ਭਾਰਤੀਆਂ ’ਚ ਏਕਤਾ ਦੀ ਘਾਟ ਦੇ ਦਾਅਵੇ ਝੂਠੇ: ਭਾਗਵਤ

ਰਾਸ਼ਟਰੀ ਸਵੈਮ-ਸੇਵਕ ਸੰਘ (ਆਰ ਐੱਸ ਐੱਸ) ਦੇ ਮੁਖੀ ਮੋਹਨ ਭਾਗਵਤ ਨੇ ਅੱਜ ਦਾਅਵਾ ਕੀਤਾ ਕਿ ਬਰਤਾਨਵੀ ਸ਼ਾਸਨ ਤੋਂ ਪਹਿਲਾਂ ਭਾਰਤੀਆਂ ਵਿੱਚ ਏਕਤਾ ਦੀ ਘਾਟ ਬਾਰੇ ਮਹਾਤਮਾ ਗਾਂਧੀ ਦੀ ਟਿੱਪਣੀ ਬਸਤੀਵਾਦੀ ਸਿੱਖਿਆ ਰਾਹੀਂ ਘੜੀ ਝੂਠੀ ਕਹਾਣੀ ਹੈ। ਭਾਗਵਤ ਨੇ ਕਿਹਾ, ‘‘ਗਾਂਧੀ ਜੀ ਨੇ (ਆਪਣੀ ਪੁਸਤਕ) ‘ਹਿੰਦ ਸਵਰਾਜ’ ਵਿੱਚ ਲਿਖਿਆ ਸੀ ਕਿ ਅੰਗਰੇਜ਼ਾਂ ਦੇ ਆਉਣ ਤੋਂ ਪਹਿਲਾਂ ਅਸੀਂ ਇਕਜੁੱਟ ਨਹੀਂ ਸੀ ਪਰ ਇਹ ਉਨ੍ਹਾਂ ਵੱਲੋਂ ਸਾਨੂੰ ਦੱਸੀ ਝੂਠੀ ਕਹਾਣੀ ਹੈ।’’

ਨਾਗਪੁਰ ਵਿੱਚ ਕਰਵਾਏ ਰਾਸ਼ਟਰੀ ਪੁਸਤਕ ਮਹਾਉਤਸਵ ਨੂੰ ਸੰਬੋਧਨ ਕਰਦਿਆਂ ਭਾਗਵਤ ਨੇ ਕਿਹਾ ਕਿ ਵਿਵਾਦਾਂ ਵਿੱਚ ਉਲਝਣਾ ਭਾਰਤ ਦੇ ਸੁਭਾਅ ਵਿੱਚ ਨਹੀਂ ਹੈ ਅਤੇ ਦੇਸ਼ ਦੀ ਪਰੰਪਰਾ ਨੇ ਭਾਈਚਾਰੇ ਅਤੇ ਸਮੂਹਿਕ ਸਦਭਾਵਨਾ ’ਤੇ ਹਮੇਸ਼ਾ ਜ਼ੋਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਰਾਸ਼ਟਰ ਦੀ ਧਾਰਨਾ ਦੇ ਮਾਮਲੇ ਵਿੱਚ ਭਾਰਤ ਦਾ ਦ੍ਰਿਸ਼ਟੀਕੋਣ ਪੱਛਮੀ ਵਿਆਖਿਆਵਾਂ ਤੋਂ ਬੁਨਿਆਦੀ ਤੌਰ ’ਤੇ ਵੱਖ ਹੈ। ਭਾਗਵਤ ਨੇ ਕਿਹਾ, ‘‘ਸਾਡਾ ਕਿਸੇ ਨਾਲ ਕੋਈ ਵਿਵਾਦ ਨਹੀਂ ਹੈ। ਅਸੀਂ ਵਿਵਾਦਾਂ ਤੋਂ ਦੂਰ ਰਹਿੰਦੇ ਹਾਂ। ਵਿਵਾਦ ਕਰਨਾ ਸਾਡੇ ਦੇਸ਼ ਦੇ ਸੁਭਾਅ ਵਿੱਚ ਨਹੀਂ ਹੈ। ਇੱਕਜੁੱਟ ਰਹਿਣਾ ਅਤੇ ਭਾਈਚਾਰੇ ਨੂੰ ਉਤਸ਼ਾਹਿਤ ਕਰਨਾ ਸਾਡੀ ਪਰੰਪਰਾ ਹੈ। ਇੱਕ ਵਾਰ ਧਾਰਨਾ ਬਣ ਜਾਣ ਮਗਰੋਂ ਵੱਖਰਾ ਵਿਚਾਰ ਅਸਵੀਕਾਰਨਯੋਗ ਹੋ ਜਾਂਦਾ ਹੈ। ਉਹ ਦੂਜੇ ਵਿਚਾਰਾਂ ਲਈ ਦਰਵਾਜ਼ਾ ਬੰਦ ਕਰ ਦਿੰਦੇ ਹਨ ਅਤੇ ਇਸਨੂੰ ‘ਵਾਦ’ ਕਹਿੰਦੇ ਹਨ।’’ ਉਨ੍ਹਾਂ ਕਿਹਾ, ‘‘ਅਸੀਂ ਕੌਮੀਅਤ ਸ਼ਬਦ ਦੀ ਵਰਤੋਂ ਕਰਦੇ ਹਾਂ, ਰਾਸ਼ਟਰਵਾਦ ਦੀ ਨਹੀਂ। ਰਾਸ਼ਟਰ ’ਤੇ ਬਹੁਤ ਜ਼ਿਆਦਾ ਮਾਣ ਹੋਣ ਕਾਰਨ ਦੋ ਸੰਸਾਰ ਜੰਗਾਂ ਹੋਈਆਂ, ਇਸ ਕਰਕੇ ਕੁਝ ਲੋਕ ਰਾਸ਼ਟਰਵਾਦ ਸ਼ਬਦ ਤੋਂ ਡਰਦੇ ਹਨ।’’ -ਪੀਟੀਆਈ