IndiGo ਸੰਕਟ: DGCA ਨੇ ਅੱਠ ਮੈਂਬਰੀ ਨਿਗਰਾਨ ਟੀਮ ਬਣਾਈ; ਦੋ ਮੈਂਬਰ ਏਅਰਲਾਈਨ ਦੇ ਕਾਰਪੋਰੇਟ ਦਫ਼ਤਰ ਵਿਚ ਰਹਿਣਗੇ ਤਾਇਨਾਤ

ਹਵਾਬਾਜ਼ੀ ਨਿਗਰਾਨ ਡੀਜੀਸੀਏ ਨੇ ਰਾਹੁਲ ਭਾਟੀਆ ਦੇ ਕੰਟਰੋਲ ਵਾਲੀ ਨਿੱਜੀ ਏਅਰਲਾਈਨ IndiGo ’ਤੇ ਸ਼ਿਕੰਜਾ ਕੱਸਦੇ ਹੋਏ ਅੱਠ ਮੈਂਬਰੀ ਨਿਗਰਾਨ ਟੀਮ ਦਾ ਗਠਨ ਕੀਤਾ ਹੈ। ਯਾਦ ਰਹੇ ਕਿ ਏਅਰਲਾਈਨ ਨੇ ਚਾਲਕ ਦਲ ਦੀ ਘਾਟ ਕਾਰਨ ਵੱਡੀ ਗਿਣਤੀ ਉਡਾਣਾਂ ਰੱਦ ਕਰ ਦਿੱਤੀਆਂ ਹਨ।

ਡਾਇਰੈਕਟੋਰੇਟ ਜਨਰਲ ਆਫ਼ ਸਿਵਲ ਏਵੀਏਸ਼ਨ (ਡੀਜੀਸੀਏ) ਵੱਲੋਂ ਬੁੱਧਵਾਰ ਨੂੰ ਜਾਰੀ ਕੀਤੇ ਗਏ ਇੱਕ ਆਦੇਸ਼ ਅਨੁਸਾਰ, ਨਿਗਰਾਨ ਟੀਮ ਵਿੱਚ ਇੱਕ ਡਿਪਟੀ ਚੀਫ਼ ਫਲਾਈਟ ਆਪ੍ਰੇਸ਼ਨ ਇੰਸਪੈਕਟਰ, ਸੀਨੀਅਰ ਐਫਓਆਈ (ਫਲਾਈਟ ਆਪ੍ਰੇਸ਼ਨ ਇੰਸਪੈਕਟਰ) ਅਤੇ ਦੋ ਐਫਓਆਈ ਸ਼ਾਮਲ ਹੋਣਗੇ। ਇਨ੍ਹਾਂ ਵਿੱਚੋਂ ਦੋ ਮੈਂਬਰ ਰੋਜ਼ਾਨਾ ਏਅਰਲਾਈਨ ਦੇ ਕਾਰਪੋਰੇਟ ਦਫ਼ਤਰ ਵਿੱਚ ਤਾਇਨਾਤ ਕੀਤੇ ਜਾਣਗੇ, ਅਤੇ ਉਨ੍ਹਾਂ ਨੂੰ ਏਅਰਲਾਈਨ ਦੇ ਕੁੱਲ ਫਲੀਟ, ਔਸਤ ਪੜਾਅ ਦੀ ਲੰਬਾਈ (ਇੱਕ ਜਹਾਜ਼ ਇੱਕ ਪੜਾਅ ਵਿੱਚ ਕਿੰਨੀ ਦੂਰੀ ਤੈਅ ਕਰਦਾ ਹੈ), ਪਾਇਲਟਾਂ ਦੀ ਕੁੱਲ ਗਿਣਤੀ, ਨੈੱਟਵਰਕ ਵੇਰਵੇ, ਘੰਟਿਆਂ ਵਿੱਚ ਚਾਲਕ ਦਲ ਦੀ ਵਰਤੋਂ, ਅਤੇ ਸਿਖਲਾਈ ਅਧੀਨ ਚਾਲਕ ਦਲ, ਆਦਿ ਦੀ ਨਿਗਰਾਨੀ ਦਾ ਨਿਰਦੇਸ਼ ਦਿੱਤਾ ਗਿਆ ਹੈ।

