ਸੈਂਟ ਲੁਇਸ ਰੈਪਿਡ ਐਂਡ ਬਲਿਟਜ਼ ਦੇ ਪਹਿਲੇ ਦਿਨ ਗੁਕੇਸ਼ ਸਾਂਝੇ ਤੌਰ ’ਤੇ ਤੀਜੇ ਸਥਾਨ ’ਤੇ

ਮੌਜੂਦਾ ਵਿਸ਼ਵ ਚੈਂਪੀਅਨ ਡੀ. ਗੁਕੇਸ਼ ਨੇ ਸੈਂਟ ਲੁਇਸ ਰੈਪਿਡ ਐਂਡ ਬਲਿਟਜ਼ ਟੂਰਨਾਮੈਂਟ ਦੇ ਪਹਿਲੇ ਦਿਨ ਅਮਰੀਕੀ ਲੇਵੋਨ ਅਰੋਨੀਅਨ ਤੋਂ ਪਹਿਲੇ ਰਾਊਂਡ ਵਿੱਚ ਹਾਰਨ ਤੋਂ ਬਾਅਦ ਵਾਪਸੀ ਕਰਦਿਆਂ ਗ੍ਰਿਗੋਰੀ ਓਪਾਰਿਨ ਅਤੇ ਲੀਮ ਲੇ ਕੁਆਂਗ ਨੂੰ ਹਰਾਇਆ। ਗ੍ਰੈਂਡ ਚੈੱਸ ਟੂਰ ਦਾ ਇੱਕ ਹਿੱਸਾ ਇਸ ਟੂਰਨਾਮੈਂਟ ਵਿੱਚ ਗੁਕੇਸ਼ ਸਾਂਝੇ ਤੌਰ ’ਤੇ ਤੀਜੇ ਸਥਾਨ ’ਤੇ ਰਿਹਾ।

ਗੁਕੇਸ਼ ਨੂੰ ਪਹਿਲੇ ਰਾਊਂਡ ਵਿੱਚ ਅਰੋਨੀਅਨ ਨੇ ਇੱਕ ਮੁਸ਼ਕਲ ਮੁਕਾਬਲੇ ਵਿੱਚ ਹਰਾਇਆ ਸੀ, ਪਰ ਉਸ ਨੇ ਜ਼ਬਰਦਸਤ ਵਾਪਸੀ ਕੀਤੀ। ਓਪਾਰਿਨ ਅਤੇ ਫਿਰ ਲੀਮ ਨੂੰ ਹਰਾਉਂਦਿਆਂ ਸੰਭਾਵਿਤ ਛੇ ਵਿੱਚੋਂ ਚਾਰ ਅੰਕਾਂ ਨਾਲ ਦਿਨ ਦੀ ਸਮਾਪਤੀ ਕੀਤੀ।

ਹਰੇਕ ਰੈਪਿਡ ਜਿੱਤ ਦੇ ਦੋ ਅੰਕ ਮਿਲਦੇ ਹਨ ਅਤੇ ਅਰੋਨੀਅਨ ਨੇ ਪਹਿਲੇ ਦਿਨ ਆਪਣੇ ਤਿੰਨੋਂ ਮੈਚ ਜਿੱਤ ਕੇ ਸ਼ੁਰੂਆਤੀ ਲੀਡ ਹਾਸਲ ਕੀਤੀ। ਲਾਸ ਵੇਗਾਸ ਵਿੱਚ ਹਾਲ ਹੀ ਵਿੱਚ ਹੋਏ ਫ੍ਰੀਸਟਾਈਲ ਚੈੱਸ ਟੂਰਨਾਮੈਂਟ ਵਿੱਚ ਜਿੱਤ ਤੋਂ ਬਾਅਦ, ਇਸ ਅਮਰੀਕੀ ਜੀਐੱਮ ਨੇ ਆਪਣੇ ਮੁੱਖ ਵਿਰੋਧੀਆਂ ਉਜ਼ਬੇਕਿਸਤਾਨ ਦੇ ਨੋਦਿਰਬੇਕ ਅਬਦੁਸੱਤੋਰੋਵ ਅਤੇ ਫਰਾਂਸ ਦੇ ਮੈਕਸਿਮ ਵਾਚੀਅਰ-ਲਾਗ੍ਰੇਵ ਨੂੰ ਹਰਾ ਕੇ ਆਪਣਾ ਸਹੀ ਸਕੋਰ ਕਾਇਮ ਰੱਖਿਆ।

ਅਰੋਨੀਅਨ ਛੇ ਅੰਕਾਂ ਨਾਲ ਸਿਖਰ ’ਤੇ ਹੈ, ਜਦੋਂ ਕਿ ਉਸ ਦਾ ਹਮਵਤਨ ਫੈਬੀਆਨੋ ਕਾਰੂਆਨਾ ਦੋ ਜਿੱਤਾਂ ਅਤੇ ਇੱਕ ਡਰਾਅ ਨਾਲ ਪੰਜ ਅੰਕਾਂ ’ਤੇ ਉਸ ਤੋਂ ਥੋੜ੍ਹਾ ਪਿੱਛੇ ਹੈ। ਗੁਕੇਸ਼ ਇੱਕ ਹੋਰ ਅਮਰੀਕੀ, ਵੇਸਲੀ ਸੋ ਨਾਲ ਸਾਂਝੇ ਤੌਰ ’ਤੇ ਤੀਜੇ ਸਥਾਨ 'ਤੇ ਹੈ, ਜਦੋਂ ਕਿ ਵਾਚੀਅਰ-ਲਾਗ੍ਰੇਵ ਅਤੇ ਲੇਨੀਅਰ ਡੋਮਿੰਗੁਏਜ਼ ਪੇਰੇਜ਼ ਤਿੰਨ-ਤਿੰਨ ਅੰਕਾਂ ਨਾਲ ਪੰਜਵੇਂ ਸਥਾਨ ’ਤੇ ਬਰਾਬਰ ਹਨ।

ਲੀਮ ਅਤੇ ਓਪਾਰਿਨ ਦੋ-ਦੋ ਅੰਕਾਂ ਨਾਲ ਅਗਲੇ ਸਥਾਨ ’ਤੇ ਹਨ, ਨੋਦਿਰਬੇਕ ਕੋਲ ਇੱਕ ਅੰਕ ਹੈ, ਅਤੇ ਸੈਮ ਸ਼ੈਂਕਲੈਂਡ ਆਪਣੇ ਸਾਰੇ ਮੈਚ ਹਾਰਨ ਤੋਂ ਬਾਅਦ ਆਖਰੀ ਸਥਾਨ ’ਤੇ ਹੈ। -ਪੀਟੀਆਈ