ਕਾਂਗਰਸ: ਖਾਲਾ ਜੀ ਦਾ ਵਾੜਾ ਨਹੀਂ ਹੈ ਪੰਜਾਬ

ਤਰਨ ਤਾਰਨ ਜ਼ਿਮਨੀ ਚੋਣ ਦਾ ਨਤੀਜਾ ਪੰਜਾਬ ਕਾਂਗਰਸ ਲਈ ਸੁਨੇਹਾ ਹੈ ਕਿ ਪੰਜਾਬ ਜਿੱਤਣਾ ਖਾਲਾ ਜੀ ਦਾ ਵਾੜਾ ਨਹੀਂ। ਪੰਜਾਬ ਕਾਂਗਰਸ ਦੇ ਉਮੀਦਵਾਰ ਕਰਨਬੀਰ ਸਿੰਘ ਨੂੰ ਇਸ ਜ਼ਿਮਨੀ ਚੋਣ ’ਚ ਮਹਿਜ਼ 15,078 ਵੋਟਾਂ ਪਈਆਂ। ਪਹਿਲੀ ਵਾਰ ਕਾਂਗਰਸ ਦੀ ਜ਼ਮਾਨਤ ਜ਼ਬਤ ਹੋਈ ਹੈ। ਨੌਂ ਜ਼ਿਮਨੀ ਚੋਣਾਂ ’ਚੋਂ ਪਹਿਲੀ ਵਾਰ ਹੋਇਆ ਹੈ ਕਿ ਕਾਂਗਰਸ ਚੌਥੇ ਥਾਂ ’ਤੇ ਖਿਸਕ ਗਈ ਹੈ। ਤਰਨ ਤਾਰਨ ’ਚ ਕਾਂਗਰਸ ਨੂੰ ਸਿਰਫ਼ 12.81 ਫ਼ੀਸਦੀ ਵੋਟ ਮਿਲੇ ਹਨ ਜੋ ਹੁਣ ਤੱਕ ਹੋਈਆਂ ਵਿਧਾਨ ਸਭਾ ਦੀਆਂ ਜ਼ਿਮਨੀ ਚੋਣਾਂ ’ਚੋਂ ਸਭ ਤੋਂ ਘੱਟ ਹਨ।

ਲੋਕ ਸਭਾ ਚੋਣਾਂ 2024 ’ਚ ਲੋਕਾਂ ਨੇ ਕਾਂਗਰਸ ਦੀ ਝੋਲੀ ਸੱਤ ਸੀਟਾਂ ਪਾਈਆਂ ਸਨ ਅਤੇ ਜ਼ਿਮਨੀ ਚੋਣ ਬਰਨਾਲਾ ’ਚ ਪਾਰਟੀ ਦਾ ਉਮੀਦਵਾਰ ਕੁਲਦੀਪ ਸਿੰਘ ਜੇਤੂ ਰਿਹਾ ਸੀ। ਡੇਰਾ ਬਾਬਾ ਨਾਨਕ ਦੀ ਉਪ ਚੋਣ ’ਚ ਕਾਂਗਰਸ ਨੂੰ ਸਭ ਤੋਂ ਵੱਧ 43.38 ਫ਼ੀਸਦੀ ਵੋਟ ਹਿੱਸੇਦਾਰੀ ਮਿਲੀ ਸੀ। ਕਾਂਗਰਸ ਤਰਫ਼ੋਂ ਜਦੋਂ ਕਰਨਬੀਰ ਸਿੰਘ ਨੂੰ ਉਮੀਦਵਾਰ ਐਲਾਨਿਆ ਸੀ ਤਾਂ ਉਸ ਵਕਤ ਹੀ ਸੁਆਲ ਉੱਠਣ ਲੱਗ ਪਏ ਸਨ। ਕਾਂਗਰਸ ਬੱਝਵੇਂ ਰੂਪ ’ਚ ਇਸ ਹਲਕੇ ’ਚ ਆਪਣੀ ਚੋਣ ਮੁਹਿੰਮ ਭਖਾ ਹੀ ਨਹੀਂ ਸਕੀ। ਕਾਂਗਰਸ ਪ੍ਰਧਾਨ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਬੋਲ ਬਾਣੀ ਕਾਰਨ ਚੋਣ ਮੁਹਿੰਮ ਦੌਰਾਨ ਵਿਵਾਦਿਤ ਚਿਹਰਾ ਬਣੇ ਰਹੇ। ਪਹਿਲੇ ਬਿਆਨ ’ਚ ਉਨ੍ਹਾਂ ਖ਼ਾਲਿਸਤਾਨ ਦੀ ਚਰਚਾ ਛੇੜੀ ਤੇ ਉਸ ਮਗਰੋਂ ਸਾਬਕਾ ਗ੍ਰਹਿ ਮੰਤਰੀ ਬੂਟਾ ਸਿੰਘ ਦੇ ਮਾਮਲੇ ’ਤੇ ਅਪਮਾਨਜਨਕ ਟਿੱਪਣੀ ਕੀਤੀ। ਕਾਂਗਰਸ ਲੀਡਰਸ਼ਿਪ ਦੇ ਸੁਰ ਵੀ ਆਪਸ ’ਚ ਨਾ ਮਿਲੇ।

