਦੀ ਹੱਡੀ ਦੀਆਂ ਗੰਭੀਰ ਸੱਟਾਂ ਘਾਤਕ ਸਾਬਤ ਹੋਈਆਂ।

ਸਾਲ 1990 ਵਿਚ ਲੁਧਿਆਣਾ ਦੇ ਜਗਰਾਓਂ ਨੇੜੇ ਪਿੰਡ ਪੋਨਾ ਵਿੱਚ ਜਨਮੇ ਰਾਜਵੀਰ ਨੇ ਪੰਜਾਬ ਪੁਲੀਸ ਵਿੱਚ ਇੱਕ ਕਾਂਸਟੇਬਲ ਵਜੋਂ ਸ਼ੁਰੂਆਤ ਕੀਤੀ ਅਤੇ ਫਿਰ ਸੰਗੀਤ ਨੂੰ ਕਰੀਅਰ ਵਜੋਂ ਚੁਣਿਆ। ਉਸ ਨੇ 2014 ਵਿੱਚ ਐਲਬਮ ‘ਮੁੰਡਾ ਲਾਈਕ ਮੀ’ ਨਾਲ ਸ਼ੁਰੂਆਤ ਕੀਤੀ। ਗਾਇਕ ‘ਸਰਦਾਰੀ’, ‘ਤੂੰ ਦਿਸ ਪੈਂਦਾ’, ‘ਕਾਲੀ ਕੈਮਾਰੋ’, ‘ਸ਼ਾਨਦਾਰ’ ਅਤੇ ‘ਧੀਆਂ’ ਵਰਗੇ ਹਿੱਟ ਗੀਤਾਂ ਵਿੱਚ ਆਧੁਨਿਕ ਬੀਟਾਂ ਦੇ ਨਾਲ ਲੋਕ ਧੁਨਾਂ ਨੂੰ ਮਿਲਾਉਣ ਲਈ ਮਕਬੂਲ ਸੀ। ਉਸ ਦੇ ਯੂਟਿਊਬ ਚੈਨਲ ਨੂੰ 424 ਮਿਲੀਅਨ ਤੋਂ ਵੱਧ ਵਿਊਜ਼ ਮਿਲੇ, ਜਿਸ ਨਾਲ ਉਹ ਵਿਆਹ ਸ਼ਾਦੀਆਂ ਅਤੇ ਪਾਰਟੀਆਂ ਲਈ ਪਸੰਦੀਦਾ ਗਾਇਕ ਬਣ ਗਿਆ। ਜਵੰਦਾ ਦੀ ਆਪਣੇ BMW ਬਾਈਕ ’ਤੇ ਸ਼ਿਮਲਾ ਜਾਂਦਿਆਂ ਬੱਦੀ ਨੇੜੇ ਅਵਾਰਾ ਪਸ਼ੂਆਂ ਨਾਲ ਟੱਕਰ ਹੋ ਗਈ ਸੀ।

