ਜ਼ਿਲ੍ਹਾ ਚੋਣ ਅਧਿਕਾਰੀ ਵੱਲੋਂ ਰਿਟਰਨਿੰਗ ਅਫ਼ਸਰਾਂ ਨਾਲ ਮੀਟਿੰਗ

ਰਾਜ ਚੋਣ ਕਮਿਸ਼ਨ ਵੱਲੋਂ ਜਾਰੀ ਕੀਤੇ ਗਏ ਚੋਣ ਪ੍ਰੋਗਰਾਮ ਤਹਿਤ ਪਟਿਆਲਾ ਜ਼ਿਲ੍ਹੇ ’ਚ ਵੀ ਜ਼ਿਲ੍ਹਾ ਪਰਿਸ਼ਦ ਅਤੇ ਬਲਾਕ ਸਮਿਤੀ ਦੀਆਂ 14 ਦਸੰਬਰ ਨੂੰ ਕਰਵਾਈਆਂ ਜਾਣ ਵਾਲੀਆਂ ਚੋਣਾ ਸਬੰਧੀ ਜ਼ਿਲ੍ਹਾ ਚੋਣ ਅਫ਼ਸਰ-ਕਮ-ਡਿਪਟੀ ਕਮਿਸ਼ਨਰ ਡਾ. ਪ੍ਰੀਤੀ ਯਾਦਵ ਨੇ ਅੱਜ ਵਧੀਕ ਜ਼ਿਲ੍ਹਾ ਚੋਣ ਅਫ਼ਸਰ ਅਤੇ ਰਿਟਰਨਿੰਗ ਅਧਿਕਾਰੀਆਂ ਨਾਲ ਚੋਣ ਪ੍ਰਬੰਧਾਂ ਬਾਰੇ ਅੱਜ ਇਥੇ ਪਲੇਠੀ ਬੈਠਕ ਕਰਦਿਆਂ ਲੋੜੀਂਦੀ ਚਰਚਾ ਕੀਤੀ। ਬੈਲੇਟ ਪੇਪਰ ਰਾਹੀਂ ਕਰਵਾਈਆਂ ਜਾਣ ਵਾਲੀਆਂ ਇਨ੍ਹਾਂ ਚੋਣਾ ਵਿੱਚ 50 ਫੀਸਦੀ ਸੀਟਾਂ ਔਰਤਾਂ ਲਈ ਰਾਖਵੀਆਂ ਹੋਣਗੀਆਂ।

ਜ਼ਿਕਰਯੋਗ ਹੈ ਕਿ ਪਟਿਆਲਾ ਜ਼ਿਲ੍ਹੇ ਦੀਆਂ 988 ਪੰਚਾਇਤਾਂ ਜ਼ਿਲ੍ਹਾ ਪ੍ਰੀਸ਼ਦ ਪਟਿਆਲਾ ਦੇ 23 ਜ਼ੋਨਾਂ ਵਿੱਚ ਵੰਡੀਆਂ ਹੋਈਆਂ ਹਨ ਜਦਕਿ ਜ਼ਿਲ੍ਹੇ ’ਚ 10 ਬਲਾਕ ਸਮਿਤੀਆਂ ਦੇ 184 ਜ਼ੋਨ ਬਣਾਏ ਗਏ ਹਨ ਜਿਨ੍ਹਾਂ ਵਿਚੋਂ ਪੰਚਾਇਤ ਸਮਿਤੀ ਪਟਿਆਲਾ ਦੇ 16 ਅਤੇ ਪੰਚਾਇਤ ਸਮਿਤੀ ਪਟਿਆਲਾ ਦਿਹਾਤੀ ਦੇ 15 ਜ਼ੋਨ ਹਨ। ਵਿਧਾਨ ਸਭਾ ਹਲਕਾ ਸਨੌਰ ਵਿਚ ਸਭ ਤੋਂ ਵੱੱਧ ਜ਼ੋਨ ਹਨ। ਇਸ ਹਲਕੇ ਵਿਚਲੀਆਂ ਪੰਚਾਇਤ ਸਮਿਤੀ ਸਨੌਰ ਅਤੇ ਪੰਚਾਇਤ ਸਮਿਤੀ ਭੁੱਨਰਹੇੜੀ 19-19 ਜ਼ੋਨ ਕੁੱਲ 38 ਜ਼ੋਨਾਂ ’ਤੇ ਆਧਾਰਿਤ ਹਨ। ਰਾਜਪੁਰਾ ਪੰਚਾਇਤ ਸਮਿਤੀ 15 ਜ਼ੋਨ, ਘਨੌਰ ਪੰਚਾਇਤ ਸਮਿਤੀ ਘਨੌਰ ਦੇ 16 ਜਦਕਿ ਪੰਚਾਇਤ ਸਮਿਤੀ ਸ਼ੰਭੂ ਕਲਾਂ ਦੇ 19 ਜ਼ੋਨ ਹਨ। ਉਧਰ ਪੰਚਾਇਤ ਸਮਿਤੀ ਸਮਾਣਾ ਦੇ 15 ਜ਼ੋਨ, ਪੰਚਾਇਤ ਸਮਿਤੀ ਨਾਭਾ ਵਿਚ 25 ਜ਼ੋਨ ਅਤੇ ਪੰਚਾਇਤ ਸਮਿਤੀ ਪਾਤੜਾਂ ਵਿੱਚ 25 ਜ਼ੋਨ ਹਨ।

