ਮਣੀਮਹੇਸ਼ ਗਏ ਸ਼ਰਧਾਲੂ ਸੁਰੱਖਿਅਤ ਪਰਤੇ

ਇੱਥੋਂ ਮਣੀਮਹੇਸ਼ ਦੀ ਯਾਤਰਾ ’ਤੇ ਦਸ ਦਿਨ ਪਹਿਲਾਂ ਗਏ ਸ਼ਰਧਾਲੂ ਬੱਦਲ ਫਟਣ ਦੀਆਂ ਘਟਨਾਵਾਂ ਤੋਂ ਬਾਅਦ ਸੁਰੱਖਿਅਤ ਪਰਤ ਆਏ ਹਨ। ਜ਼ਿਲ੍ਹਾ ਫ਼ਰੀਦਕੋਟ ਨਾਲ ਸਬੰਧਤ ਬੰਟੀ ਅਰੋੜਾ ਤੇ ਗੁਰਦਿੱਤ ਸਿੰਘ ਨੇ ਦੱਸਿਆ ਕਿ ਮਣੀ ਮਹੇਸ਼ ਤੋਂ ਵਾਪਸੀ ’ਤੇ ਉਹ ਜਦੋਂ ਭਰਮੌਰ ਸ਼ਹਿਰ ਪਹੁੰਚੇ ਤਾਂ ਬੱਦਲ ਫਟ ਗਿਆ। ਉੱਥੇ ਸੈਂਕੜੇ ਸ਼ਰਧਾਲੂ ਫਸ ਗਏ। ਉੱਥੇ ਇੰਟਰਨੈੱਟ ਬੰਦ ਹੋ ਗਿਆ। ਪੈਸੇ ਖ਼ਤਮ ਹੋਣ ਕਰ ਕੇ ਉਨ੍ਹਾਂ ਆਪਣਾ ਜ਼ਰੂਰੀ ਸਾਮਾਨ ਵੇਚ ਕੇ ਗੁਜ਼ਾਰਾ ਕੀਤਾ। ਸ੍ਰੀ ਅਰੋੜਾ ਨੇ ਦੱਸਿਆ ਲਗਪਗ 500 ਸ਼ਰਧਾਲੂਆਂ ਨੇ ਚੰਬਾ ਤੱਕ 65 ਕਿਲੋਮੀਟਰ ਦਾ ਸਫ਼ਰ ਪੈਦਲ ਚੱਲ ਕੇ 17 ਘੰਟਿਆਂ ਵਿੱਚ ਪੂਰਾ ਕੀਤਾ। ਉਨ੍ਹਾਂ ਦੱਸਿਆ ਕਿ ਨਾਲਿਆਂ ਦੇ ਪੁਲ ਰੁੜ੍ਹ ਗਏ ਹਨ ਅਤੇ ਸੜਕਾਂ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ ਹਨ। ਉਨ੍ਹਾਂ ਕਿਹਾ ਕਿ ਹਿਮਾਚਲ ਸਰਕਾਰ ਜਾਂ ਪ੍ਰਸ਼ਾਸਨ ਨੇ ਉਨ੍ਹਾਂ ਦੀ ਕੋਈ ਮਦਦ ਨਹੀਂ ਕੀਤੀ ਲੋਕਾਂ ਨੇ ਪੀੜਤਾਂ ਲਈ ਲੰਗਰ ਲਾਏ ਸਨ। 

ਹਫ਼ਤਾ ਲਾਪਤਾ ਰਹੇ ਭੋਗਪੁਰ ਦੇ 16 ਸ਼ਰਧਾਲੂ

ਭੋਗਪੁਰ (ਬਲਵਿੰਦਰ ਸਿੰਘ ਭੰਗੂ): ਮਣੀਮਹੇਸ਼ ਦੀ ਯਾਤਰਾ ’ਤੇ ਗਏ ਭੋਗਪੁਰ ਇਲਾਕੇ ਦੇ ਦੋ ਕਾਰ ਡਰਾਈਵਰ ਤੇ ਪੱਤਰਕਾਰ ਸਣੇ 16 ਸ਼ਰਧਾਲੂ ਕਰੀਬ ਹਫ਼ਤਾ ਲਾਪਤਾ ਰਹੇ। ਪੱਤਰਕਾਰ ਜਸਵੀਰ ਸਿੰਘ ਸੈਣੀ ਨੇ ਅੱਜ ਸਵੇਰੇ ਚੰਬਾ ਸ਼ਹਿਰ ਨੇੜੇ ਆ ਕੇ ਫੋਨ ਕਰ ਕੇ ਉਨ੍ਹਾਂ ਦੇ ਸੁਰੱਖਿਅਤ ਹੋਣ ਦੀ ਸੂਚਨਾ ਦਿੱਤੀ। ਉਨ੍ਹਾਂ ਦੱਸਿਆ ਕਿ 22 ਅਗਸਤ ਨੂੰ 16 ਸ਼ਰਧਾਲੂਆਂ ਦਾ ਜਥਾ ਮਣੀ ਮਹੇਸ਼ ਦੇ ਦਰਸ਼ਨਾਂ ਲਈ ਗਿਆ ਸੀ। ਚੰਬਾ ਜ਼ਿਲ੍ਹੇ ਦੇ ਭਰਮੌਰ ਵਿੱਚ ਬੱਦਲ ਫਟਣ ਕਾਰਨ ਸਾਰੇ ਰਸਤੇ ਬੰਦ ਹੋ ਗਏ। ਬਿਜਲੀ ਅਤੇ ਟਾਵਰ ਬੰਦ ਹੋਣ ਕਰ ਕੇ ਉਨ੍ਹਾਂ ਦੇ ਫੋਨ ਵੀ ਬੰਦ ਹੋ ਗਏ। ਉਹ ਪਹਾੜੀ ਰਸਤਿਆਂ ਰਾਹੀਂ ਕਰੀਬ 80 ਕਿਲੋਮੀਟਰ ਦਾ ਸਫ਼ਰ ਤਹਿ ਕਰ ਕੇ ਚੰਬਾ ਸ਼ਹਿਰ ਪੁੱਜੇ ਜਿੱਥੋਂ ਬੱਸਾਂ ਰਾਹੀਂ ਆਪਣੇ ਘਰਾਂ ਨੂੰ ਜਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਭਰਮੌਰ ਇਲਾਕੇ ’ਚ ਫਸੇ ਵੱਡੀ ਗਿਣਤੀ ਸ਼ਰਧਾਲੂਆਂ ਦੀ ਹਿਮਾਚਲ ਪ੍ਰਦੇਸ਼ ਸਰਕਾਰ ਕੋਈ ਸਹਾਇਤਾ ਨਹੀਂ ਕਰ ਰਹੀ। ਸਥਾਨਕ ਲੋਕ ਹੀ ਸ਼ਰਧਾਲੂਆਂ ਦੀ ਮਦਦ ਕਰ ਰਹੇ ਹਨ। ਵਿਧਾਇਕ ਸੁਖਵਿੰਦਰ ਸਿੰਘ ਕੋਟਲੀ ਨੇ ਕੇਂਦਰ ਤੇ ਪੰਜਾਬ ਸਰਕਾਰ ਨੂੰ ਸ਼ਰਧਾਲੂਆਂ ਦੀ ਮਦਦ ਦੀ ਅਪੀਲ ਕੀਤੀ ਹੈ।