ਸੋਭਾ ਸਿੰਘ ਮਿਊਜ਼ੀਅਮ ਵੱਲੋਂ ਆਰਕਾਈਵਲ ਸੈਕਸ਼ਨ ਸ਼ੁਰੂ

ਚਿੱਤਰਕਾਰ ਸੋਭਾ ਸਿੰਘ ਦੇ 124ਵੇਂ ਜਨਮ ਦਿਨ ਮੌਕੇ ਸੋਭਾ ਸਿੰਘ ਮਿਊਜ਼ੀਅਮ ਨੇ ਪਹਿਲਾ ਆਰਕਾਈਵਲ ਸੈਕਸ਼ਨ ਸ਼ੁਰੂ ਕੀਤਾ ਹੈ। ਸੋਭਾ ਸਿੰਘ ਆਰਟ ਗੈਲਰੀ ਦੇ ਸੰਚਾਰ ਨਿਰਦੇਸ਼ਕ ਡਾ. ਹਿਰਦੇਪਾਲ ਸਿੰਘ ਨੇ ਦੱਸਿਆ ਕਿ ਇੱਥੇ ਸੈਲਾਨੀਆਂ ਨੂੰ ਚਿੱਤਰਕਾਰ ਦੇ ਰਚਨਾਤਮਕ ਸੰਸਾਰ, ਉਨ੍ਹਾਂ ਦੀ ਕਲਾ ਫਿਲਾਸਫੀ ਬਾਰੇ ਜਾਣਕਾਰੀ ਮਿਲੇਗੀ।

ਉਨ੍ਹਾਂ ਕਿਹਾ ਕਿ ਇੱਥੇ ਸੋਭਾ ਸਿੰਘ ਵੱਲੋਂ ਲਿਖੀਆਂ 50 ਚਿੱਠੀਆਂ ਪਹਿਲੀ ਵਾਰ ਪ੍ਰਦਰਸ਼ਿਤ ਕੀਤੀਆਂ ਗਈਆਂ ਹਨ। ਇਨ੍ਹਾਂ ਵਿੱਚ ਭਾਰਤ ਦੇ ਰਾਸ਼ਟਰਪਤੀ, ਰਾਜਪਾਲਾਂ, ਮੁੱਖ ਮੰਤਰੀਆਂ, ਕੇਂਦਰੀ ਮੰਤਰੀਆਂ, ਵਿਦੇਸ਼ੀ ਰਾਜਦੂਤਾਂ ਅਤੇ ਕੌਮੀ ਤੇ ਕੌਮਾਂਤਰੀ ਧਾਰਮਿਕ ਸੰਸਥਾਵਾਂ ਜਿਵੇਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ, ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀਆਂ ਚਿੱਠੀਆਂ ਵੀ ਸ਼ਾਮਲ ਹਨ। ਇਸ ਦੇ ਨਾਲ ਹੀ ਸੋਭਾ ਸਿੰਘ ਦੇ ਨੇੜਲੇ ਮਿੱਤਰਾਂ ਅਤੇ ਸਾਹਿਤਕ ਸ਼ਖ਼ਸੀਅਤਾਂ ਪ੍ਰਿਥਵੀਰਾਜ ਕਪੂਰ, ਬਲਰਾਜ ਸਾਹਨੀ, ਲੇਖਕ ਨਾਨਕ ਸਿੰਘ, ਅੰਮ੍ਰਿਤਾ ਪ੍ਰੀਤਮ, ਗੁਰਬਖਸ਼ ਸਿੰਘ ਪ੍ਰੀਤਲੜੀ ਵੱਲੋਂ ਲਿਖੀਆਂ ਚਿੱਠੀਆਂ ਵੀ ਪ੍ਰਦਰਸ਼ਨੀ ਦਾ ਹਿੱਸਾ ਹਨ।

ਇਨ੍ਹਾਂ ਵਿੱਚ ਜ਼ਿਆਦਾਤਰ ਸੰਸਥਾਵਾਂ ਦੀਆਂ ਚਿੱਠੀਆਂ ਟਾਈਪ ਕੀਤੀਆਂ ਹੋਈਆਂ ਹਨ, ਜਦੋਂਕਿ ਸੋਭਾ ਸਿੰਘ ਨੇ ਜੋ ਚਿੱਠੀਆਂ ਲੇਖਕ ਤੇ ਕਲਾਕਾਰ ਦੋਸਤਾਂ ਨਾਲ ਸਾਂਝੀਆਂ ਕੀਤੀਆਂ ਸਨ, ਉਹ ਹੱਥ ਲਿਖਤ ਹਨ। ਤਤਕਾਲੀ ਮੁੱਖ ਮੰਤਰੀ ਮਰਹੂਮ ਸੁਰਜੀਤ ਸਿੰਘ ਬਰਨਾਲਾ ਹਮੇਸ਼ਾਂ ਸਰਦਾਰ ਸੋਭਾ ਸਿੰਘ ਨੂੰ ਆਪਣਾ ਕਲਾ ਗੁਰੂ ਮੰਨਦੇ ਸਨ। ਉਹ ਸੋਭਾ ਸਿੰਘ ਨੂੰ ਹੱਥ ਲਿਖਤ ਚਿੱਠੀਆਂ ਹੀ ਭੇਜਦੇ ਸਨ। ਇਹ ਚਿੱਠੀਆਂ ਮਿਊਜ਼ੀਅਮ ਦੇ ਰਿਕਾਰਡ ਵਿੱਚ ਮੌਜੂਦ ਦੋ ਹਜ਼ਾਰ ਤੋਂ ਵੱਧ ਚਿੱਠੀਆਂ ਦੇ ਵੱਡੇ ਖ਼ਜ਼ਾਨੇ ਦਾ ਸਿਰਫ਼ ਛੋਟਾ ਹਿੱਸਾ ਹਨ। ਮਿਊਜ਼ੀਅਮ ਨੇ ਅਗਲੇ ਸਾਲ ਤੱਕ ਲਗਪਗ 200 ਮਹੱਤਵਪੂਰਨ ਚਿੱਠੀਆਂ ’ਤੇ ਆਧਾਰਿਤ ਸੰਪਾਦਿਤ ਪੁਸਤਕ ਪ੍ਰਕਾਸ਼ਿਤ ਕਰਨ ਦਾ ਵੀ ਐਲਾਨ ਕੀਤਾ ਹੈ।