ਡੀ ਏ ਪੀ ਤੇ ਯੂਰੀਆ ਨਾ ਮਿਲਣ ਕਾਰਨ ਕਿਸਾਨ ਪ੍ਰੇਸ਼ਾਨ

ਸਹਿਕਾਰੀ ਸੁਸਾਇਟੀਆਂ ਵਿੱਚ ਡੀ ਏ ਪੀ ਅਤੇ ਯੂਰੀਆ ਖਾਦ ਨਾ ਮਿਲਣ ਕਾਰਨ ਕਿਸਾਨ ਪ੍ਰੇਸ਼ਾਨ ਹਨ। ਪਿੰਡ ਸ਼ੁਤਰਾਣਾ ਦੇ ਸਾਬਕਾ ਸਰਪੰਚ ਸਤਨਾਮ ਸਿੰਘ, ਸਹਿਕਾਰੀ ਸਭਾ ਸ਼ੁਤਰਾਣਾ ਦੇ ਪ੍ਰਧਾਨ ਰਾਜ ਸਿੰਘ ਝੱਬਰ, ਸਾਬਕਾ ਸਰਪੰਚ ਵਧਾਵਾ ਸਿੰਘ, ਸਾਬਕਾ ਸਰਪੰਚ ਭਗਵੰਤ ਸਿੰਘ ਅਤੇ ਨੰਬਰਦਾਰ ਅਮਰੀਕ ਸਿੰਘ ਨੇ ਦੱਸਿਆ ਕਿ ਸਹਿਕਾਰੀ ਸਭਾ ਸ਼ੁਤਰਾਣਾ ਦੇ 1200 ਮੈਂਬਰਾਂ ਨੇ ਕਾਫ਼ੀ ਸਮਾਂ ਪਹਿਲਾਂ 4000 ਗੱਟੇ ਡੀ ਏ ਪੀ ਖਾਦ ਦੀ ਮੰਗ ਕੀਤੀ ਸੀ ਪਰ ਹੁਣ ਤੱਕ ਸਿਰਫ਼ 700 ਟੀ ਐੱਸ ਪੀ ਅਤੇ 700 ਬੈਗ ਐੱਨ ਪੀ ਕੇ ਖਾਦ ਭੇਜੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਟੀ ਐੱਸ ਪੀ ਖਾਦ ਵਿੱਚ ਨਾਈਟ੍ਰੋਜਨ ਨਹੀਂ ਹੁੰਦੀ ਜਿਸ ਕਾਰਨ ਕਿਸਾਨਾਂ ਦੀ ਕਣਕ ਉੱਗਣ ਸਮੇਂ ਨਾਈਟ੍ਰੋਜਨ ਦੀ ਥੋੜ੍ਹ ਕਾਰਨ ਕਮਜ਼ੋਰ ਰਹਿ ਜਾਂਦੀ ਹੈ ਅਤੇ ਐੱਨ ਪੀ ਕੇ ਖਾਦ ਵਿੱਚ ਫਾਸਫੋਰਸ ਦੀ ਪੂਰੀ ਮਾਤਰਾ ਨਹੀਂ ਹੁੰਦੀ। ਕਿਸਾਨ ਇਨ੍ਹਾਂ ਖਾਦਾਂ ਨੂੰ ਖਰੀਦ ਨਹੀਂ ਰਹੇ। ਉਨ੍ਹਾਂ ਸਰਕਾਰ ’ਤੇ ਦੋਸ਼ ਲਾਇਆ ਹੈ ਕਿ ਸਹਿਕਾਰੀ ਸਭਾਵਾਂ ਵਿੱਚ ਜਾਣਬੁੱਝ ਕੇ ਮੰਗ ਮੁਤਾਬਕ ਡੀ ਏ ਪੀ ਨਹੀਂ ਭੇਜੀ ਜਾ ਰਹੀ। ਕਣਕ ਦੀ ਬਜਾਈ ਦਾ ਸਮਾਂ ਆਉਣ ਕਰਕੇ ਬਾਜ਼ਾਰ ਵਿੱਚ 1350 ਰੁਪਏ ਵਾਲਾ ਡੀ ਏ ਪੀ ਦਾ ਗੱਟਾ 1800 ਰੁਪਏ ਤੋਂ ਵੱਧ ਕੀਮਤ ਵਿੱਚ ਮਿਲ ਰਿਹਾ ਹੈ। 267 ਰੁਪਏ ਮਿਲਣ ਵਾਲਾ ਯੂਰੀਆ 350 ਰੁਪਏ ਤੋਂ ਵੱਧ ਕੀਮਤ ’ਤੇ ਖਰੀਦਣਾ ਪੈ ਰਿਹਾ ਹੈ।

ਕਿਸਾਨਾਂ ਨੇ ਕਿਹਾ ਕਿ ਜੇਕਰ ਕਣਕ ਦੀ ਬਿਜਾਈ ਸਮੇਂ ਡੀ ਏ ਪੀ ਨਾ ਪਾਈ ਤਾਂ ਝਾੜ ਘਟੇਗਾ ਤੇ ਉਨ੍ਹਾਂ ਦਾ ਵਿੱਤੀ ਨੁਕਸਾਨ ਹੋਵੇਗਾ। ਇਸ ਸਬੰਧੀ ਜਦੋਂ ਡੀ ਆਰ ਪਟਿਆਲਾ ਨੂੰ ਫੋਨ ਕੀਤਾ ਤਾਂ ਉਨ੍ਹਾਂ ਨਹੀਂ ਚੁੱਕਿਆ। ਇਸ ਮੌਕੇ ਸੁਖਦੇਵ ਸਿੰਘ ਨੰਬਰਦਾਰ ਰਸੌਲੀ, ਜੰਗ ਸਿੰਘ, ਬਲਬੀਰ ਸਿੰਘ ਪੂਹਲੇਵਾਲ, ਸੱਤਪਾਲ ਰਸੌਲੀ ਤੇ ਰਾਜ ਕੁਮਾਰ ਆਦਿ ਹਾਜ਼ਰ ਸਨ।