ਡੈਮਾਂ ਤੋਂ ਪਾਣੀ ਛੱਡਣ ਕਾਰਨ ਕਈ ਇਲਾਕਿਆਂ ’ਚ ਸਥਿਤੀ ਨਾਜ਼ੁਕ

ਮਾਨਸਾ (ਜੋਗਿੰਦਰ ਸਿੰਘ ਮਾਨ): ਇੱਥੇ ਲਗਾਤਾਰ ਦੋ ਦਿਨਾਂ ਤੋਂ ਪੈ ਰਹੇ ਮੀਂਹ ਕਾਰਨ ਨਹਿਰੀ ਪਾਣੀ ਦੀ ਲੋੜ ਨਾ ਰਹਿਣ ’ਤੇ ਕਿਸਾਨਾਂ ਨੇ ਨਹਿਰਾਂ, ਰਜਬਾਹੇ, ਸੂਏ-ਕੱਸੀਆਂ ਦੇ ਮੋਘੇ ਬੰਦ ਕਰ ਦਿੱਤੇ ਹਨ। ਇਸ ਕਾਰਨ ਸੂਏ-ਕੱਸੀਆਂ ਵਿੱਚ ਪਾਣੀ ਓਵਰਫਲੋਅ ਹੋ ਗਿਆ ਹੈ। ਅਨੇਕਾਂ ਥਾਵਾਂ ’ਤੇ ਨਹਿਰਾਂ ਵਿੱਚ ਪਾਣੀ ਵਧਣ ਕਾਰਨ ਪਟੜੀਆਂ ਵਿੱਚ ਪਾੜ ਪੈਣ ਲੱਗੇ ਹਨ, ਜਿਸ ਸਦਕਾ ਹੜ੍ਹ ਦਾ ਖ਼ਤਰਾ ਖੜ੍ਹਾ ਹੋ ਗਿਆ ਹੈ। ਇਸ ਦੌਰਾਨ ਕਿਸਾਨ ਖੇਤਾਂ ਦੇ ਨਾਲ-ਨਾਲ ਨਹਿਰੀ ਪਟੜੀਆਂ ਦੀ ਰਾਖੀ ਵੀ ਕਰਨ ਲੱਗੇ ਹਨ। ਇਸ ਦੌਰਾਨ ਜਲ ਸਰੋਤ ਵਿਭਾਗ ਨੇ ਕਿਸਾਨਾਂ ਨੂੰ ਨਹਿਰਾਂ ਤੇ ਰਜਬਾਹਿਆਂ ਦੇ ਮੋਘੇ ਬੰਦ ਨਾ ਕਰਨ ਦੀ ਅਪੀਲ ਕੀਤੀ ਹੈ। ਬਠਿੰਡਾ ਨਹਿਰ ਅਤੇ ਗਰਾਊਂਡ ਵਾਟਰ ਮੰਡਲ ਜਲ ਸਰੋਤ ਵਿਭਾਗ ਦੇ ਕਾਰਜਕਾਰੀ ਇੰਜਨੀਅਰ ਜਗਮੀਤ ਸਿੰਘ ਭਾਖਰ ਅਤੇ ਨਹਿਰੀ ਵਿਭਾਗ ਮਾਨਸਾ ਸਥਿਤ ਕਾਰਜਕਾਰੀ ਇੰਜਨੀਅਰ ਗੁਰਸਾਗਰ ਸਿੰਘ ਚਹਿਲ ਨੇ ਕਿਸਾਨਾਂ ਨੂੰ ਬੇਨਤੀ ਕੀਤੀ ਹੈ ਕਿ ਆਪੋ-ਆਪਣੇ ਪਿੰਡਾਂ ਦੇ ਮੋਘੇ ਨਾ ਬੰਦ ਕੀਤੇ ਜਾਣ ਤਾਂ ਜੋ ਨਹਿਰਾਂ-ਰਜਬਾਹਿਆਂ ਵਿੱਚ ਪਾੜ ਪੈਣ ਕਾਰਨ ਹੁੰਦੇ ਨੁਕਸਾਨ ਤੋਂ ਬਚਾਇਆ ਜਾ ਸਕੇ।