ਫੌਤ ਹੋ ਚੁੱਕੇ ਅਧਿਆਪਕ ਚੋਣ ਡਿਊਟੀ ਦੇਣਗੇ!

ਸਿੱਖਿਆ ਵਿਭਾਗ ਨੇ ਅਗਾਮੀ ਜ਼ਿਲ੍ਹਾ ਪਰਿਸ਼ਦ ਅਤੇ ਪੰਚਾਇਤ ਸਮਿਤੀ ਚੋਣਾਂ ਲਈ ਸੇਵਾਮੁਕਤ, ਇੱਥੋਂ ਤੱਕ ਕਿ ਫੌਤ ਹੋ ਚੁੱਕੇ ਅਧਿਆਪਕਾਂ ਦੀ ਵੀ ਡਿਊਟੀ ਲਗਾ ਦਿੱਤੀ ਹੈ। ਚੋਣਾਂ ਤੋਂ ਪਹਿਲਾਂ ਲਾਜ਼ਮੀ ਰਿਹਰਸਲ ’ਚ ਸ਼ਾਮਲ ਨਾ ਹੋਣ ਕਾਰਨ ਇਨ੍ਹਾਂ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕਰਕੇ ਸੰਭਾਵੀ ਕਾਰਵਾਈ ਦੀ ਚਿਤਾਵਨੀ ਵੀ ਦਿੱਤੀ ਗਈ ਹੈ। ਸੇਵਾ ਅਧੀਨ ਅਧਿਆਪਕਾਂ ਦੀ ਸੂਚੀ ਅਪਡੇਟ ਕੀਤੇ ਬਿਨਾਂ ਵਿਭਾਗ ਨੇ ਲੁਧਿਆਣਾ ਜ਼ੋਨ ’ਚ ਇੱਕ ਮ੍ਰਿਤਕ ਤੇ ਚਾਰ ਸੇਵਾਮੁਕਤ ਅਤੇ ਪਟਿਆਲਾ ਜ਼ੋਨ ’ਚ ਇੱਕ ਮਰਹੂਮ ਤੇ ਇੱਕ ਸੇਵਾਮੁਕਤ ਅਧਿਆਪਕ ਦੀ ਚੋਣ ਡਿਊਟੀ ਲਗਾ ਦਿੱਤੀ। ਇਸ ਕਾਰਵਾਈ ਖ਼ਿਲਾਫ਼ ਅਧਿਆਪਕਾਂ ਨੇ ਪਟਿਆਲਾ ਦੇ ਵਧੀਕ ਡਿਪਟੀ ਕਮਿਸ਼ਨਰ ਦੇ ਦਫ਼ਤਰ ਬਾਹਰ ਰੋਸ ਪ੍ਰਦਰਸ਼ਨ ਵੀ ਕੀਤਾ।

ਅਧਿਆਪਕ ਯੂਨੀਅਨ ਦੇ ਨੁਮਾਇੰਦੇ ਨੇ ਕਿਹਾ, ‘‘ਸਰਕਾਰੀ ਸਕੂਲ ਸੰਗੋਵਾਲ ’ਚ ਪੜ੍ਹਾਉਣ ਵਾਲੀ ਗੁਰਦਰਸ਼ਨ ਕੌਰ ਦਾ ਦੇਹਾਂਤ ਹੋ ਚੁੱਕਾ ਹੈ ਤੇ ਉਸ ਦੀ ਹੈਬੋਵਾਲ ਤੇ ਮਾਛੀਵਾਲਾ ਇਲਾਕੇ ਤੋਂ ਸੇਵਾਮੁਕਤ ਅਧਿਆਪਕਾਂ ਅਸ਼ੋਕ ਕੁਮਾਰੀ, ਮੱਖਣ ਸਿੰਘ, ਹਰਜੀਤ ਸਿੰਘ ਤੇ ਅਮਰਜੀਤ ਨਾਲ ਚੋਣ ਡਿਊਟੀ ਲਗਾਈ ਗਈ ਹੈ।’’ ਪਟਿਆਲਾ ਜ਼ੋਨ ’ਚੋਂ ਨੀਤੂ ਕੌਸ਼ਲ ਤੇ ਗੁਰਮੀਤ ਕੌਰ ਦੀ ਚੋਣ ਡਿਊਟੀ ਲਾਈ ਗਈ ਹੈ। ਨੀਤੂ ਕੌਸ਼ਲ ਦਾ ਇਸ ਸਾਲ 9 ਜਨਵਰੀ ਨੂੰ ਦੇਹਾਂਤ ਹੋ ਗਿਆ ਸੀ ਤੇ ਗੁਰਮੀਤ ਕੌਰ ਅਪਰੈਲ ਮਹੀਨੇ ਸੇਵਾਮੁਕਤ ਹੋਈ ਸੀ। ਗੁਰਮੀਤ ਕੌਰ ਨੇ ਕਿਹਾ ਕਿ ਪਹਿਲਾਂ ਉਸ ਨੂੰ ਚੋਣ ਰਿਹਰਸਲ ’ਚ ਸ਼ਾਮਲ ਹੋਣ ਲਈ ਪੱਤਰ ਮਿਲਿਆ ਸੀ। ਉਹ ਰਿਹਰਸਲ ’ਚ ਸ਼ਾਮਲ ਨਾ ਹੋਈ ਤਾਂ ਉਸ ਨੂੰ ਕਾਰਨ ਦੱਸੋ ਨੋਟਿਸ ਜਾਰੀ ਕਰ ਦਿੱਤਾ ਗਿਆ ਤੇ ਕਾਨੂੰਨੀ ਕਾਰਵਾਈ ਦੀ ਚਿਤਾਵਨੀ ਦਿੱਤੀ ਗਈ।