ਦਿਲਜਾਨ

31 ਮਾਰਚ, 1984 ਨੂੰ ਪਟਿਆਲਾ ਵਿੱਚ ਇੱਕ ਸੰਗੀਤਕ ਪਰਿਵਾਰ ਵਿੱਚ ਜਨਮੇ ਪਰਮਾਰ ਦਿਲਜਾਨ ਸਿੰਘ ਨੂੰ ਉਸਤਾਦ ਪੂਰਨ ਸ਼ਾਹਕੋਟੀ ਤੋਂ ਸੂਫ਼ੀ-ਕਲਾਸੀਕਲ ਸੰਗੀਤ ਦੀ ਸਿਖਲਾਈ ਮਿਲੀ। ਉਹ ‘ਆਵਾਜ਼ ਪੰਜਾਬ ਦੀ’ ਵਰਗੇ ਸ਼ੋਅ ਨਾਲ ਚਮਕਿਆ ਅਤੇ 2012 ਦੇ ਭਾਰਤ-ਪਾਕਿਸਤਾਨ ਮੁਕਾਬਲੇ ਸੁਰ ਖੇਤਰ ਵਿੱਚ ਪਹਿਲਾ ਰਨਰਅੱਪ ਰਿਹਾ। ਦਿਲਜਾਨ ਨੇ ‘ਅੱਧਾ ਪਿੰਡ’, ‘ਯਾਰਾਂ ਦੀ ਗੱਲ’, ‘ਪਹਿਲਾ ਪਿਆਰ’, ‘ਸਾਈਂ ਕੇ ਦੀਵਾਨੇ’, ਅਤੇ ‘ਤੇਰੇ ਵਰਗੇ 2’ ਜਿਹੇ ਹਿੱਟ ਗੀਤ ਦਿੱਤੇ। ਉਸ ਨੇ ਬਾਬਾ ਨਾਨਕ ਵਰਗੇ ਭਗਤੀ ਟਰੈਕ ਵੀ ਗਾਏ। ਦਿਲਜਾਨ ਦੀ 31 ਸਾਲ ਦੀ ਉਮਰ ਵਿੱਚ 30 ਮਾਰਚ, 2021 ਨੂੰ ਜੰਡਿਆਲਾ ਗੁਰੂ, ਅੰਮ੍ਰਿਤਸਰ ਨੇੜੇ ਇੱਕ ਕਾਰ ਹਾਦਸੇ ਵਿੱਚ ਮੌਤ ਹੋ ਗਈ। ਅੰਮ੍ਰਿਤਸਰ ਤੋਂ ਕਰਤਾਰਪੁਰ ਜਾਂਦਿਆਂ ਉਸ ਦੀ ਕਾਰ ਤੜਕੇ ਢਾਈ ਵਜੇ ਇੱਕ ਖੜ੍ਹੇ ਟਰੱਕ ਨਾਲ ਟਕਰਾ ਗਈ। ਉਸ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਉਸ ਦੀ ਪਤਨੀ ਤੇ ਧੀ ਕੈਨੇਡਾ ਵਿੱਚ ਹਨ। ਮਾਸਟਰ ਸਲੀਮ ਅਤੇ ਰੋਸ਼ਨ ਪ੍ਰਿੰਸ ਨੇ ਦਿਲਜਾਨ ਨੂੰ ਸ਼ਰਧਾਂਜਲੀਆਂ ਦਿੱਤੀਆਂ। ਤਤਕਾਲੀ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਦਿਲਜਾਨ ਦੀ ਮੌਤ ਨਾਲ ਸੰਗੀਤ ਇੰਡਸਟਰੀ ਨੇ ਨੌਜਵਾਨ ਪ੍ਰਤਿਭਾ ਗੁਆ ਲਈ ਹੈ।

ਇਹ ਵੀ ਪੜ੍ਹੋ: Rajvir jawanda: ਆਪਣੀ ਸੁਰੀਲੀ ਆਵਾਜ਼ ਦੇ ਨਾਲ ਪੰਜਾਬੀਆਂ ਦੇ ਮਨਾਂ ਵਿੱਚ ਵਸਦਾ ਰਹੇਗਾ ਰਾਜਵੀਰ ਜਵੰਦਾ

