ਰਾਹੁਲ ਨੇ ਦਰਭੰਗਾ ਦੇ ਨੌਜਵਾਨ ਨੂੰ ਨਵਾਂ ਮੋਟਰਸਾਈਕਲ ਦਿੱਤਾ

ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੇ ਬਿਹਾਰ ਦੇ ਦਰਭੰਗਾ ਜ਼ਿਲ੍ਹੇ ਦੇ ਉਸ ਵਿਅਕਤੀ ਨੂੰ ਅੱਜ ਨਵਾਂ ਮੋਟਰਸਾਈਕਲ ਤੋਹਫ਼ੇ ਵਿੱਚ ਦਿੱਤਾ, ਜਿਸ ਦਾ ਦੋਪਹੀਆ ਵਾਹਨ ‘ਵੋਟਰ ਅਧਿਕਾਰ ਯਾਤਰਾ’ ਦੌਰਾਨ ਗੁਆਚ ਗਿਆ ਸੀ। ਕਾਂਗਰਸ ਨੇ ‘ਐਕਸ’ ’ਤੇ ਸ਼ੁਭਮ ਸੌਰਭ ਦੀ ਇੱਕ ਵੀਡੀਓ ਸਾਂਝੀ ਕੀਤੀ, ਜਿਸ ਨੇ ਆਪ ਬੀਤੀ ਸੁਣਾਈ ਅਤੇ ਮਾਣ ਨਾਲ ਆਪਣੇ ਮੋਟਰਸਾਈਕਲ ਦੀਆਂ ਚਾਬੀਆਂ ਦਿਖਾਈਆਂ, ਜੋ ਰਾਹੁਲ ਗਾਂਧੀ ਨੇ ਉਸ ਨੂੰ ਸੌਂਪੀਆਂ ਹਨ। ਸੌਰਭ ਨੇ ਕਿਹਾ, ‘ਜਦੋਂ ਰਾਹੁਲ ਗਾਂਧੀ ਦਰਭੰਗਾ ਵਿੱਚ ਰੈਲੀ ਕਰ ਰਹੇ ਸਨ, ਤਾਂ ਮੈਂ ਆਪਣਾ ਮੋਟਰਸਾਈਕਲ ਉਨ੍ਹਾਂ ਦੇ ਨਾਲ ਮੌਜੂਦ ਸੁਰੱਖਿਆ ਕਰਮਚਾਰੀਆਂ ਨੂੰ ਦੇ ਦਿੱਤਾ ਸੀ। ਬਾਅਦ ਵਿੱਚ ਜਦੋਂ ਮੈਨੂੰ ਪਤਾ ਲੱਗਾ ਕਿ ਮੇਰਾ ਮੋਟਰਸਾਈਕਲ ਕਿਤੇ ਗੁਆਚ ਗਿਆ ਹੈ, ਤਾਂ ਮੈਂ ਬਹੁਤ ਪ੍ਰੇਸ਼ਾਨ ਹੋਇਆ।’ ਉਸ ਨੇ ਕਿਹਾ, ‘ਦੋ ਦਿਨ ਪਹਿਲਾਂ ਮੈਨੂੰ ਇੱਕ ਅਣਜਾਣ ਵਿਅਕਤੀ ਦਾ ਫੋਨ ਆਇਆ। ਉਸ ਨੇ ਕਿਹਾ ਕਿ ਰਾਹੁਲ ਗਾਂਧੀ ਪਹਿਲੀ ਸਤੰਬਰ ਨੂੰ ਪਟਨਾ ਵਿੱਚ ਮੈਨੂੰ ਇੱਕ ਨਵਾਂ ਮੋਟਰਸਾਈਕਲ ਤੋਹਫ਼ੇ ਵਿੱਚ ਦੇਣਾ ਚਾਹੁੰਦੇ ਹਨ।’ ਇਸ ਮਗਰੋਂ ਨੌਜਵਾਨ ਨੇ ਇਹ ਖ਼ਬਰ ਆਪਣੇ ਪਿਤਾ ਨਾਲ ਸਾਂਝੀ ਕੀਤੀ। ਹਾਲਾਂਕਿ ਸ਼ੁਰੂ ਵਿੱਚ ਦੋਵਾਂ ਨੂੰ ਇਸ ਗੱਲ ’ਤੇ ਵਿਸ਼ਵਾਸ ਨਹੀਂ ਹੋਇਆ ਪਰ ਬਾਅਦ ਵਿੱਚ ਉਨ੍ਹਾਂ ਨੇ ਫ਼ੈਸਲਾ ਕੀਤਾ ਕਿ ਜਿਸ ਦਿਨ ਰਾਹੁਲ ‘ਵੋਟਰ ਅਧਿਕਾਰ ਯਾਤਰਾ’ ਸਮਾਪਤ ਕਰਨਗੇ, ਉਸ ਦਿਨ ਉਹ ਪਟਨਾ ਜਾਣਗੇ। ਉਨ੍ਹਾਂ ਨੂੰ ਇਨਕਮ ਟੈਕਸ ਚੌਕ ਨੇੜੇ ਇੰਤਜ਼ਾਰ ਕਰਨ ਲਈ ਕਿਹਾ ਗਿਆ, ਜਿੱਥੇ ਬਾਅਦ ਵਿੱਚ ਰਾਹੁਲ ਗਾਂਧੀ ਨੌਜਵਾਨ ਨੂੰ ਚਾਬੀਆਂ ਸੌਂਪਣ ਲਈ ਥੋੜ੍ਹੇ ਸਮੇਂ ਲਈ ਰੁਕੇ।