'Bhagoda economics': ‘ਪਕੌੜਾ ਅਰਥਸ਼ਾਸਤਰ’ ਬਣਿਆ 'ਭਗੌੜਾ ਅਰਥਸ਼ਾਸਤਰ': ਮਾਲਿਆ ਦੀ ਟਿੱਪਣੀ ਪਿੱਛੋਂ ਕਾਂਗਰਸ ਨੇ ਕੀਤਾ ਤਨਜ਼

ਨਵੀਂ ਦਿੱਲੀ, 6 ਜੂਨ

ਕਾਂਗਰਸ ਨੇ ਸ਼ੁੱਕਰਵਾਰ ਨੂੰ ਭਗੌੜੇ ਸ਼ਰਾਬ ਕਾਰੋਬਾਰੀ ਵਿਜੇ ਮਾਲਿਆ ਦੀ ਕਥਿਤ ਟਿੱਪਣੀ 'ਤੇ ਮੋਦੀ ਸਰਕਾਰ 'ਤੇ ਨਿਸ਼ਾਨਾ ਸੇਧਿਆ ਕਿ ਉਸਨੇ 2016 ਵਿੱਚ ਦੇਸ਼ ਛੱਡਣ ਤੋਂ ਪਹਿਲਾਂ ਤਤਕਾਲੀ ਵਿੱਤ ਮੰਤਰੀ ਅਰੁਣ ਜੇਤਲੀ ਨੂੰ ਇਸ ਬਾਰੇ ਸੂਚਿਤ ਕੀਤਾ ਸੀ। ਇਸ ਸਬੰਧੀ ਕਾਂਗਰਸ ਨੇ ਕਿਹਾ ਕਿ "ਨਰਿੰਦਰ ਦਾ ਪੂਰਾ ਸਿਸਟਮ ਆਤਮ ਸਮਰਪਣ ਕਰ ਗਿਆ ਹੈ"।

ਇੱਕ ਹੋਰ ਤਨਜ਼ ਵਿੱਚ, ਵਿਰੋਧੀ ਪਾਰਟੀ ਨੇ ਇਹ ਵੀ ਕਿਹਾ ਕਿ ਮੋਦੀ ਸਰਕਾਰ ਦਾ "ਪਕੌੜਾ ਅਰਥਸ਼ਾਸਤਰ" ਇਸ ਦੀ ਥਾਂ "ਭਗੌੜਾ ਅਰਥਸ਼ਾਸਤਰ" ਵਿੱਚ ਬਦਲ ਗਿਆ ਹੈ। ਗ਼ੌਰਤਲਬ ਹੈ ਕਿ ਕਾਂਗਰਸ ਅਕਸਰ 'ਪਕੌੜਾਨੋਮਿਕਸ' ('pakodanomics') ਸ਼ਬਦ ਦੀ ਵਰਤੋਂ ਕਰ ਕੇ ਸਰਕਾਰ ਦਾ ਮਜ਼ਾਕ ਉਡਾਉਂਦੀ ਹੈ, ਜੋ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ 2018 ਵਿੱਚ ਕੀਤੀ ਗਈ ਟਿੱਪਣੀ ਦਾ ਸਪੱਸ਼ਟ ਹਵਾਲਾ ਹੈ, ਜਦੋਂ ਮੋਦੀ ਨੇ ਕਿਹਾ ਸੀ ਕਿ 'ਪਕੌੜੇ' ਵੇਚਣਾ ਵੀ ਰੁਜ਼ਗਾਰ ਹੈ।

ਕਾਂਗਰਸ ਨੇ ਹਾਲ ਹੀ ਵਿੱਚ ਮਾਲਿਆ ਦੁਆਰਾ ਸੋਸ਼ਲ ਮੀਡੀਆ ਇਨਫਲੂਐਂਸਰ ਰਾਜ ਸ਼ਮਾਨੀ ਨਾਲ ਕੀਤੇ ਗਏ ਇੱਕ ਪੋਡਕਾਸਟ ਦੀ ਇੱਕ ਵੀਡੀਓ ਕਲਿੱਪ ਸਾਂਝੀ ਕੀਤੀ ਜਿਸ ਵਿੱਚ ਉਸ ਨੇ ਦਾਅਵਾ ਕੀਤਾ ਸੀ ਕਿ ਉਸ ਨੇ 2016 ਵਿੱਚ ਭਾਰਤ ਛੱਡਣ ਤੋਂ ਪਹਿਲਾਂ ਜੇਤਲੀ ਨੂੰ ਸੂਚਿਤ ਕੀਤਾ ਸੀ। ਪਾਰਟੀ ਨੇ ਕਿਹਾ ਕਿ "ਇਹ ਸਪੱਸ਼ਟ ਹੈ ਕਿ ਦੇਸ਼ ਤੋਂ ਫਰਾਰ ਹੋਣ ਵਾਲੇ ਕਾਰੋਬਾਰੀ ਦੇ ਮਾਮਲੇ ਵਿੱਚ ਮੋਦੀ ਸਰਕਾਰ ਦਾ ਹੱਥ ਸੀ"।