ਇਹ ਵੀ ਪੜ੍ਹੋ:ਪੰਜਾਬੀ ਗਾਇਕ ਰਾਜਵੀਰ ਜਵੰਦਾ ਦਾ ਦੇਹਾਂਤ, ਸਵੇਰੇ 10:55 ਵਜੇ ਆਖਰੀ ਸਾਹ ਲਏ

ਇਹ ਵੀ ਪੜ੍ਹੋ: Diljit Dosanjh ਨੇ Rajvir Jawanda ਦੀ ਸਿਹਤਯਾਬੀ ਲਈ ਅਰਦਾਸ ਕੀਤੀ

ਇਸ਼ਮੀਤ ਸਿੰਘ

2 ਸਤੰਬਰ, 1989 ਨੂੰ ਲੁਧਿਆਣਾ ਵਿੱਚ ਜਨਮਿਆ ਇਸ਼ਮੀਤ ਸਿੰਘ ਸ਼ਰਮੀਲਾ ਤੇ ਸੰਜਮੀ ਸੁਭਾਅ ਵਾਲਾ ਮੁੰਡਾ ਸੀ, ਜੋ ਸ਼ਾਨ ਅਤੇ ਏ.ਆਰ. ਰਹਿਮਾਨ ਨੂੰ ਆਪਣਾ ਆਦਰਸ਼ ਮੰਨਦਾ ਸੀ। ਉਹ ਮੁੰਬਈ ਦੇ ਐਮ.ਐਨ.ਸੀ. ਕਾਲਜ ਵਿੱਚ ਦੂਜੇ ਸਾਲ ਦਾ ਵਿਦਿਆਰਥੀ ਸੀ ਜਦੋਂ ਉਸ ਨੇ 2007 ਵਿੱਚ 17 ਸਾਲ ਦੀ ਉਮਰ ਵਿੱਚ ਅਮੂਲ ਸਟਾਰ ਵੁਆਇਸ ਆਫ਼ ਇੰਡੀਆ ਮੁਕਾਬਲਾ ਜਿੱਤਿਆ। ਉਸ ਦੀ ਭਗਤੀ ਐਲਬਮ ‘ਸਤਗੁਰ ਤੁਮਰੇ ਕਾਜ ਸਵਾਰੇ’ ਇੱਕ ਉੱਜਵਲ ਭਵਿੱਖ ਵੱਲ ਇਸ਼ਾਰਾ ਕਰਦੀ ਸੀ। ਉਸ ਨੇ ਬਾਹਰਲੇ ਮੁਲਕਾਂ ਦਾ ਦੌਰਾ ਕੀਤਾ ਤੇ ਉਹ ਲਲਿਤ ਪੰਡਿਤ ਨਾਲ ਇੱਕ ਐਲਬਮ ਰਿਲੀਜ਼ ਕਰਨ ਲਈ ਤਿਆਰ ਸੀ। ਇਸ਼ਮੀਤ ਦੀ 29 ਜੁਲਾਈ, 2008 ਨੂੰ 19 ਸਾਲ ਦੀ ਉਮਰ ਵਿੱਚ ਇੱਕ ਪ੍ਰੋਮੋ ਪ੍ਰੋਗਰਾਮ ਦੌਰਾਨ ਮਾਲਦੀਵ ਦੇ ਇੱਕ ਰਿਜ਼ੌਰਟ ਪੂਲ ਵਿੱਚ ਮੌਤ ਹੋ ਗਈ। ਦਾਅਵਾ ਕੀਤਾ ਗਿਆ ਕਿ ਇਸ਼ਮੀਤ ਦੀ ਮੌਤ ਡੁੱਬਣ ਕਰਕੇ ਹੋਈ ਸੀ, ਹਾਲਾਂਕਿ ਪਰਿਵਾਰ ਨੇ ਇਨ੍ਹਾਂ ਦਾਅਵਿਆਂ ਨੂੰ ਖਾਰਜ ਕਰਦਿਆਂ ਸੀ.ਬੀ.ਆਈ. ਜਾਂਚ ਦੀ ਮੰਗ ਕੀਤੀ। ਮਗਰੋਂ ਇਸ਼ਮੀਤ ਨੂੰ ਲੈ ਕੇ ਸ਼ਰਧਾਂਜਲੀ ਐਲਬਮ ਜਾਰੀ ਕੀਤੇ ਗਏ ਅਤੇ ਪੰਜਾਬ ਸਰਕਾਰ ਨੇ 2017 ਵਿੱਚ ਉਸ ਨੂੰ ਮਰਨਉਪਰੰਤ ਸਨਮਾਨਿਤ ਕੀਤਾ। ਉਸ ਦੇ ਪਰਿਵਾਰ ਨੇ ਸੰਗੀਤ ਦੇ ਪ੍ਰਚਾਰ ਲਈ ਇਸ਼ਮੀਤ ਸਿੰਘ ਫਾਊਂਡੇਸ਼ਨ ਦੀ ਸ਼ੁਰੂਆਤ ਕੀਤੀ।