ਡੈਮੋਕਰੈਟਿਕ ਟੀਚਰਜ਼ ਫਰੰਟ ਦੇ ਮੀਤ ਪ੍ਰਧਾਨ ਦੇਵਿੰਦਰ ਸਿੰਘ ਸਿੱਧੂ ਨੇ ਵਿਭਾਗ ਦੀ ਕਾਰਵਾਈ ਨੂੰ ਵੱਡੀ ਕੁਤਾਹੀ ਦੱਸਦਿਆਂ ਕਿਹਾ ਕਿ ਅਧਿਆਪਕਾਂ ਦੀ ਪੈਨਸ਼ਨ ਤੇ ਸੇਵਾਮੁਕਤੀ ਸਬੰਧੀ ਜਾਣਕਾਰੀ ਵਿਭਾਗ ਵੱਲੋਂ ਰੱਖੀ ਜਾਂਦੀ ਹੈ। ਇਸ ਤੋਂ ਪਤਾ ਲਗਦਾ ਹੈ ਕਿ ਉਨ੍ਹਾਂ ਰਿਕਾਰਡ ਅਪਡੇਟ ਨਹੀਂ ਕੀਤਾ।

ਸਾਰੀ ਗ਼ਲਤੀ ਸਕੂਲਾਂ ਦੀ ਹੈ: ਸਿੱਖਿਆ ਅਫਸਰ

ਲੁਧਿਆਣਾ ਦੀ ਜ਼ਿਲ੍ਹਾ ਸਿੱਖਿਆ ਅਫਸਰ ਡਿੰਪਲ ਮਦਾਨ ਨੇ ਕਿਹਾ, ‘‘ਇਹ ਸਕੂਲ ਮੁਖੀਆਂ ਜਾਂ ਇੰਚਾਰਜਾਂ ਦੀ ਗ਼ਲਤੀ ਹੈ ਜਿਨ੍ਹਾਂ ਵਾਰ-ਵਾਰ ਕਹਿਣ ਦੇ ਬਾਵਜੂਦ ਆਪਣੇ ਸਟਾਫ ਬਾਰੇ ਵੇਰਵੇ ਅਪਡੇਟ ਨਹੀਂ ਕੀਤੇ। ਇਸ ਲਈ ਸਿੱਖਿਆ ਵਿਭਾਗ ਜਾਂ ਡੀ ਸੀ ਦਫ਼ਤਰ ਨਹੀਂ ਸਿਰਫ਼ ਸਕੂਲ ਜ਼ਿੰਮੇਵਾਰ ਹਨ।’’ ਪਟਿਆਲਾ ਵਿੱਚ ਏ ਡੀ ਸੀ ਨੇ ਮੁਜ਼ਾਹਰਾਕਾਰੀ ਅਧਿਆਪਕਾਂ ਨੂੰ ਮਿਲ ਕੇ ਕਾਰਵਾਈ ਦਾ ਭਰੋਸਾ ਦਿੱਤਾ ਹੈ।