ਪੰਜਾਬ ਸਖ਼ੀ ਸ਼ਕਤੀ ਮੇਲਾ: ਔਰਤਾਂ ਲਈ ਮਿਸਾਲ ਬਣੀ ਮਮਤਾ ਰਾਣੀ

ਰਣਬੀਰ ਕਾਲਜ ਵਿੱਚ ਚੱਲ ਰਿਹਾ 5 ਰੋਜ਼ਾ ‘ਪੰਜਾਬ ਸਖ਼ੀ ਸ਼ਕਤੀ ਮੇਲਾ 2025’ ਦਰਸ਼ਕਾਂ ਅਤੇ ਖ਼ਰੀਦਦਾਰਾਂ ਲਈ ਖਾਸ ਖਿੱਚ ਦਾ ਕੇਂਦਰ ਬਣਿਆ ਹੋਇਆ ਹੈ। ਮੇਲੇ ਵਿੱਚ ਆਪਣੀਆਂ ਦੁਕਾਨਾਂ ਲਾ ਕੇ ਬੈਠੇ ਘਰੇਲੂ ਦਸਤਕਾਰਾਂ ਦੀ ਕਹਾਣੀ ਹਿੰਮਤ ਤੇ ਹੌਸਲੇ ਤਸਵੀਰ ਪੇਸ਼ ਕਰਦੀ ਹੈ। ਇਨ੍ਹਾਂ ਵਿਚੋਂ ਮਮਤਾ ਰਾਣੀ (45 ਸਾਲ) ਘਰੇਲੂ ਔਰਤਾਂ ਲਈ ਪ੍ਰੇਰਣਾ ਸਰੋਤ ਵਜੋਂ ਉਭਰ ਰਹੀ ਹੈ। ਉਸ ਨੇ ਦੱਸਿਆ ਕਿ ਉਹ 10 ਹੋਰ ਔਰਤਾਂ ਨਾਲ ਮਿਲ ਕੇ ਪਿੰਡ ਕਣਕਵਾਲ ਭੰਗੂਆਂ ਵਿੱਚ ਬਾਬਾ ਕਪੂਰ ਦਾਸ ਸੈਲਫ ਹੈਲਪ ਗਰੁੱਪ ਚਲਾ ਰਹੀ ਹੈ। ਇਹ ਗਰੁੱਪ 5 ਸਾਲ ਪਹਿਲਾਂ ਬਣਿਆ ਸੀ ਅਤੇ ਅੱਜ ਆਪਣੀ ਮਿਹਨਤ ਨਾਲ ਵਧੀਆ ਤਰੱਕੀ ਕਰ ਚੁੱਕਾ ਹੈ। ਉਨ੍ਹਾਂ ਕੰਮ ਦੀ ਸ਼ੁਰੂਆਤ ਕੱਪੜੇ ਧੋਣ ਵਾਲੇ ਸਰਫ਼ ਬਣਾਉਣ ਨਾਲ ਕੀਤੀ ਸੀ। ਫਿਰ ਫਿਨਾਇਲ ਅਤੇ ਡਿਸ਼ ਵਾਸ਼ ਤਿਆਰ ਕੀਤਾ। ਹੁਣ ਉਨ੍ਹਾਂ ਦਾ ਗਰੁੱਪ ਸ਼ਹਿਦ, ਹਲਦੀ, ਚਾਹ ਮਸਾਲਾ, ਗਰਮ ਮਸਾਲਾ, ਸਾਬਣ, ਟਾਇਲਟ ਕਲੀਨਰ, ਫ਼ਰਸ਼ ਕਲੀਨਰ ਆਦਿ ਕਈ ਉਤਪਾਦ ਖ਼ੁਦ ਤਿਆਰ ਕਰਕੇ ਬਾਜ਼ਾਰ ਵਿੱਚ ਵੇਚ ਰਿਹਾ ਹੈ।

ਮਮਤਾ ਰਾਣੀ ਨੇ ਦੱਸਿਆ ਕਿ 5 ਸਾਲ ਪਹਿਲਾਂ ਉਨ੍ਹਾਂ ਨੇ ਕੇਵਲ 20 ਹਜ਼ਾਰ ਰੁਪਏ ਨਾਲ ਸ਼ੁਰੂਆਤ ਕੀਤੀ ਸੀ, ਜਦਕਿ ਅੱਜ ਉਨ੍ਹਾਂ ਦੇ ਗਰੁੱਪ ਦਾ ਕਾਰੋਬਾਰ 2 ਲੱਖ ਰੁਪਏ ਤੋਂ ਵੱਧ ਹੈ। ਇਸ ਸਫ਼ਰ ਵਿੱਚ ਕ੍ਰਿਸ਼ੀ ਵਿਗਿਆਨ ਕੇਂਦਰ ਖੇੜੀ ਅਤੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਦਾ ਮਹੱਤਵਪੂਰਨ ਯੋਗਦਾਨ ਰਿਹਾ। ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਮਿਲ ਰਹੀ ਸਹਾਇਤਾ ਨਾਲ ਉਹ ਹਰ ਹਫਤੇ ਬੀ ਐੱਸ ਐੱਨ ਐੱਲ ਪਾਰਕ ਵਿੱਚ ਬਾਜ਼ਾਰ ਲਗਾਉਂਦੀਆਂ ਹਨ ਅਤੇ ਜਲਦੀ ਹੀ ਆਨਲਾਈਨ ਵਿਕਰੀ ਵੀ ਸ਼ੁਰੂ ਕਰਨ ਵਾਲੀਆਂ ਹਨ।