ਬੀਕੇਯੂ ਸਿੱਧੂਪਰ ਵੱਲੋਂ ਵੜਿੰਗ ਟੋਲ ਪਲਾਜ਼ਾ ਪੱਕੇ ਤੌਰ ’ਤੇ ਬੰਦ

ਪੰਜਾਬ ਸਰਕਾਰ ਅਧੀਨ ਪੈਂਦੇ ਵੜਿੰਗ ਟੋਲ ਪਲਾਜ਼ਾ ਨੂੰ ਲੈ ਕੇ ਬੇਹਦ ਸਖ਼ਤ ਹੋਏ ਪ੍ਰਸ਼ਾਸਨ ਨੇ ਹੁਣ ਭਾਵੇਂ ਹੁਣ ਯੂ -ਟਰਨ ਲੈਂਦਿਆਂ ਜ਼ਿਲ੍ਹਾ ਜੇਲ੍ਹ ਵਿੱਚ ਬੰਦ ਕੀਤੇ 66 ਧਰਨਾਕਾਰੀਆਂ ਨੂੰ ਬਿਨ੍ਹਾਂ ਸ਼ਰਤ ਰਿਹਾਅ ਕਰ ਦਿੱਤਾ ਹੈ ਪਰ ਟੋਲ ਕੰਪਨੀ ਪਾਸੋਂ ਨਹਿਰਾਂ ਉੱਪਰ ਪੁੱਲ ਬਣਾਉਣ ਨੂੰ ਲੈ ਕੇ ਅਜੇ ਵੀ ਦੁਬਿਧਾ ਬਰਕਰਾਰ ਹੈ।

ਦੱਸਣ ਯੋਗ ਹੈ ਕਿ ਮੁਕਤਸਰ-ਕੋਟਕਪੂਰਾ ਸੜਕ ਉੱਪਰ ਰਾਜਸਥਾਨ ਫੀਡਰ ਅਤੇ ਸਰਹੰਦ ਕੈਨਾਲ ਨਹਿਰਾਂ ਲੰਘਦੀਆਂ ਹਨ। ਪੰਜਾਬ ਸਰਕਾਰ ਨੇ ਅੱਠ ਸਾਲ ਪਹਿਲਾਂ ਟੋਲ ਸ਼ੁਰੂ ਹੋਣ ਵੇਲੇ ਟੋਲ ਕੰਪਨੀ ਨੂੰ ਨਹਿਰਾਂ ਉੱਪਰ ਪੁੱਲ ਬਣਾਉਣ ਦਾ ਹੁਕਮ ਵੀ ਦਿੱਤਾ ਸੀ। ਕੰਪਨੀ ਨੇ ਕੰਮ ਸ਼ੁਰੂ ਵੀ ਕਰ ਦਿੱਤਾ ਸੀ। ਪਰ ਬਾਅਦ ਵਿੱਚ ਟੋਲ ਤਾਂ ਚੱਲਦਾ ਰਿਹਾ ਪਰ ਪੁੱਲ ਨਹੀਂ ਬਣੇ।

ਭੀੜੇ ਪੁੱਲਾਂ ਕਰਕੇ ਇੱਕ ਬੱਸ ਹਾਦਸਾ ਹੋਇਆ ਜਿਸ ਨਾਲ ਅੱਠ ਸਵਾਰੀਆਂ ਦੀ ਮੌਤ ਹੋ ਗਈ। ਉਸ ਤੋਂ ਬਾਅਦ ਲੋਕ ਧਿਰਾਂ ਵੱਲੋਂ ਟੋਲ ਕੰਪਨੀ ਖਿਲਾਫ਼ ਮੁਜ਼ਾਹਰੇ ਸ਼ੁਰੂ ਹੋ ਗਏ ਅਤੇ ਕਈ ਵਾਰ ਟੋਲ ਪਲਾਜ਼ਾ ਬੰਦ ਕੀਤਾ ਗਿਆ।

ਪ੍ਰਸ਼ਾਸਨ ਵੱਲੋਂ ਹਰ ਵਾਰ ਪੁੱਲ ਬਣਾਉਣ ਦਾ ਭਰੋਸਾ ਦੇ ਕੇ ਧਰਨੇ ਹਟਵਾ ਦਿੱਤੇ ਜਾਂਦੇ ਸਨ। ਇਸੇ ਲੜੀ ਤਹਿਤ ਹੁਣ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਸਿੱਧੂਪੁਰ ਵੱਲੋਂ ਧਰਨਾ ਲਾ ਕੇ ਟੋਲ ਬੰਦ ਕਰਵਾ ਦਿੱਤਾ ਗਿਆ ਤਾਂ ਸਖ਼ਤ ਹੋਏ ਪ੍ਰਸ਼ਾਸਨ ਨੇ ਦੋ ਦਿਨਾਂ ਵਿੱਚ ਜਥੇਬੰਦੀ ਦੇ 66 ਆਗੂ ਤੇ ਮੈਂਬਰ ਮੁਕਦਮੇ ਦਰਜ ਕਰਕੇ ਜੇਲ੍ਹ ਭੇਜ ਦਿੱਤੇ । ਇਸ ਤੇ ਇਹ ਮਾਮਲਾ ਸੂਬਾ ਪੱਧਰ ਤੇ ਪਹੁੰਚ ਗਿਆ ਤਾਂ ਪ੍ਰਸ਼ਾਸਨ ਨੇ ਯੂ-ਟਰਨ ਲੈਂਦਿਆਂ ਜਥੇਬੰਦੀ ਦੇ ਸੂਬਾ ਪ੍ਰਧਾਨ ਜਗਜੀਤ ਸਿੰਘ ਡੱਲੇਵਾਲ ਨਾਲ ਬੈਠਕ ਉਪਰੰਤ ਸਾਰੇ ਧਰਨਾਕਾਰੀਆਂ ਨੂੰ ਜੇਲ੍ਹ ਵਿੱਚੋਂ ਰਿਹਾਅ ਕਰ ਦਿੱਤਾ।

ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਜਥੇਬੰਦੀ ਦੇ ਆਗੂ ਹਰਜਿੰਦਰ ਸਿੰਘ ਨੇ ਦੱਸਿਆ ਕਿ ਪ੍ਰਸ਼ਾਸਨ ਨੇ ਭਰੋਸਾ ਦਿੱਤਾ ਹੈ ਕਿ ਜਦੋਂ ਤੱਕ ਪੁੱਲ ਨਹੀਂ ਬਣਦੇ ਉਦੋਂ ਤੱਕ ਟੋਲ ਨਹੀਂ ਚੱਲੇਗਾ ਪਰ ਦੂਜੇ ਪਾਸੇ ਪ੍ਰਸ਼ਾਸਨ ਅਜੇ ਤੱਕ ਸ਼ਸ਼ੋਪੰਜ ਵਿੱਚ ਪਿਆ ਹੋਇਆ ਦਿਖਾਈ ਦਿੰਦਾ ਹੈ।