ਦੂਜਾ ਟੈਸਟ: ਚਾਹ ਦੇ ਸਮੇਂ ਵੈਸਟ ਇੰਡੀਜ਼ ਦਾ ਸਕੋਰ 35/2, ਭਾਰਤ ਕੋਲ ਅਜੇ ਵੀ 235 ਦੌੜਾਂ ਦੀ ਲੀਡ

ਭਾਰਤ ਖਿਲਾਫ਼ ਦੂਜੇ ਟੈਸਟ ਕ੍ਰਿਕਟ ਮੈਚ ਦੇ ਤੀਜੇ ਦਿਨ ਫਾਲੋਆਨ ਲਈ ਮਜਬੂਰ ਹੋਣ ਮਗਰੋਂ ਵੈਸਟ ਇੰਡੀਜ਼ ਨੇ ਆਪਣੀ ਦੂਜੀ ਪਾਰੀ ਵਿਚ ਚਾਹ ਦੇ ਸਮੇਂ ਤੱਕ ਦੋ ਵਿਕਟਾਂ ਦੇ ਨੁਕਸਾਨ ਨਾਲ 35 ਦੌੜਾਂ ਬਣਾ ਲਈਆਂ ਹਨ। ਮੁਹੰਮਦ ਸਿਰਾਜ ਤੇ ਵਾਸ਼ਿੰਗਟਨ ਸੁੰਦਰ ਨੇ ਇਕ ਇਕ ਵਿਕਟ ਲਈ। ਭਾਰਤ ਕੋਲ ਅਜੇ ਵੀ 235 ਦੌੜਾਂ ਦੀ ਲੀਡ ਹੈ। ਭਾਰਤ ਨੇ ਪਹਿਲੀ ਪਾਰੀ  581/5 ਦੇ ਸਕੋਰ ’ਤੇ ਐਲਾਨ ਦਿੱਤੀ ਸੀ। ਫਿਰਕੀ ਗੇਂਦਬਾਜ਼ ਕੁਲਦੀਪ ਯਾਦਵ ਵੱਲੋਂ 85 ਦੌੜਾਂ ਬਦਲੇ ਲਈਆਂ ਪੰਜ ਵਿਕਟਾਂ ਦੀ ਬਦੌਲਤ ਭਾਰਤ ਨੇ ਅੱਜ ਤੀਜੇ ਦਿਨ ਲੰਚ ਤੋਂ ਬਾਅਦ ਦੇ ਸੈਸ਼ਨ ਵਿਚ ਵੈਸਟ ਇੰਡੀਜ਼ ਦੀ ਪਹਿਲੀ ਪਾਰੀ 248 ਦੇ ਸਕੋਰ ’ਤੇ ਸਮੇਟ ਦਿੱਤੀ ਸੀ।

ਇਸ ਤੋਂ ਪਹਿਲਾਂ ਖੈਰੀ ਪੀਅਰੇ (23) ਤੇ ਐਂਡਰਸਨ ਫਿਲਿਪ (ਨਾਬਾਦ 24) ਨੈ 9ਵੇਂ ਵਿਕਟ ਲਈ 46 ਦੌੜਾਂ ਦੀ ਭਾਈਵਾਲੀ ਕੀਤੀ। ਟੀਮ ਲਈ ਐਲਿਕ ਅਥਾਂਜ਼ੇ 41 ਦੌੜਾਂ ਨਾਲ ਟੌਪ ਸਕੋਰਰ ਰਿਹਾ। ਵੈਸਟਇੰਡੀਜ਼ ਨੇ ਦਿਨ ਦੇ ਪਹਿਲੇ ਸੈਸ਼ਨ ਵਿਚ ਅੱਜ ਇਕ ਸਮੇਂ ਸੱਤ ਓਵਰਾਂ ਦੇ ਵਕਫੇ ਵਿਚ ਚਾਰ ਵਿਕਟ ਗੁਆ ਲਏ ਸਨ ਤੇ ਟੀਮ ਦਾ ਸਕੋਰ 175/8 ਸੀ। ਇਸ ਮਗਰੋਂ ਪੀਅਰੇ ਤੇ ਫਿਲਿਪ ਨੇ 9ਵੀਂ ਵਿਕਟ ਲਈ 46 ਦੌੜਾਂ ਦੀ ਭਾਈਵਾਲੀ ਕੀਤੀ। ਭਾਰਤ ਲਈ ਕੁਲਦੀਪ ਯਾਦਵ ਨੇ 85 ਦੌੜਾਂ ਬਦਲੇ ਪੰਜ ਤੇ ਰਵਿੰਦਰ ਜਡੇਜਾ ਨੇ 46 ਦੌੜਾਂ ਬਦਲੇ 3 ਵਿਕਟਾਂ ਲਈਆਂ। ਇਕ ਇਕ ਵਿਕਟ ਜਸਪ੍ਰੀਤ ਭੁਮਰਾਹ ਤੇ ਮੁਹੰਮਦ ਸਿਰਾਜ ਦੇ ਹਿੱਸੇ ਆਈ। ਭਾਰਤ ਨੇ ਆਪਣੀ ਪਹਿਲੀ ਪਾਰੀ 518/5 ਦੇ ਸਕੋਰ ’ਤੇ ਐਲਾਨ ਦਿੱਤੀ ਸੀ। ਦੋ ਟੈਸਟ ਮੈਚਾਂ ਦੀ ਲੜੀ ਵਿਚ ਭਾਰਤ 1-0 ਨਾਲ ਅੱਗੇ ਹੈ। ਭਾਰਤ ਨੇ ਅਹਿਮਦਾਬਾਦ ਵਿਚ ਖੇਡੇ ਪਹਿਲੇ ਟੈਸਟ ਵਿਚ ਵੈਸਟ ਇੰਡੀਜ਼ ਨੂੰ ਇਕ ਪਾਰੀ ਤੇ 140 ਦੌੜਾਂ ਨਾਲ ਹਰਾਇਆ ਸੀ।