ਛੱਤੀਸਗੜ੍ਹ: 28 ਨਕਸਲੀਆਂ ਵੱਲੋਂ ਆਤਮ ਸਮਰਪਣ

ਇੱਥੇ 28 ਨਕਸਲੀਆਂ ਨੇ ਪੁਲੀਸ ਕੋਲ ਆਤਮ ਸਮਰਪਣ ਕਰ ਦਿੱਤਾ। ਇਨ੍ਹਾਂ ਨਕਸਲੀਆਂ ਵਿਚ 19 ਔਰਤਾਂ ਵੀ ਸ਼ਾਮਲ ਹਨ। ਪੁਲੀਸ ਅਧਿਕਾਰੀਆਂ ਨੇ ਦੱਸਿਆ ਕਿ ਇਨ੍ਹਾਂ ’ਚੋਂ 22 ਦੇ ਸਿਰ ’ਤੇ 89 ਲੱਖ ਰਪੁਏ ਦਾ ਇਨਾਮ ਸੀ। ਬਸਤਰ ਰੇਂਜ ਦੇ ਇੰਸਪੈਕਟਰ ਜਨਰਲ ਆਫ਼ ਪੁਲੀਸ ਸੁੰਦਰਰਾਜ ਪੱਟੀਲਿੰਗਮ ਨੇ ਦੱਸਿਆ ਕਿ ਨਕਸਲੀਆਂ ਨੇ ਸੂਬਾ ਸਰਕਾਰ ਦੀ ਪੁਨਰਵਾਸ ਨੀਤੀ ਤੋਂ ਪ੍ਰਭਾਵਿਤ ਹੋ ਕੇ ਆਤਮ ਸਮਰਪਣ ਕੀਤਾ ਹੈ। ਇਹ ਵੀ ਦੱਸਣਾ ਬਣਦਾ ਹੈ ਕਿ ਬੀਤੇ 50 ਦਿਨਾਂ ’ਚ ਬਸਤਰ ਵਿੱਚ 512 ਤੋਂ ਵੱਧ ਨਕਸਲੀ ਆਤਮ ਸਮਰਪਣ ਕਰ ਚੁੱਕੇ ਹਨ। ਨਾਰਾਇਣਪੁਰ ਦੇ ਪੁਲੀਸ ਸੁਪਰਡੈਂਟ ਰੌਬਿਨਸਨ ਗੁਰੀਆ ਅਨੁਸਾਰ ਇਸ ਸਾਲ ਇਸ ਜ਼ਿਲ੍ਹੇ ’ਚ 287 ਨਕਸਲੀ ਆਤਮ ਸਮਰਪਣ ਕਰ ਚੁੱਕੇ ਹਨ। ਪੁਲੀਸ ਅਨੁਸਾਰ ਛੱਤੀਸਗੜ੍ਹ ’ਚ ਪਿਛਲੇ 23 ਮਹੀਨਿਆਂ ’ਚ ਲਗਪਗ 2,200 ਨਕਸਲੀਆਂ ਨੇ ਆਤਮ ਸਮਰਪਣ ਕੀਤਾ ਹੈ।

ਉਨ੍ਹਾਂ ਕਿਹਾ ਕਿ ਆਤਮ ਸਮਰਪਣ ਕਰਨ ਵਾਲਿਆਂ ਵਿੱਚੋਂ ਚਾਰ ਕੱਟੜ ਕਾਡਰ ਦੇ ਪਾਂਡੀ ਧਰੁਵ ਉਰਫ ਦਿਨੇਸ਼ (33), ਦੁਲੇ ਮੰਡਵੀ ਉਰਫ ਮੁੰਨੀ (26), ਛੱਤੀਸ ਪੋਯਾਮ (18) ਅਤੇ ਪਦਨੀ ਓਯਾਮ (30), ਇਹ ਤਿੰਨੋਂ ਮਾਓਵਾਦੀਆਂ ਦੀ ਪੂਰਬੀ ਬਸਤਰ ਡਿਵੀਜ਼ਨ ਦੀ ਫੌਜੀ ਕੰਪਨੀ ਨੰਬਰ 6 ਦੇ ਤਿੰਨੋਂ ਮੈਂਬਰ ਹਨ ਤੇ ਇਨ੍ਹਾਂ ਉੱਤੇ 8-8 ਲੱਖ ਰੁਪਏ ਦਾ ਇਨਾਮ ਸੀ।

ਉਨ੍ਹਾਂ ਕਿਹਾ ਕਿ ਹੋਰਨਾਂ ਵਿੱਚ ਲਖਮੂ ਉਸੈਂਡੀ (20), ਸੁਕਮਤੀ ਨੂਰੇਤੀ (25), ਸਕੀਲਾ ਕਸ਼ਯਪ (35), ਸ਼ੰਬਤੀ ਸ਼ੋਰੀ (35), ਚੈਤੇ ਉਰਫ ਰਜੀਤਾ (30) ਅਤੇ ਬੁਧਰਾ ਰਾਵਾ (28) ਸਾਰੇ ਏਰੀਆ ਕਮੇਟੀ ਮੈਂਬਰ ਸ਼ਾਮਲ ਹਨ, ਇਨ੍ਹਾਂ ਉੱਤੇ 5-5 ਲੱਖ ਰੁਪਏ ਦਾ ਇਨਾਮ ਸੀ। ਉਨ੍ਹਾਂ ਕਿਹਾ ਕਿ ਦਿਨੇਸ਼, ਲਖਮੂ ਅਤੇ ਸੁਕਮਤਰੀ ਨੇ ਕ੍ਰਮਵਾਰ ਇੱਕ ਸੈਲਫ ਲੋਡਿੰਗ ਰਾਈਫਲ (SLR), ਇੰਸਾਸ ਰਾਈਫਲ ਅਤੇ ਇੱਕ.303 ਰਾਈਫਲ ਪੁਲੀਸ ਨੂੰ ਸੌਂਪ ਦਿੱਤੀ।

ਨਾਰਾਇਣਪੁਰ ਵਿੱਚ 28 ਮਾਓਵਾਦੀ ਕਾਡਰਾਂ ਦਾ ਪੁਨਰਵਾਸ ਦਰਸਾਉਂਦਾ ਹੈ ਕਿ ਹਿੰਸਕ ਅਤੇ ਲੋਕ ਵਿਰੋਧੀ ਮਾਓਵਾਦੀ ਵਿਚਾਰਧਾਰਾ ਦਾ ਅੰਤ ਨੇੜੇ ਹੈ। -ਪੀਟੀਆਈ