ਕੇਸ ਫੌਰੀ ਸੁਣਵਾਈ ਲਈ ਸੂਚੀਬੱਧ ਨਹੀਂ ਕੀਤਾ ਜਾਵੇਗਾ ਬਸ਼ਰਤੇ ਫਾਂਸੀ ਨਾਲ ਜੁੜਿਆ ਮਸਲਾ ਨਾ ਹੋਵੇ: ਜਸਟਿਸ ਸੂਰਿਆਕਾਂਤ

ਸੁਪਰੀਮ ਕੋਰਟ ਦੇ ਜੱਜ ਸੂਰਿਆ ਕਾਂਤ ਨੇ ਬੁੱਧਵਾਰ ਨੂੰ ਕਿਹਾ ਕਿ ਉਹ ਕਿਸੇ ਵੀ ਮਾਮਲੇ ਨੂੰ ਉਸੇ ਦਿਨ ਫੌਰੀ ਸੁਣਵਾਈ ਲਈ ਸੂਚੀਬੱਧ ਕਰਨ ਦਾ ਹੁਕਮ ਨਹੀਂ ਦੇਣਗੇ ਬਸ਼ਰਤੇ ਇਹ ਕੋਈ ਫ਼ਾਂਸੀ ਨਾਲ ਜੁੜਿਆ ਮਸਲਾ ਨਾ ਹੋਵੇ। ਉਨ੍ਹਾਂ ਸਵਾਲ ਕੀਤਾ ਕਿ ਕੀ ਕੋਈ ਜੱਜਾਂ ਦੀ ਦੁਰਦਸ਼ਾ, ਉਨ੍ਹਾਂ ਦੇ ਕੰਮ ਦੇ ਘੰਟਿਆਂ ਤੇ ਉਨ੍ਹਾਂ ਨੂੰ ਕਿੰਨੇ ਘੰਟੇ ਸੌਣ ਲਈ ਮਿਲਦੇ ਹਨ, ਬਾਰੇ ਸਮਝਦਾ ਹੈ। ਜਸਟਿਸ ਕਾਂਤ ਫੌਰੀ ਸੁਣਵਾਈ ਨਾਲ ਸਬੰਧਤ ਮਾਮਲਿਆਂ ਦੀ ਸੁਣਵਾਈ ਕਰ ਰਹੇ ਸਨ।

ਇਸ ਬੈਂਚ ਵਿਚ ਉਨ੍ਹਾਂ ਨਾਲ ਜਸਟਿਸ ਉੱਜਵਲ ਭੂਈਆਂ ਤੇ ਜਸਟਿਸ ਐਨ.ਕੋਟੀਸ਼ਵਰ ਸਿੰਘ ਵੀ ਸ਼ਾਮਲ ਸਨ। ਸੁਪਰੀਮ ਕੋਰਟ ਦਾ ਰੋਸਟਰ ਚੀਫ਼ ਜਸਟਿਸ ਬੀਆਰ ਗਵਈ ਵੱਲੋਂ ਬਣਾਏ ਜਾਣ ਕਰਕੇ ਫੌਰੀ ਸੁਣਵਾਈ ਵਾਲੇ ਮਾਮਲੇ ਆਮ ਕਰਕੇ ਉਹ ਖੁ਼ਦ ਸੁਣਦੇ ਹਨ। ਪਰ ਉਨ੍ਹਾਂ ਦੇ ਪੰਜ ਮੈਂਬਰੀ ਸੰਵਿਧਾਨਕ ਬੈਂਚ ਵਿਚ ਬੈਠੇ ਹੋਣ ਕਰਕੇ ਦਸਤੂਰ ਵਜੋਂ ਸੁਪਰੀਮ ਕੋਰਟ ਦਾ ਦੂਜਾ ਸਭ ਤੋਂ ਸੀਨੀਅਰ ਜੱਜ ਇਹ ਕੰਮ ਕਰਦਾ ਹੈ।