ਮਾਝੇ ਦੇ ਲੋਕਾਂ ਨੇ ਕਾਂਗਰਸ ਦੇ ਪੋਚਵੇਂ ਕੱਪੜਿਆਂ ਵਾਲੇ ਲੀਡਰਾਂ ਨੂੰ ਪਸੰਦ ਨਹੀਂ ਕੀਤਾ। ਸੂਤਰ ਦੱਸਦੇ ਹਨ ਕਿ ਕਾਂਗਰਸ ਨੇਤਾਵਾਂ ਨੇ ਚੋਣ ਪ੍ਰਚਾਰ ਦੌਰਾਨ ਖ਼ਰਚਾ ਕਰਨ ’ਚ ਵੀ ਕੰਜੂਸੀ ਵਰਤੀ। ਕਾਂਗਰਸ ਕਿਸੇ ਵੀ ਪੜਾਅ ’ਤੇ ਚੋਣ ਪ੍ਰਚਾਰ ’ਚ ਲੋਕਾਂ ਅੱਗੇ ਜੇਤੂ ਪ੍ਰਭਾਵ ਸਿਰਜ ਹੀ ਨਹੀਂ ਸਕੀ। ਪਿਛਲੇ ਸਮੇਂ ਤੋਂ ਕਾਂਗਰਸ ਲੀਡਰਸ਼ਿਪ ਅਗਲੀਆਂ ਵਿਧਾਨ ਸਭਾ ਚੋਣਾਂ ’ਚ ਸੱਤਾ ਹਾਸਲ ਕਰਨ ਨੂੰ ਯਕੀਨੀ ਮੰਨ ਕੇ ਚੱਲ ਰਹੀ ਹੈ ਪਰ ਪਾਰਟੀ ਅੰਦਰ ਮੁੱਖ ਮੰਤਰੀ ਦੇ ਦਾਅਵੇਦਾਰ ਚਿਹਰੇ ਇੱਕ-ਦੂਜੇ ਨੂੰ ਠਿੱਬੀ ਲਾਉਣ ਦੀ ਤਾਕ ਵਿੱਚ ਰਹਿੰਦੇ ਹਨ। ਇੱਕ ਸਮਾਂ ਉਹ ਵੀ ਸੀ ਜਦੋਂ ਆਮ ਲੋਕਾਂ ਨੇ ਸਿਆਸੀ ਟੇਵੇ ਲਾਉਣੇ ਸ਼ੁਰੂ ਕਰਕੇ ਕਾਂਗਰਸ ਵੱਲ ਦੇਖਣਾ ਸ਼ੁਰੂ ਕਰ ਦਿੱਤਾ ਸੀ ਪ੍ਰੰਤੂ ਕਾਂਗਰਸ ਲੀਡਰਾਂ ਦਾ ਆਪਸੀ ਕਾਟੋ ਕਲੇਸ਼ ਹੀ ਆਮ ਲੋਕਾਂ ਨੂੰ ਨਿਰਾਸ਼ ਕਰਨ ਵਾਲਾ ਹੈ। ਕੱਦਾਵਰ ਅਤੇ ਭਰੋਸੇ ਵਾਲੇ ਨੇਤਾ ਦੀ ਕਮੀ ਸਿੱਧੇ ਰੂਪ ’ਚ ਕਾਂਗਰਸ ’ਚ ਰੜਕ ਰਹੀ ਹੈ। ਪੰਜਾਬ ’ਚ ਵਿਰੋਧੀ ਧਿਰ ਵਾਲੀ ਸਾਰਥਿਕ ਭੂਮਿਕਾ ਵੀ ਕਾਂਗਰਸ ਨਿਭਾਉਣ ਵਿਚ ਅਸਫਲ ਰਹੀ ਹੈ। ਕਾਂਗਰਸੀ ਲੀਡਰਾਂ ਨੇ ਖ਼ੁਦ ਨੂੰ ਪ੍ਰੈੱਸ ਕਾਨਫਰੰਸਾਂ ਅਤੇ ਸੋਸ਼ਲ ਮੀਡੀਆ ’ਤੇ ਬਿਆਨ ਜਾਰੀ ਕਰਨ ਤੱਕ ਸੀਮਤ ਰੱਖਿਆ ਹੈ। ਲੋਕ ਆਵਾਜ਼ ਬਣਨ ਲਈ ਕਾਂਗਰਸੀ ਸੜਕਾਂ ’ਤੇ ਉੱਤਰਨ ਤੋਂ ਗੁਰੇਜ਼ ਕਰਦੇ ਰਹੇ। ਕਾਂਗਰਸ ਹਾਈਕਮਾਨ ਨੇ ਕਦੇ ਵੀ ਪੰਜਾਬ ਕਾਂਗਰਸ ਦੀ ਅਨੁਸ਼ਾਸਨਹੀਣਤਾ ਨੂੰ ਸੰਜੀਦਗੀ ਨਾਲ ਨਹੀਂ ਲਿਆ।

ਜ਼ਿਮਨੀ ਚੋਣਾਂ ’ਚ ਕਾਂਗਰਸ ਦਾ ਵੋਟ ਸ਼ੇਅਰ

ਤਰਨ ਤਾਰਨ                       12.81 ਫ਼ੀਸਦੀ

ਲੁਧਿਆਣਾ ਪੱਛਮੀ                  27.22 ਫ਼ੀਸਦੀ

ਜਲੰਧਰ ਪੱਛਮੀ                     17.84 ਫ਼ੀਸਦੀ

ਡੇਰਾ ਬਾਬਾ ਨਾਨਕ                43.38 ਫ਼ੀਸਦੀ

ਚੱਬੇਵਾਲ                            27.46 ਫ਼ੀਸਦੀ

ਬਰਨਾਲਾ                             28.41 ਫ਼ੀਸਦੀ

ਗਿੱਦੜਬਾਹਾ                        36.40 ਫ਼ੀਸਦੀ

ਸੰਗਰੂਰ ਲੋਕ ਸਭਾ                11.20 ਫ਼ੀਸਦੀ

ਜਲੰਧਰ ਲੋਕ ਸਭਾ                 27.44 ਫ਼ੀਸਦੀ