ਇਸ ਸਬੰਧੀ 1 ਤੋਂ 4ਦਸੰਬਰ ਤੱਕ 11 ਵਜੇ ਤੋਂ 3 ਵਜੇ ਤੱਕ ਨਾਮਜ਼ਦਗੀ ਪੱਤਰ ਦਾਖ਼ਲ ਕੀਤੇ ਜਾ ਸਕਣਗੇ। 5 ਦਸੰਬਰ ਨੂੰ ਨਾਮਜ਼ਦਗੀ ਪੱਤਰਾਂ ਦੀ ਪੜਤਾਲ ਮਗਰੋਂ 6 ਦਸੰਬਰ ਸ਼ਾਮੀਂ 3 ਵਜੇ ਤੱਕ ਨਾਮਜਦਗੀ ਵਾਪਸ ਲੈਣ ਦੀ ਵਿਵਸਥਾ ਵੀ ਹੋਵੇਗੀ। ਉਮੀਦਵਾਰ ਵੱਲੋਂ ਆਪਣਾ ਤੇ ਜੇਕਰ ਕਿਸੇ ਰਾਜਨੀਤਿਕ ਪਾਰਟੀ ਵੱਲੋਂ ਹੈ ਤਾਂ ਉਸ ਪਾਰਟੀ ਦਾ ਹਲਫੀਆ ਬਿਆਨ ਆਉਣਾ ਜ਼ਰੂਰੀ ਹੋਵੇਗਾ।

ਜ਼ਿਲ੍ਹਾ ਚੋਣ ਅਧਿਕਾਰੀ ਨੇ ਕਿਹਾ ਕਿ ਜ਼ਿਲ੍ਹਾ ਪਰਿਸ਼ਦ ਦੇ ਉਮੀਦਵਾਰ ਲਈ 2,55000 ਰੁਪਏ ਅਤੇ ਪੰਚਾਇਤ ਸਮਿਤੀ ਦੇ ਉਮੀਦਵਾਰ ਲਈ 1,10,000 ਰੁਪਏ ਚੋਣ ਖਰਚੇ ਦੀ ਹੱਦ ਨੋਟੀਫਾਈ ਕੀਤੀ ਗਈ ਹੈ। ਜ਼ਿਲ੍ਹਾ ਪਰਿਸ਼ਦ ਲਈ ਨਾਮਜ਼ਦਗੀ ਫੀਸ 400 ਰੁਪਏ ਅਤੇ ਬਲਾਕ ਸਮਿਤੀ ਲਈ 200 ਰੁਪਏ ਨਿਰਧਾਰਰਤ ਕੀਤੀ ਹੈ ਜਦਕਿ ਅਨੁਸੂਚਿਤ ਜਾਤੀਆਂ ਦੇ ਉਮੀਦਵਾਰਾਂ ਲਈ ਇਹ ਫੀਸ ਅੱਧੀ ਹੋਵੇਗੀ। ਜ਼ਿਲ੍ਹਾ ਚੋਣ ਅਧਿਕਾਰੀ ਨੇ ਇਹ ਵੀ ਕਿਹਾ ਕਿ ਪਟਿਆਲਾ ਦੀਆਂ ਸਾਰੀਆਂ 988 ਗਰਾਮ ਪੰਚਾਇਤਾਂ ਦੇ ਮਾਲ ਖੇਤਰ ਵਿੱਚ ਤੁਰੰਤ ਪ੍ਰਭਾਵ ਨਾਲ ਆਦਰਸ਼ ਚੋਣ ਜ਼ਾਬਤਾ ਲਾਗੂ ਹੋ ਗਿਆ। ਏ ਡੀ ਸੀ ਦਮਨਜੀਤ ਸਿੰਘ ਮਾਨ ਤੇ ਡਾ. ਇਸਮਤ ਵਿਜੇ ਸਿੰਘ, ਰਿਟਰਨਿੰਗ ਅਧਿਕਾਰੀ ਬਬਨਦੀਪ ਸਿੰਘ ਵਾਲੀਆ, ਨਮਨ ਮਾਰਕੰਨ, ਨਵਦੀਪ ਕੁਮਾਰ, ਹਰਜੋਤ ਕੌਰ ਮਾਵੀ ਤੇ ਰਿਚਾ ਗੋਇਲ ਵੀ ਮੌਜੂਦ ਸਨ।