ਜਸਟਿਸ ਕਾਂਤ ਦੀਆਂ ਉਪਰੋਕਤ ਟਿੱਪਣੀਆਂ ਉਦੋਂ ਆਈਆਂ ਜਦੋਂ ਵਕੀਲ ਸ਼ੋਭਾ ਗੁਪਤਾ ਨੇ ਜ਼ਿਕਰ ਕੀਤਾ ਕਿ ਰਾਜਸਥਾਨ ਵਿੱਚ ਇੱਕ ਰਿਹਾਇਸ਼ੀ ਘਰ ਦੀ ਨਿਲਾਮੀ ਅੱਜ ਕੀਤੀ ਜਾਵੇਗੀ ਅਤੇ ਇਸ ਲਈ ਇਸ ਨੂੰ ਅੱਜ ਹੀ ਸੂਚੀਬੱਧ ਕੀਤਾ ਜਾਵੇ। ਇਸ ’ਤੇ ਜਸਟਿਸ ਕਾਂਤ ਨੇ ਕਿਹਾ, ‘‘"ਜਦੋਂ ਤੱਕ ਕਿਸੇ ਨੂੰ ਫਾਂਸੀ ਨਾ ਦਿੱਤੀ ਜਾਣ ਵਾਲੀ ਹੋਵੇ, ਮੈਂ ਕਿਸੇ ਵੀ ਕੇਸ ਨੂੰ ਉਸੇ ਦਿਨ ਲਈ ਸੂਚੀਬੱਧ ਨਹੀਂ ਕਰਾਂਗਾ। ਤੁਸੀਂ ਲੋਕ ਜੱਜਾਂ ਨੂੰ ਦਰਪੇਸ਼ ਮੁਸ਼ਕਲਾਂ ਨੂੰ ਨਹੀਂ ਸਮਝਦੇ, ਕੀ ਤੁਹਾਨੂੰ ਇਹ ਵੀ ਪਤਾ ਹੈ ਕਿ ਉਹ ਕਿੰਨੇ ਘੰਟੇ ਕੰਮ ਕਰ ਰਹੇ ਹਨ ਅਤੇ ਕਿੰਨੇ ਘੰਟੇ ਸੌਂਦੇ ਹਨ? ਜਦੋਂ ਤੱਕ ਕਿਸੇ ਦੀ ਆਜ਼ਾਦੀ ਦਾਅ ’ਤੇ ਨਹੀਂ ਹੁੰਦੀ, ਅਸੀਂ ਉਸੇ ਦਿਨ ਇਸ ਨੂੰ ਸੂਚੀਬੱਧ ਨਹੀਂ ਕਰਾਂਗੇ।’’

ਜਦੋਂ ਗੁਪਤਾ ਆਪਣੀ ਗੱਲ ’ਤੇ ਅੜੀ ਰਹੀ, ਤਾਂ ਜਸਟਿਸ ਕਾਂਤ ਨੇ ਪੁੱਛਿਆ ਕਿ ਨਿਲਾਮੀ ਦਾ ਨੋਟਿਸ ਕਦੋਂ ਜਾਰੀ ਕੀਤਾ ਗਿਆ ਸੀ। ਉਨ੍ਹਾਂ ਜਵਾਬ ਦਿੱਤਾ ਕਿ ਨਿਲਾਮੀ ਦਾ ਨੋਟਿਸ ਪਿਛਲੇ ਹਫ਼ਤੇ ਜਾਰੀ ਕੀਤਾ ਗਿਆ ਸੀ ਅਤੇ ਬਕਾਇਆ ਰਕਮ ਲਈ ਇੱਕ ਨਿਰਧਾਰਿਤ ਰਕਮ ਪਹਿਲਾਂ ਹੀ ਅਦਾ ਕਰ ਦਿੱਤੀ ਗਈ ਹੈ।

ਜਸਟਿਸ ਕਾਂਤ ਨੇ ਗੁਪਤਾ ਨੂੰ ਕਿਹਾ ਕਿ ਉਹ ਅਗਲੇ ਕੁਝ ਮਹੀਨਿਆਂ ਲਈ ਕੇਸ ਸੂਚੀਬੱਧ ਹੋਣ ਦੀ ਉਮੀਦ ਨਾ ਕਰਨ। ਹਾਲਾਂਕਿ, ਉਨ੍ਹਾਂ ਨੇ ਮਗਰੋਂ ਅਦਾਲਤ ਦੇ ਮਾਸਟਰ ਨੂੰ ਸ਼ੁੱਕਰਵਾਰ ਨੂੰ ਮਾਮਲਾ ਸੂਚੀਬੱਧ ਕਰਨ ਲਈ ਕਿਹਾ।