ਰਘੂਵੰਸ਼ੀ ਕਤਲ ਕੇਸ: ਮੇਘਾਲਿਆ ਪੁਲੀਸ ਵੱਲੋਂ ਇੰਦੌਰ ਵਿਚ ਨਦੀ ’ਚੋਂ ਦੇਸੀ ਪਿਸਤੌਲ ਬਰਾਮਦ

ਸ਼ਿਲੌਂਗ, 25 ਜੂਨ

ਕਾਰੋਬਾਰੀ ਰਾਜਾ ਰਘੂਵੰਸ਼ੀ ਦੇ ਕਤਲ ਕੇਸ ਦੀ ਜਾਂਚ ਕਰ ਰਹੀ ਮੇਘਾਲਿਆ ਪੁਲੀਸ ਦੀ ਵਿਸ਼ੇਸ਼ ਜਾਂਚ ਟੀਮ ਨੇ ਬੁੱਧਵਾਰ ਨੂੰ ਇੰਦੌਰ ਦੇ ਪਲਾਸੀਆ ਖੇਤਰ ਵਿੱਚ ਇੱਕ ਨਦੀ ’ਚੋਂ ਦੇਸੀ ਪਿਸਤੌਲ ਬਰਾਮਦ ਕੀਤਾ ਹੈ।

ਪੂਰਬੀ ਖਾਸੀ ਹਿਲਜ਼ ਦੇ ਐੱਸਪੀ ਵਿਵੇਕ ਸਈਮ ਨੇ ਇਸ ਖ਼ਬਰ ਏਜੰਸੀ ਨੂੰ ਦੱਸਿਆ, ‘‘ਅਸੀਂ ਇੰਦੌਰ ਵਿੱਚ ਇੱਕ ਨਦੀ ’ਚੋਂ ਦੋ ਮੈਗਜ਼ੀਨਾਂ ਨਾਲ ਇੱਕ ਦੇਸੀ ਪਿਸਤੌਲ ਬਰਾਮਦ ਕੀਤਾ ਹੈ।’’ ਅਧਿਕਾਰੀ ਨੇ ਕਿਹਾ ਕਿ ਇਸ ਤੋਂ ਪਹਿਲਾਂ ਇੰਦੌਰ ਵਿੱਚ ਇੱਕ ਕਾਰ ਵਿੱਚ ਰੱਖੇ ਡੱਬੇ ’ਚੋਂ 50,000 ਰੁਪਏ ਦੀ ਨਕਦੀ ਬਰਾਮਦ ਕੀਤੀ ਗਈ ਸੀ।

ਇੰਦੌਰ ਪੁਲੀਸ ਦੇ ਅਧਿਕਾਰੀ ਨੇ ਕਿਹਾ ਕਿ ਇਹ ਹਥਿਆਰ ਸ਼ਹਿਰ ਦੇ ਇੱਕ ਫਲੈਟ ਤੋਂ ਹੋਰ ਚੀਜ਼ਾਂ ਦੇ ਨਾਲ ਗਾਇਬ ਹੋਣ ਦਾ ਸ਼ੱਕ ਹੈ ਜਿੱਥੇ ਰਾਜਾ ਰਘੂਵੰਸ਼ੀ ਦੀ ਪਤਨੀ ਅਤੇ ਮੁੱਖ ਮੁਲਜ਼ਮ ਸੋਨਮ ਕਤਲ ਮਗਰੋਂ ਮੇਘਾਲਿਆ ਤੋਂ ਭੱਜਣ ਤੋਂ ਬਾਅਦ ਕਈ ਦਿਨਾਂ ਤੱਕ ਰੁਕੀ ਸੀ। ਸੋਨਮ, ਉਸ ਦੇ ਕਥਿਤ ਪ੍ਰੇਮੀ ਰਾਜ ਕੁਸ਼ਵਾਹਾ ਅਤੇ ਉਸ ਦੇ ਦੋਸਤਾਂ ਵਿਸ਼ਾਲ ਚੌਹਾਨ, ਆਕਾਸ਼ ਰਾਜਪੂਤ ਅਤੇ ਆਨੰਦ ਕੁਰਮੀ ਨੂੰ ਕਾਰੋਬਾਰੀ ਦੇ ਕਤਲ ਦੀ ਸਾਜ਼ਿਸ਼ ਘੜਨ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।

ਰਘੂਵੰਸ਼ੀ, ਜਿਸ ਨੇ 11 ਮਈ ਨੂੰ ਸੋਨਮ ਨਾਲ ਵਿਆਹ ਕੀਤਾ ਸੀ, 23 ਮਈ ਨੂੰ ਮੇਘਾਲਿਆ ਵਿੱਚ ਆਪਣੇ ਹਨੀਮੂਨ ਦੌਰਾਨ ਲਾਪਤਾ ਹੋ ਗਿਆ ਸੀ। ਉਸ ਦੀ ਲਾਸ਼ 2 ਜੂਨ ਨੂੰ ਪੂਰਬੀ ਖਾਸੀ ਪਹਾੜੀਆਂ ਜ਼ਿਲ੍ਹੇ ਦੇ ਸੋਹਰਾ ਖੇਤਰ ਵਿੱਚ ਇੱਕ ਡੂੰਘੀ ਖੱਡ ਵਿੱਚੋਂ ਮਿਲੀ ਸੀ।

ਸਈਮ ਨੇ ਕਿਹਾ, ‘‘ਹਥਿਆਰ ਅਤੇ ਗੋਲਾ ਬਾਰੂਦ ਦੀ ਬਰਾਮਦਗੀ ਇਸ ਕਤਲ ਦੀ ਯੋਜਨਾਬੰਦੀ ਬਾਰੇ ਸਾਡੇ ਸ਼ੱਕ ਦੀ ਪੁਸ਼ਟੀ ਕਰਦੀ ਹੈ। ਅਸੀਂ ਇੱਕ ਠੋਸ ਕੇਸ ਬਣਾਉਂਦੇ ਹੋਏ ਹਰ ਸਬੂਤ ਨੂੰ ਇਕੱਠਾ ਕਰ ਰਹੇ ਹਾਂ।’’ -ਪੀਟੀਆਈ