ਸੋਨੀ ਪਾਬਲਾ

29 ਜੂਨ, 1976 ਨੂੰ ਬਿਲਾਸਪੁਰ, ਹੁਸ਼ਿਆਰਪੁਰ ਨੇੜੇ ਜਨਮਿਆ ਤੇਜਪਾਲ ਸਿੰਘ ਪਾਬਲਾ ਉਰਫ਼ ਸੋਨੀ ਪਾਬਲਾ 1990 ਦੇ ਦਹਾਕੇ ਦੇ ਅੱਧ ਵਿੱਚ ਟੋਰਾਂਟੋ ਚਲਾ ਗਿਆ। ਇੱਕ ਫੈਕਟਰੀ ਹਾਦਸੇ ਤੋਂ ਬਾਅਦ ਉਸ ਨੂੰ ਇੱਕ ਉਂਗਲੀ ਦੀ ਕੀਮਤ ਚੁਕਾਉਣੀ ਪਈ। ਉਸ ਨੇ ਸੰਗੀਤ ਵਿੱਚ ਆਉਣ ਤੋਂ ਪਹਿਲਾਂ ਟਰੱਕ ਚਲਾਇਆ। ਉਸ ਦੀ ਪਹਿਲੀ ਐਲਬਮ ‘ਹੀਰੇ’ ਨੇ ਉਸ ਨੂੰ ਲਾਂਚ ਕੀਤਾ, ਅਤੇ ਸੁਖਸ਼ਿੰਦਰ ਸ਼ਿੰਦਾ ਨਾਲ ਉਸ ਦਾ ਗੀਤ ‘ਗਲ ਦਿਲ ਦੀ’ ਬਹੁਤ ਮਕਬੂਲ ਹੋਇਆ। ‘ਪੰਜੇਬ ਯਾਰ ਦੀ’, ‘ਜੱਟ ਦੀ ਦੁਸ਼ਮਣੀ’, ਅਤੇ ‘ਬੋਲੀ ਪਾਣੀ’ ਵਰਗੇ ਗੀਤ ਬਹੁਤ ਹਿੱਟ ਹੋਏ। ਸੋਨੀ ਪਾਬਲਾ ਦੀ 30 ਸਾਲ ਦੀ ਉਮਰ ਵਿੱਚ 14 ਅਕਤੂਬਰ, 2006 ਨੂੰ ਬਰੈਂਪਟਨ, ਓਨਟਾਰੀਓ ਵਿੱਚ ਸ਼ੋਅ ਦੌਰਾਨ ਦਿਲ ਦਾ ਦੌਰਾ ਪੈਣ ਕਾਰਨ ਮੌਤ ਹੋ ਗਈ। ਉਸ ਦਾ ਅੰਤਿਮ ਸੰਸਕਾਰ ਜੀ ਆਇਆਂ ਨੂੰ ’ਤੇ ਪ੍ਰਸਾਰਿਤ ਕੀਤਾ ਗਿਆ। ਉਹ ਆਪਣੇ ਪਿੱਛੇ ਪਤਨੀ ਅਤੇ ਜਵਾਨ ਪੁੱਤ ਛੱਡ ਗਿਆ।