ਡੀਜੀਸੀਏ ਦੇ ਹੁਕਮਾਂ ਵਿੱਚ ਕਿਹਾ ਗਿਆ ਹੈ ਕਿ ਨਿਗਰਾਨੀ ਟੀਮ ਦੇ ਇਹ ਦੋ ਮੈਂਬਰ ਪ੍ਰਤੀ ਦਿਨ ਉਡਾਣਾਂ, ਪ੍ਰਤੀ ਦਿਨ ਗੈਰ-ਯੋਜਨਾਬੱਧ ਛੁੱਟੀ, ਚਾਲਕ ਦਲ ਦੀ ਘਾਟ ਕਾਰਨ ਪ੍ਰਭਾਵਿਤ ਸੈਕਟਰਾਂ ਦੀ ਕੁੱਲ ਗਿਣਤੀ, ਅਤੇ ਨਾਲ ਹੀ ਪ੍ਰਤੀ ਬੇਸ ਪ੍ਰਤੀ ਦਿਨ ਕਾਕਪਿਟ ਅਤੇ ਕੈਬਿਨ ਕਰੂ ਸਟੈਂਡਬਾਏ ’ਤੇ ਨਜ਼ਰ ਰੱਖਣਗੇ। ਇਸ ਤੋਂ ਇਲਾਵਾ ਡੀਜੀਸੀਏ ਦਫ਼ਤਰ ਦੇ ਦੋ ਹੋਰ ਅਧਿਕਾਰੀ - ਇੱਕ ਸੀਨੀਅਰ ਅੰਕੜਾ ਅਧਿਕਾਰੀ ਅਤੇ ਇੱਕ ਡਿਪਟੀ ਡਾਇਰੈਕਟਰ - ਨੂੰ ਵੀ ਇੰਡੀਗੋ ਕਾਰਪੋਰੇਟ ਦਫ਼ਤਰ ਵਿੱਚ ਘਰੇਲੂ ਅਤੇ ਅੰਤਰਰਾਸ਼ਟਰੀ ਉਡਾਣਾਂ ਰੱਦ ਕਰਨ ਦੀ ਸਥਿਤੀ, ਰਿਫੰਡ ਸਥਿਤੀ, ਸਮੇਂ ਸਿਰ ਕਾਰਵਾਈ, ਨਾਗਰਿਕ ਹਵਾਬਾਜ਼ੀ ਜ਼ਰੂਰਤਾਂ ਅਨੁਸਾਰ ਯਾਤਰੀਆਂ ਨੂੰ ਮੁਆਵਜ਼ਾ ਅਤੇ ਸਮਾਨ ਵਾਪਸੀ ਦੀ ਨਿਗਰਾਨੀ ਕਰਨ ਲਈ ਤਾਇਨਾਤ ਕੀਤਾ ਜਾਵੇਗਾ। ਦੋਵੇਂ ਟੀਮਾਂ ਸ਼ਾਮ 6 ਵਜੇ ਤੱਕ ਸੰਯੁਕਤ ਡਾਇਰੈਕਟਰ ਜਨਰਲ (ਪ੍ਰਸ਼ਾਸਨ) ਹਰੀਸ਼ ਕੁਮਾਰ ਵਸ਼ਿਸ਼ਠ ਅਤੇ ਸੰਯੁਕਤ ਡਾਇਰੈਕਟਰ ਜਨਰਲ ਜੈ ਪ੍ਰਕਾਸ਼ ਪਾਂਡੇ ਨੂੰ ਰੋਜ਼ਾਨਾ ਰਿਪੋਰਟ ਕਰਨਗੀਆਂ।