ਅੱਜ ਮਾਨਸਾ ਨੇੜਲੇ ਪਿੰਡ ਕੋਟਲੀ ਖੁਰਦ ਵਿੱਚ ਮੋਘੇ ਬੰਦ ਹੋਣ ਤੋਂ ਬਾਅਦ ਨਹਿਰ ਵਿੱਚ ਪਏ ਪਾੜ ਕਾਰਨ ਕਿਸਾਨਾਂ ਦੇ ਖੇਤਾਂ ਵਿੱਚ ਪਾਣੀ ਭਰ ਗਿਆ। ਕਿਸਾਨਾਂ ਵੱਲੋਂ ਤਲਵੰਡੀ ਸਾਬੋ ਪਾਵਰ ਲਿਮਟਿਡ (ਟੀਐੱਸਪੀਐੱਲ) ਦੇ ਸਹਿਯੋਗ ਨਾਲ ਇਸ ਪਾੜ ਨੂੰ ਪੂਰਨ ਦਾ ਕਾਰਜ ਆਰੰਭਿਆ ਗਿਆ ਹੈ। ਕਿਸਾਨਾਂ ਨੂੰ ਬਣਾਂਵਾਲਾ ਤਾਪਘਰ ਵੱਲੋਂ ਜੇਸੀਬੀ, ਬੰਨ੍ਹ ਲਾਉਣ ਲਈ ਰੇਤ ਦੀਆਂ ਬੋਰੀਆਂ ਅਤੇ ਕੁੱਝ ਵਿਅਕਤੀ ਮੌਕੇ ’ਤੇ ਭੇਜੇ ਗਏ ਅਤੇ ਆਥਣ ਤੱਕ ਪਾਣੀ ਦੇ ਵਹਾਅ ਨੂੰ ਰੋਕਣ ਅਤੇ ਬਚਾਅ ਲਈ ਕੰਮ ਸ਼ੁਰੂ ਕੀਤਾ ਗਿਆ। ਉਧਰ, ਭਾਰਤੀ ਕਿਸਾਨ ਯੂਨੀਅਨ (ਏਕਤਾ ਉਗਰਾਹਾਂ) ਦੇ ਜ਼ਿਲ੍ਹਾ ਪ੍ਰਧਾਨ ਰਾਮ ਸਿੰਘ ਭੈਣੀਬਾਘਾ ਨੇ ਦੱਸਿਆ ਭੈਣੀਬਾਘਾ ਰਜਬਾਹੇ ਦੇ ਮੋਘੇ ਬੰਦ ਹੋਣ ਕਾਰਨ ਨਹਿਰੀ ਪਟੜੀ ਦਾ ਵੱਡਾ ਹਿੱਸਾ ਬੈਠ ਗਿਆ, ਜਿਸ ਕਾਰਨ ਪਿੰਡਾਂ ਦੇ ਲੋਕਾਂ ਨੇ ਆਪਣੇ ਪੱਧਰ ’ਤੇ ਫ਼ਸਲਾਂ ਦੇ ਬਚਾਅ ਲਈ ਪਟੜੀ ਨੂੰ ਮਿੱਟੀ ਦੀਆਂ ਬੋਰੀਆਂ ਲਗਾ ਕੇ ਮਜ਼ਬੂਤ ਕੀਤਾ ਹੈ। ਪੰਜਾਬ ਕਿਸਾਨ ਯੂਨੀਅਨ ਦੇ ਸੂਬਾ ਆਗੂ ਗੁਰਨਾਮ ਸਿੰਘ ਭੀਖੀ ਨੇ ਦੱਸਿਆ ਕਿ ਭੀਖੀ ਇਲਾਕੇ ਦੇ ਸਾਰੇ ਰਜਬਾਹੇ ਪਾਣੀ ਨਾਲ ਓਵਰਫਲੋਅ ਹੋ ਗਏ ਹਨ ਅਤੇ ਪਾਣੀ ਨਹਿਰਾਂ ਦੇ ਉਤੋਂ ਦੀ ਖੇਤਾਂ ਵਿੱਚ ਜਾਣ ਲੱਗਿਆ ਹੈ ਅਤੇ ਕਿਸੇ ਵੇਲੇ ਵੀ ਇਹ ਪਟੜੀਆਂ ਖੁਰ ਸਕਦੀਆਂ ਹਨ।