ਅਮਰ ਸਿੰਘ ਚਮਕੀਲਾ

ਲੁਧਿਆਣਾ ਨੇੜੇ ਦੁੱਗਰੀ ਵਿੱਚ 21 ਜੁਲਾਈ, 1960 ਨੂੰ ਜਨਮੇ ਧਨੀ ਰਾਮ ਉਰਫ਼ ਅਮਰ ਸਿੰਘ ਚਮਕੀਲਾ ਇੱਕ ਕੱਪੜਾ ਮਿੱਲ ਵਿੱਚ ਕੰਮ ਕਰਦਾ ਸੀ। ਫਿਰ ਉਸ ਦੀ ਮੁਲਾਕਾਤ ਸੁਰਿੰਦਰ ਸ਼ਿੰਦਾ ਨਾਲ ਹੋਈ। ਚਮਕੀਲੇ ਨੇ ਸੁਰਿੰਦਰ ਸੋਨੀਆ ਨਾਲ ਸੋਲੋ ਡੈਬਿਊ ਕੀਤਾ ਅਤੇ ਅਮਰਜੋਤ ਕੌਰ ਨਾਲ ਆਪਣੀ ਪੈਂਠ ਬਣਾਈ। ਪੇਂਡੂ ਜ਼ਿੰਦਗੀ ’ਤੇ ਅਧਾਰਿਤ ਉਸ ਦੇ ਸ਼ਾਨਦਾਰ ਤੇ ਉੱਚ-ਪਿੱਚ ਵਾਲੇ ਗੀਤਾਂ ਨੇ ਭਾਰੀ ਭੀੜ ਇਕੱਠੀ ਕੀਤੀ। ਉਸ ਨੇ 365 ਦਿਨਾਂ ਵਿੱਚ 366 ਸ਼ੋਅ ਕੀਤੇ। ਚਮਕੀਲੇ ਅਤੇ ਉਸ ਦੀ ਗਾਇਕ ਤੇ ਗਰਭਵਤੀ ਪਤਨੀ ਅਮਰਜੋਤ ਕੌਰ ਨੂੰ 8 ਮਾਰਚ, 1988 ਨੂੰ ਮਹਿਸਮਪੁਰ, ਜਲੰਧਰ ਵਿੱਚ ਗੋਲੀ ਮਾਰ ਦਿੱਤੀ ਗਈ। ਇਹ ਗਾਇਕ ਜੋੜੀ ਦੋ ਧੀਆਂ ਅਤੇ 200 ਤੋਂ ਵੱਧ ਅਣਰਿਲੀਜ਼ ਗੀਤ ਛੱਡ ਗਈ। ਉਨ੍ਹਾਂ ਦੀ ਵਿਰਾਸਤ ਨੈੱਟਫਲਿਕਸ ਬਾਇਓਪਿਕ ਅਤੇ ਸਾਲਾਨਾ ਦੁੱਗਰੀ ਮੇਲੇ ਵਿੱਚ ਕਾਇਮ ਹੈ।

ਸਿੱਧੂ ਮੂਸੇਵਾਲਾ

ਮਾਨਸਾ ਦੇ ਮੂਸਾ ਪਿੰਡ ਵਿੱਚ 11 ਜੂਨ, 1993 ਨੂੰ ਜਨਮੇ ਸ਼ੁਭਦੀਪ ਸਿੰਘ ਸਿੱਧੂ ਨੇ ਇਲੈਕਟ੍ਰੀਕਲ ਇੰਜਨੀਅਰਿੰਗ ਵਿੱਚ ਗ੍ਰੈਜੂਏਸ਼ਨ ਕੀਤੀ ਅਤੇ ਕੈਨੇਡਾ ਚਲਾ ਗਿਆ। ਉਸ ਨੇ ਨਿੰਜਾ ਲਈ ਗੀਤ ਲਿਖਣ ਦੀ ਸ਼ੁਰੂਆਤ ਕੀਤੀ ਅਤੇ ‘ਸੋ ਹਾਈ’ ਨਾਲ ਵਾਇਰਲ ਹੋ ਗਿਆ। ਐਲਬਮ PBX 1 ਅਤੇ 47, 295, GOAT ਅਤੇ Legend ਵਰਗੇ ਹਿੱਟ ਗੀਤਾਂ ਨੇ ਰਾਜਨੀਤੀ, ਮਾਣ ਅਤੇ ਬੰਦੂਕ ਸੱਭਿਆਚਾਰ ਨੂੰ ਮਿਲਾਇਆ। ਉਸ ਨੇ ਫ਼ਿਲਮ Yes I Am Student ਵਿੱਚ ਕੰਮ ਕੀਤਾ ਅਤੇ 2022 ਵਿੱਚ ਕਾਂਗਰਸ ਵਿੱਚ ਸ਼ਾਮਲ ਹੋ ਗਿਆ। 28 ਸਾਲ ਦੀ ਉਮਰ ਵਿੱਚ ਸਿੱਧੂ ਦਾ 29 ਮਈ, 2022 ਨੂੰ ਮਾਨਸਾ ਦੇ ਜਵਾਹਰਕੇ ਵਿੱਚ ਕਤਲ ਕਰ ਦਿੱਤਾ ਗਿਆ। ਉਸ ਦੀ ਮਹਿੰਦਰਾ ਥਾਰ ’ਤੇ ਏਕੇ47 ਨਾਲ ਅੰਨ੍ਹੇਵਾਹ ਗੋਲੀਆਂ ਚਲਾਈਆਂ ਗਈਆਂ। ਕਤਲ ਦੀ ਜ਼ਿੰਮੇਵਾਰੀ ਲਾਰੈਂਸ ਬਿਸ਼ਨੋਈ ਗੈਂਗ ਨੇ ਲਈ। ਮਰਨ ਉਪਰੰਤ ਮੂਸੇਵਾਲਾ ਦੀਆਂ ਐਲਬਮਾਂ MOOSATAPE ਅਤੇ 410 ਚਾਰਟ ’ਤੇ ਸਿਖਰ ਉੱਤੇ ਸਨ। 2024 ਵਿੱਚ ਉਸ ਦੇ ਮਾਪਿਆਂ ਨੇ IVF ਰਾਹੀਂ ਇੱਕ ਪੁੱਤਰ ਨੂੰ ਜਨਮ ਦਿੱਤਾ।

