ਸੁਪਰੀਮ ਕੋਰਟ ਨੇ ਕਾਲਜ ਦਾਖ਼ਲਿਆਂ ਦੀ ਮਿਆਦ 30 ਅਕਤੂਬਰ ਤੱਕ ਕੀਤੀ; ਪੰਜਾਬ ਮੱਦੇਨਜ਼ਰ ਲਿਆ ਫੈਸਲਾ

ਪੰਜਾਬ ਹਾਲ ਹੀ ਵਿੱਚ ਹੜ੍ਹਾਂ ਕਾਰਨ ਪੈਦਾ ਹੋਈਆਂ ਸਮੱਸਿਆਵਾਂ ਦਾ ਸਾਹਮਣਾ ਕਰ ਰਿਹਾ ਹੈ, ਸੁਪਰੀਮ ਕੋਰਟ ਨੇ 2025-26 ਦੇ ਅਕਾਦਮਿਕ ਸੈਸ਼ਨ ਲਈ ਸੂਬੇ ਭਰ ਦੇ ਕਾਲਜਾਂ ਵਿੱਚ ਦਾਖਲੇ ਲਈ ਕੱਟ-ਆਫ ਮਿਤੀ 30 ਅਕਤੂਬਰ ਤੱਕ ਵਧਾ ਦਿੱਤੀ ਹੈ।

ਇਹ ਹੁਕਮ ਭਾਰਤ ਦੇ ਚੀਫ਼ ਜਸਟਿਸ ਬੀ.ਆਰ.ਗਵਈ ਦੀ ਅਗਵਾਈ ਵਾਲੇ ਬੈਂਚ ਨੇ ਪੰਜਾਬ ਅਨਏਡਿਡ ਕਾਲਜ ਐਸੋਸੀਏਸ਼ਨ (PUCA) ਵੱਲੋਂ ਦਾਇਰ ਅਰਜ਼ੀ ’ਤੇ ਦਿੱਤਾ, ਜੋ ਕਿ ਸੂਬੇ ਵਿੱਚ ਵੱਖ-ਵੱਖ ਪੇਸ਼ੇਵਰ, ਤਕਨੀਕੀ, ਪ੍ਰਬੰਧਨ ਅਤੇ ਡਿਪਲੋਮਾ ਕੋਰਸ ਕਰਵਾਉਣ ਵਾਲੇ ਅਨਏਡਿਡ ਕਾਲਜਾਂ ਦੀ ਨੁਮਾਇੰਦਗੀ ਕਰਦੀ ਹੈ।

ਬੈਂਚ ਨੇ ਆਪਣੇ 7 ਅਕਤੂਬਰ ਦੇ ਆਦੇਸ਼ ਵਿੱਚ ਕਿਹਾ,“ ਪੰਜਾਬ ਸੂੂਬੇ ਵਿੱਚ ਅਣਕਿਆਸੀ ਸਥਿਤੀ ਦੇ ਕਾਰਨ ਅਰਜ਼ੀ ਜ਼ਰੂਰੀ ਹੈ, ਜਿੱਥੇ ਪੰਜਾਬ ਦੇ ਕਈ ਖੇਤਰ ਹੜ੍ਹਾਂ ਨਾਲ ਪ੍ਰਭਾਵਿਤ ਹੋਏ ਹਨ। ਇਸ ਮਾਮਲੇ ਦੇ ਮੱਦੇਨਜ਼ਰ ਅਸੀਂ ਪੰਜਾਬ ਰਾਜ ਵਿੱਚ ਦਾਖਲੇ ਲਈ ਕੱਟ-ਆਫ ਮਿਤੀ ਵਧਾਉਣ ਲਈ ਤਿਆਰ ਹਾਂ। ਦਾਖਲੇ ਦੀ ਪ੍ਰਕਿਰਿਆ ਨੂੰ ਪੂਰਾ ਕਰਨ ਦਾ ਸਮਾਂ, ਇਸ ਅਨੁਸਾਰ, 30.10.2025 ਤੱਕ ਵਧਾਇਆ ਜਾਂਦਾ ਹੈ।”

ਆਪਣੀ ਅਰਜ਼ੀ ਵਿੱਚ ਐਸੋਸੀਏਸ਼ਨ ਨੇ ਅਕਾਦਮਿਕ ਸੈਸ਼ਨ 2025-26 ਲਈ ਪੰਜਾਬ ਦੇ ਗੈਰ-ਸਹਾਇਤਾ ਪ੍ਰਾਪਤ ਵਿਦਿਅਕ ਸੰਸਥਾਵਾਂ ਵਿੱਚ ਚਲਾਏ ਜਾ ਰਹੇ ਆਲ ਇੰਡੀਆ ਕੌਂਸਲ ਆਫ਼ ਟੈਕਨੀਕਲ ਐਜੂਕੇਸ਼ਨ (AICTE) ਦੁਆਰਾ ਪ੍ਰਵਾਨਿਤ ਵੱਖ-ਵੱਖ ਅੰਡਰ-ਗ੍ਰੈਜੂਏਟ (UG) ਕੋਰਸਾਂ ਦੀ ਕਾਉਂਸਲਿੰਗ ਅਤੇ ਦਾਖਲੇ ਲਈ ਕਟ-ਆਫ ਮਿਤੀ ਵਿੱਚ ਸੋਧ/ਵਧਾਉਣ ਦੀ ਮੰਗ ਕੀਤੀ ਸੀ।

PUCA ਦੇ ਪ੍ਰਧਾਨ ਅੰਸ਼ੂ ਕਟਾਰੀਆ , ਜੋ ਕਿ ਆਰੀਅਨ ਗਰੁੱਪ ਆਫ਼ ਕਾਲਜਿਜ਼, ਰਾਜਪੁਰਾ, ਚੰਡੀਗੜ੍ਹ ਦੇ ਚੇਅਰਮੈਨ ਵੀ ਹਨ, ਨੇ ਕਿਹਾ ਕਿ ਸੁਪਰੀਮ ਕੋਰਟ ਦਾ ਹੁਕਮ ਪੰਜਾਬ ਦੇ ਵਿਦਿਆਰਥੀਆਂ ਅਤੇ ਵਿਦਿਅਕ ਸੰਸਥਾਵਾਂ ਲਈ ਵੱਡੀ ਰਾਹਤ ਵਜੋਂ ਆਇਆ ਹੈ।