ਬੈਡਮਿੰਟਨ: ਲਕਸ਼ੈ ਰਾਜੇਸ਼ ਸਣੇ ਚਾਰ ਭਾਰਤੀ ਸੈਮੀਫਾਈਨਲ ’ਚ

ਲਕਸ਼ੈ ਰਾਜੇਸ਼ ਨੇ ਸਿਖ਼ਰਲਾ ਦਰਜਾ ਪ੍ਰਾਪਤ ਲਲਿਤਾ ਸੱਤਿਆਥਾਡਾਕੂਨ ਨੂੰ ਹਰਾ ਕੇ ਇੱਥੇ ਬੈਡਮਿੰਟਨ ਏਸ਼ੀਆ ਅੰਡਰ-17 ਅਤੇ ਅੰਡਰ-15 ਚੈਂਪੀਅਨਸ਼ਿਪ ਦੇ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾਈ। ਭਾਰਤ ਦੇ ਕੁੱਲ ਚਾਰ ਖਿਡਾਰੀਆਂ ਨੇ ਸਿੰਗਲਜ਼ ਵਰਗ ਦੇ ਅੰਤਿਮ ਚਾਰ ਵਿੱਚ ਆਪਣੀ ਜਗ੍ਹਾ ਪੱਕੀ ਕੀਤੀ। ਅੱਜ ਖਿੱਚ ਦਾ ਮੁੱਖ ਕੇਂਦਰ ਲਕਸ਼ੈ ਰਹੀ, ਜਿਸ ਨੇ ਅੰਡਰ-17 ਲੜਕੀਆਂ ਦੇ ਸਿੰਗਲਜ਼ ਵਰਗ ਦੇ ਕੁਆਰਟਰ ਫਾਈਨਲ ਵਿੱਚ ਥਾਈਲੈਂਡ ਦੀ ਸਿਖ਼ਰਲਾ ਦਰਜਾ ਪ੍ਰਾਪਤ ਲਲਿਤਾ ਨੂੰ 11-21, 21-16, 21-19 ਨਾਲ ਹਰਾਇਆ। ਭਾਰਤ ਦੀ ਇਕ ਹੋਰ ਖਿਡਾਰਨ ਛੇਵਾਂ ਦਰਜਾ ਪ੍ਰਾਪਤ ਦੀਕਸ਼ਾ ਸੁਧਾਕਰ ਵੀ ਆਖ਼ਰੀ ਚਾਰ ਵਿੱਚ ਪਹੁੰਚ ਗਈ ਹੈ। ਉਸ ਨੇ ਇੰਡੋਨੇਸ਼ੀਆ ਦੀ ਰਈਸਾ ਅਫਾਤੁਨਿਸਾ ਨੂੰ 21-17, 21-18 ਨਾਲ ਹਰਾਇਆ। ਲੜਕਿਆਂ ਦੇ ਵਰਗ ਵਿੱਚ ਜਗਸ਼ੇਰ ਸਿੰਘ ਖੁੰਗੜਾ ਨੇ ਆਪਣਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਰੱਖਦੇ ਹੋਏ ਹਾਂਗਕਾਂਗ ਚੀਨ ਦੇ ਜ਼ਾਨ ਸ਼ਿੰਗ ਯੂਈ ਨੂੰ ਸਿੱਧੇ ਗੇਮ ਵਿੱਚ 21-13, 21-14 ਨਾਲ ਹਰਾ ਕੇ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। ਇਸੇ ਤਰ੍ਹਾਂ ਭਾਰਤ ਦੇ ਜੰਗਜੀਤ ਸਿੰਘ ਕਾਜਲਾ ਅਤੇ ਜਨਨਿਕਾ ਰਮੇਸ਼ ਆਪਣੀ ਚੀਨੀ ਵਿਰੋਧੀਆਂ ਦੇ ਰਿਟਾਇਰ ਹੋਣ ਤੋਂ ਬਾਅਦ ਅੰਡਰ 17 ਮਿਕਸਡ ਡਬਲਜ਼ ਸੈਮੀਫਾਈਨਲ ਵਿੱਚ ਪਹੁੰਚ ਗਏ।