ISRO's 40-storey rocket: ‘ਇਸਰੋ 40-ਮੰਜ਼ਲ ਉੱਚੇ ਰਾਕੇਟ ’ਤੇ ਕੰਮ ਕਰ ਰਿਹੈ, ਜੋ 75 ਟਨ ਭਾਰ ਪੁਲਾੜ ’ਚ ਲਿਜਾਵੇਗਾ’

ਇਸਰੋ ਦੇ ਚੇਅਰਮੈਨ ਵੀ. ਨਾਰਾਇਣਨ (ISRO Chairman V Narayanan) ਨੇ ਮੰਗਲਵਾਰ ਨੂੰ ਕਿਹਾ ਕਿ ਦੇਸ਼ ਦੀ ਪੁਲਾੜ ਖੋਜ ਏਜੰਸੀ ਇਕ 75,000 ਕਿਲੋਗ੍ਰਾਮ ਭਾਰ ਵਾਲੇ ਪੇਲੋਡ ਨੂੰ ਧਰਤੀ ਦੇ ਹੇਠਲੇ ਗ੍ਰਹਿ ਪੰਧ ’ਤੇ ਪਾਉਣ ਲਈ 40 ਮੰਜ਼ਿਲਾ ਇਮਾਰਤ ਜਿੰਨਾ ਉੱਚਾ ਰਾਕੇਟ ਬਣਾਉਣ 'ਤੇ ਕੰਮ ਕਰ ਰਹੀ ਹੈ।

ਇੱਥੇ ਉਸਮਾਨੀਆ ਯੂਨੀਵਰਸਿਟੀ (Osmania University) ਵਿਚ ਕਾਨਵੋਕੇਸ਼ਨ ਭਾਸ਼ਣ ਦਿੰਦਿਆਂ ਨਾਰਾਇਣਨ ਨੇ ਕਿਹਾ ਕਿ ਇਸ ਸਾਲ ਇਸਰੋ (Indian Space Research Organisation - ISRO) ਨੇ NAVIC (ਭਾਰਤ ਤਾਰਾਮੰਡਲ ਪ੍ਰਣਾਲੀ ਨਾਲ ਨੇਵੀਗੇਸ਼ਨ) ਸੈਟੇਲਾਈਟ ਅਤੇ N1 ਰਾਕੇਟ ਵਰਗੇ ਪ੍ਰੋਜੈਕਟਾਂ ਉਤੇ ਕੰਮ ਕੀਤਾ ਹੈ।

ਇਸ ਤੋਂ ਇਲਾਵਾ ਭਾਰਤੀ ਰਾਕੇਟਾਂ ਦੀ ਵਰਤੋਂ ਕਰ ਕੇ ਅਮਰੀਕਾ ਦੇ 6,500 ਕਿਲੋਗ੍ਰਾਮ ਸੰਚਾਰ ਉਪਗ੍ਰਹਿ ਨੂੰ ਔਰਬਿਟ (ਗ੍ਰਹਿ ਪੰਧ) ’ਤੇ ਪਾਇਆ ਗਿਆ ਹੈ। ਨਰਾਇਣਨ ਨੇ ਕਿਹਾ, "ਤੁਸੀਂ ਜਾਣਦੇ ਹੋ ਰਾਕੇਟ ਦੀ ਸਮਰੱਥਾ ਕਿੰਨੀ ਹੈ? ਪਹਿਲਾ ਲਾਂਚਰ, ਜਿਹੜਾ (ਡਾ. ਏਪੀਜੇ) ਅਬਦੁਲ ਕਲਾਮ ਜੀ ਨੇ ਬਣਾਇਆ ਸੀ, 17 ਟਨ ਭਾਰ ਦਾ ਲਿਫਟ-ਆਫ ਪੁੰਜ ਵਾਲਾ ਸੀ, ਜੋ 35 ਕਿਲੋਗ੍ਰਾਮ ਨੂੰ ਧਰਤੀ ਦੇ ਹੇਠਲੇ ਪੰਧ ਵਿੱਚ ਰੱਖਣ ਦੇ ਸਮਰੱਥ ਸੀ।’’

ਉਨ੍ਹਾਂ ਕਿਹਾ, ‘‘ਅੱਜ, ਅਸੀਂ 75,000 ਕਿਲੋਗ੍ਰਾਮ ਨੂੰ ਧਰਤੀ ਦੇ ਹੇਠਲੇ ਪੰਧ ਵਿੱਚ ਰੱਖਣ ਲਈ ਇੱਕ ਰਾਕੇਟ ਦੀ ਕਲਪਨਾ ਕਰ ਰਹੇ ਹਾਂ। ਇਹ ਰਾਕੇਟ 40 ਮੰਜ਼ਿਲਾ ਇਮਾਰਤ ਦੀ ਉਚਾਈ ਜਿੰਨਾ ਉੱਚਾ ਹੈ।"

ਉਸਨੇ ਕਿਹਾ ਕਿ ਇਸ ਸਮੇਂ, ਭਾਰਤ ਕੋਲ ਔਰਬਿਟ ਵਿੱਚ 55 ਉਪਗ੍ਰਹਿ ਹਨ ਅਤੇ ਇਹ ਗਿਣਤੀ ਅਗਲੇ ਤਿੰਨ ਤੋਂ ਚਾਰ ਸਾਲਾਂ ਵਿੱਚ ਤਿੰਨ ਗੁਣਾ ਹੋ ਜਾਵੇਗੀ। ਕਾਨਵੋਕੇਸ਼ਨ ਵਿੱਚ ਤਿਲੰਗਾਨਾ ਦੇ ਰਾਜਪਾਲ ਜਿਸ਼ਨੂ ਦੇਵ ਵਰਮਾ ਨੇ ਨਾਰਾਇਣਨ ਨੂੰ ਭਾਰਤ ਦੇ ਪੁਲਾੜ ਪ੍ਰੋਗਰਾਮ ਵਿੱਚ ਉਨ੍ਹਾਂ ਦੇ ਅਹਿਮ ਯੋਗਦਾਨ ਨੂੰ ਮਾਨਤਾ ਦਿੰਦਿਆਂ ਡਾਕਟਰੇਟ ਆਫ਼ ਸਾਇੰਸ ਦੀ ਆਨਰੇਰੀ ਡਿਗਰੀ ਪ੍ਰਦਾਨ ਕੀਤੀ ਗਈ।