ਹੜ੍ਹ ਪੀੜਤਾਂ ਪ੍ਰਤੀ ਪੰਜਾਬ ਸਰਕਾਰ ਦਾ ਬੇਰੁਖੀ ਵਾਲ਼ਾ ਵਤੀਰਾ ਨਿੰਦਣਯੋਗ: ਹਰਪਾਲਪੁਰ

ਪੰਜਾਬ ਵਿੱਚ ਆਏ ਹੜ੍ਹਾਂ ਨੇ ਜਿਸ ਕਦਰ ਲੋਕਾਂ ਦਾ ਭਾਰੀ ਜਾਨੀ ਤੇ ਮਾਲੀ ਨੁਕਸਾਨ ਕੀਤਾ ਹੈ ਉਸ ਵਿਚੋਂ ਉਭਰਨ ਲਈ ਕਾਫ਼ੀ ਸਮਾਂ ਲੱਗੇਗਾ ਪਰ ਇਸ ਤੋਂ ਪਹਿਲਾਂ ਮੁਢਲੇ ਤੌਰ ’ਤੇ ਲੋਕਾਂ ਨੂੰ ਲੋੜੀਂਦੀਆਂ ਬੁਨਿਆਦੀ ਸਹੂਲਤਾਂ ਬੇਹੱਦ ਜ਼ਰੂਰੀ ਹਨ। ਇਹ ਪ੍ਰਗਟਾਵਾ ਪੰਜਾਬ ਖਾਦੀ ਅਤੇ ਗ੍ਰਾਮ ਉਦਯੋਗ ਬੋਰਡ ਦੇ ਸਾਬਕਾ ਸੂਬਾਈ ਚੇਅਰਮੈਨ ਅਤੇ ਹਲਕਾ ਘਨੌਰ ਤੋਂ ਭਾਜਪਾ ਦੇ ਮੈਂਬਰਸ਼ਿਪ ਇੰਚਾਰਜ ਹਰਵਿੰਦਰ ਸਿੰਘ ਹਰਪਾਲਪੁਰ ਨੇ ਅੱਜ ਇਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕੀਤਾ। ਹਰਪਾਲਪੁਰ ਨੇ ਕਿਹਾ ਕਿ ਹਕੂਮਤਾਂ ਦਾ ਫਰਜ ਹੁੰਦਾ ਹੈ ਕਿ ਔਖੀ ਘੜੀ ਪਰਜਾ ਦੀ ਬਾਂਹ ਫੜ ਕੇ ਉਸ ਨੂੰ ਮੁੜ ਤੋਂ ਪੈਰਾਂ ਸਿਰ ਕਰਨ ਦਾ ਸਹਾਰਾ ਬਣੇ ਪਰ ਪੰਜਾਬ ਸਰਕਾਰ ਹੈ ਕਿ ਫੋਕੇ ਦਮਗਜੇ ਮਾਰਨ ਜੋਗੀ ਹੀ ਰਹਿ ਗਈ ਤੇ ਹੋਏ ਨੁਕਸਾਨ ਦੀ ਭਰਪਾਈ ਵਜੋਂ ਮੁਆਵਜੇ ਦੇ ਰੂਪ ’ਚ ਫੁੱਟੀ ਕੌਡੀ ਵੀ ਰਾਹਤ ਨਹੀਂ ਦਿੱਤੀ ਗਈ। ਭਾਜਪਾ ਆਗੂ ਹਰਵਿੰਦਰ ਹਰਪਾਲਪੁਰ ਨੇ ਕਿਹਾ ਕਿ ਮੋਦੀ ਸਰਕਾਰ ਵੱਲੋਂ ਫੌਰੀ ਰਾਹਤ ਵਜੋਂ ਦਿੱਤੀ 1600 ਕਰੋੜ ਦੀ ਰਾਸ਼ੀ ਨੂੰ ਥੋੜ੍ਹੀ ਕਹਿ ਕੇ ਭੰਡ ਰਹੀ ‘ਆਪ’ ਲੀਡਰਸ਼ਿਪ ਅਤੇ ਸਰਕਾਰ ਖੁਦ ਲੋਕ ਸਹਾਰਾ ਬਣਨ ਦੇ ਮਾਮਲੇ ’ਚ ਨਿਕੰਮੀ ਸਾਬਤ ਹੋਈ ਹੈ।