ਕਾਕਾ ਭਾਨਿਆਵਾਲਾ

5 ਅਪ੍ਰੈਲ, 1970 ਨੂੰ ਲੁਧਿਆਣਾ ਦੇ ਕੋਹਾੜਾ ਨੇੜੇ ਦੋਆਬਾ ਭੈਣੀ ਪਿੰਡ ਵਿੱਚ ਜਨਮੇ ਸੰਤੋਖ ਸਿੰਘ ਰਤੌੜ ਨੂੰ ਕਾਕਾ ਉਪਨਾਮ ਆਪਣੀ ਮਾਂ ਤੋਂ ਮਿਲਿਆ। ਉਸਨੇ ‘ਮਸ਼ੂਕ ਤੇਰੀ ਚੱਲੀ’ ਨਾਲ ਸ਼ੁਰੂਆਤ ਕੀਤੀ ਅਤੇ ‘ਸਾਹਨੇਵਾਲ ਚੌਕ’ ਅਤੇ ‘ਦਾਰੂ ਪੀ ਕੇ ਜੱਟ ਬੁੱਕ ਦੇ’ ਨਾਲ ਪ੍ਰਸਿੱਧੀ ਖੱਟੀ। ਗਾਇਕ ਦੀ 38 ਸਾਲ ਦੀ ਉਮਰ ਵਿੱਚ, 12 ਅਪਰੈਲ, 2009 ਨੂੰ ਪੀਲੀਆ ਅਤੇ ਜਿਗਰ ਫੇਲ੍ਹ ਹੋਣ ਕਾਰਨ ਮੌਤ ਹੋ ਗਈ।

ਇਨ੍ਹਾਂ ਗਾਇਕਾਂ- ਰਾਜਵੀਰ, ਦਿਲਜਾਨ, ਇਸ਼ਮੀਤ, ਸੋਨੀ, ਚਮਕੀਲਾ, ਸਿੱਧੂ ਅਤੇ ਕਾਕਾ - ਨੇ ਪੰਜਾਬੀ ਸੰਗੀਤ ਨੂੰ ਆਪਣੀ ਦਿਲ ਦੀ ਧੜਕਣ ਦਿੱਤੀ। ਪਰ ਹਾਦਸਿਆਂ, ਹਿੰਸਾ ਅਤੇ ਸਿਹਤ ਸੰਘਰਸ਼ਾਂ ਕਰਕੇ ਉਹ ਜਲਦੀ ਇਸ ਜਹਾਨੋਂ ਤੁਰ ਗਏ।