ਗੈਂਗਸਟਰ ਹਰਸਿਮਰਨ ਉਰਫ਼ ਬਾਦਲ ਗ੍ਰਿਫ਼ਤਾਰ

ਦਿੱਲੀ ਪੁਲੀਸ ਨੇ ਗੈਂਗਸਟਰ ਹਰਸਿਮਰਨ ਉਰਫ਼ ਬਾਦਲ ਉਰਫ਼ ਸਿਮਰਨ (38) ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜੋ ਬੈਂਕਾਕ ਤੋਂ ਡਿਪੋਰਟ ਹੋਣ ਮਗਰੋਂ ਜਾਅਲੀ ਪਾਸਪੋਰਟ ’ਤੇ ਦੇਸ਼ ਛੱਡ ਕੇ ਅੰਤਰਰਾਸ਼ਟਰੀ ਪੱਧਰ ’ਤੇ ਆਪਣੇ ਅਪਰਾਧਿਕ ਨੈੱਟਵਰਕ ਦਾ ਵਿਸਥਾਰ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਸੀ।

ਅਧਿਕਾਰੀਆਂ ਅਨੁਸਾਰ ਭਾਰਤੀ ਏਜੰਸੀਆਂ ਅਤੇ ਥਾਈਂ ਅਧਿਕਾਰੀਆਂ ਦੇ ਤਾਲਮੇਲ ਤੋਂ ਬਾਅਦ ਸ਼ਾਲੀਮਾਰ ਬਾਗ ਦੇ ਸਾਬਕਾ ਨਿਵਾਸੀ ਹਰਸਿਮਰਨ ਦੀ 26 ਨਵੰਬਰ ਨੂੰ ਬੈਂਕਾਕ ਤੋਂ ਦਿੱਲੀ ਹਵਾਲਗੀ ਕੀਤੀ ਗਈ ਸੀ। ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਉਸ ਨੇ ਰਾਜੇਸ਼ ਸਿੰਘ ਵਾਸੀ ਗੋਰਖਪੁਰ ਦੇ ਨਾਮ ਹੇਠ ਜਾਅਲੀ ਪਛਾਣ ਦੀ ਵਰਤੋਂ ਕਰਕੇ ਪਾਸਪੋਰਟ ਹਾਸਲ ਕੀਤਾ ਸੀ ਅਤੇ ਇਸ ਸਾਲ ਜਨਵਰੀ ਵਿੱਚ ਗੈਂਗਸਟਰ ਗੋਲਡੀ ਢਿੱਲੋਂ ਦੀ ਮਦਦ ਨਾਲ ਬੈਂਕਾਕ ਭੱਜ ਗਿਆ ਸੀ। ਫਿਰ ਉਹ ਦੁਬਈ ਚਲਾ ਗਿਆ ਅਤੇ ਮਨੁੱਖੀ ਤਸਕਰਾਂ ਤੇ ਢਿੱਲੋਂ ਦੇ ਸਾਥੀਆਂ ਦੀ ਮਦਦ ਨਾਲ ਅਮਰੀਕਾ ਅਤੇ ਯੂਰਪ ਪਹੁੰਚਣ ਦੀ ਕੋਸ਼ਿਸ਼ ਕੀਤੀ। ਪੁਲੀਸ ਅਨੁਸਾਰ ਅਜ਼ਰਬਾਈਜਾਨ ਰਾਹੀਂ ਅਤੇ ਫਿਰ ਬੇਲਾਰੂਸ-ਲਾਤਵੀਆ-ਪੋਲੈਂਡ ਰਸਤਿਓਂ ਯੂਰਪ ਅੰਦਰ ਦਾਖ਼ਲ ਹੋਣ ਦੀਆਂ ਉਸ ਦੀਆਂ ਕੋਸ਼ਿਸ਼ਾਂ ਨਾਕਾਮ ਰਹੀਆਂ। ਇਨ੍ਹਾਂ ਦੇਸ਼ਾਂ ਨੇ ਉਸ ਨੂੰ ਹਿਰਾਸਤ ਵਿੱਚ ਲੈ ਲਿਆ ਅਤੇ ਉਸ ਨੂੰ ਦੇਸ਼ ’ਚੋਂ ਕੱਢ ਦਿੱਤਾ। ਉਹ ਆਪਣਾ ਵੀਜ਼ਾ ਨਵਿਆਉਣ ਲਈ ਬੈਂਕਾਕ ਵਾਪਸ ਆਇਆ, ਜਿੱਥੇ ਉਸ ਨੂੰ ਭਾਰਤੀ ਏਜੰਸੀਆਂ ਨੇ ਖੁਫ਼ੀਆ ਜਾਣਕਾਰੀ ਦੇ ਆਧਾਰ ’ਤੇ ਗ੍ਰਿਫ਼ਤਾਰ ਕਰ ਲਿਆ। ਵਿਦੇਸ਼ ਮੰਤਰਾਲੇ ਨੇ ਉਸ ਦਾ ਪਾਸਪੋਰਟ ਰੱਦ ਕਰ ਦਿੱਤਾ ਜਿਸ ਨਾਲ ਉਸ ਦੀ ਭਾਰਤ ਨੂੰ ਹਵਾਲਗੀ ਸੰਭਵ ਹੋਈ।