ਟੈਨਿਸ: ਨਾਗਲ ਜੂਨੀਅਰ ਫਰੈਂਚ ਓਪਨ ਦੇ ਚੈਂਪੀਅਨ ਮੈਕਡੋਨਲਡ ਹੱਥੋਂ ਹਾਰਿਆ

ਭਾਰਤ ਦਾ ਸਿਖਰਲਾ ਸਿੰਗਲਜ਼ ਖਿਡਾਰੀ ਸੁਮਿਤ ਨਾਗਲ ਜਰਮਨੀ ਵਿੱਚ ਚੱਲ ਰਹੇ ਪਲਾਤਜ਼ਮੈਨ ਓਪਨ ਏਟੀਪੀ 75 ਚੈਲੇਂਜਰ ਟੂਰਨਾਮੈਂਟ ਦੇ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਜੂਨੀਅਰ ਫਰੈਂਚ ਓਪਨ ਚੈਂਪੀਅਨ ਅਤੇ ਗੈਰ ਦਰਜਾ ਪ੍ਰਾਪਤ ਨੀਲਜ਼ ਮੈਕਡੋਨਲਡ ਹੱਥੋਂ ਹਾਰ ਗਿਆ। ਵਿਸ਼ਵ ਰੈਂਕਿੰਗ ਵਿੱਚ 307ਵੇਂ ਸਥਾਨ ’ਤੇ ਕਾਬਜ਼ ਨਾਗਲ ਨੂੰ ਉਸ ਤੋਂ ਦਸ ਸਾਲ ਛੋਟੇ ਵਿਰੋਧੀ ਨੇ ਦੋ ਘੰਟੇ ਅਤੇ 16 ਮਿੰਟ ਤੱਕ ਚੱਲੇ ਮੈਚ ਵਿੱਚ 6-2, 4-6, 6-4 ਨਾਲ ਹਰਾਇਆ। ਵਾਈਲਡ ਕਾਰਡ ਰਾਹੀਂ ਟੂਰਨਾਮੈਂਟ ਵਿੱਚ ਸ਼ਾਮਲ ਹੋਏ 17 ਸਾਲਾ ਮੈਕਡੋਨਲਡ ਨੇ ਨੌਂ ’ਚੋਂ ਛੇ ਬ੍ਰੇਕ ਪੁਆਇੰਟ ਬਚਾਏ ਅਤੇ ਪੰਜ ਵਾਰ ਨਾਗਲ ਦੀ ਸਰਵਿਸ ਤੋੜੀ। ਨਾਗਲ ਨੂੰ ਪ੍ਰੀ-ਕੁਆਰਟਰ ਫਾਈਨਲ ਵਿੱਚ ਪਹੁੰਚਣ ਲਈ 1535 ਯੂਰੋ ਅਤੇ ਛੇ ਰੈਂਕਿੰਗ ਅੰਕ ਮਿਲੇ। ਇਸ ਦੌਰਾਨ ਅਮਰੀਕਾ ਵਿੱਚ ਲੈਕਸਿੰਗਟਨ ਓਪਨ ਵਿੱਚ ਭਾਰਤ ਦੇ ਦਕਸ਼ਿਨੇਸ਼ਵਰ ਸੁਰੇਸ਼ ਨੂੰ ਸਥਾਨਕ ਵਾਈਲਡ ਕਾਰਡ ਐਲੀਅਟ ਸਪਿਜ਼ੀਰੀ ਤੋਂ 7-6, 6-4 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਇਸੇ ਤਰ੍ਹਾਂ ਕਜ਼ਾਖਸਤਾਨ ਵਿੱਚ ਪ੍ਰੈਜ਼ੀਡੈਂਟਸ ਕੱਪ ਦੇ ਕੁਆਰਟਰ ਫਾਈਨਲ ਵਿੱਚ ਕਰਨ ਸਿੰਘ ਇਟਲੀ ਦੇ ਅਲੈਗਜ਼ੈਂਡਰ ਬਿੰਦਾ ਹੱਥੋਂ 4-6, 4-6 ਨਾਲ ਹਾਰ ਗਿਆ।