ਪਾਰਟੀ ਦੇ ਮੀਡੀਆ ਅਤੇ ਪ੍ਰਚਾਰ ਵਿਭਾਗ ਦੇ ਮੁਖੀ ਪਵਨ ਖੇੜਾ ਨੇ ਵੀ ਇਹੀ ਕਲਿੱਪ ਪੋਸਟ ਕੀਤੀ।

ਮਾਲਿਆ ਨੂੰ ਕਲਿੱਪ ਵਿੱਚ ਇਹ ਕਹਿੰਦੇ ਸੁਣਿਆ ਜਾ ਸਕਦਾ ਹੈ, "ਮੈਂ ਹਵਾਈ ਅੱਡੇ ਲਈ ਰਵਾਨਾ ਹੋਣ ਤੋਂ ਪਹਿਲਾਂ ਵਿੱਤ ਮੰਤਰੀ ਅਰੁਣ ਜੇਤਲੀ ਨੂੰ ਦੱਸਿਆ ਅਤੇ ਫਿਰ ਮੈਂ ਦਿੱਲੀ ਤੋਂ ਲੰਡਨ ਲਈ ਉਡਾਣ ਭਰੀ, ਮੈਂ ਐਫਆਈਏ ਵਿਸ਼ਵ ਕੌਂਸਲ ਦੀ ਮੀਟਿੰਗ ਲਈ ਜੇਨੇਵਾ ਜਾ ਰਿਹਾ ਸੀ ਜੋ ਮਹੀਨੇ ਪਹਿਲਾਂ ਤੈਅ ਕੀਤੀ ਗਈ ਸੀ। ਮੈਂ ਵਿੱਤ ਮੰਤਰੀ ਨੂੰ ਕਿਹਾ ਕਿਉਂਕਿ ਮੈਂ ਸੰਸਦ ਤੋਂ ਦਿੱਲੀ ਹਵਾਈ ਅੱਡੇ ਗਿਆ ਸੀ। ਜਦੋਂ ਇਹ ਖ਼ਬਰ ਮੀਡੀਆ ਵਿੱਚ ਆਈ ਤਾਂ ਇਸਨੇ ਇੱਕ ਵਾਰ ਫਿਰ ਤੂਫਾਨ ਮਚਾ ਦਿੱਤਾ।"

ਉਸ ਨੇ ਕਿਹਾ, ਲੋਕ ਜੇਤਲੀ ਕੋਲ ਭੱਜੇ ਗਏ ਜਿਨ੍ਹਾਂ ਨੇ ਉਨ੍ਹਾਂ ਨੂੰ ਮਿਲਣ ਤੋਂ ਇਨਕਾਰ ਕਰ ਦਿੱਤਾ। ਫਿਰ, ਇੱਕ ਕਾਂਗਰਸ ਸੰਸਦ ਮੈਂਬਰ ਨੇ ਉਨ੍ਹਾਂ ਨੂੰ ਇਕੱਠੇ ਦੇਖਿਆ ਅਤੇ ਮੀਡੀਆ ਨੂੰ ਦੱਸਿਆ।

"ਸ੍ਰੀ ਜੇਤਲੀ ਨੂੰ ਆਪਣਾ ਬਿਆਨ ਵਾਪਸ ਲੈਣਾ ਪਿਆ ਅਤੇ ਕਿਹਾ, 'ਹਾਂ, ਹਾਂ ਮੈਂ ਉਸਨੂੰ ਮਿਲਿਆ ਸੀ ਪਰ ਸਿਰਫ ਤੁਰਦੇ-ਤੁਰਦੇ, ਇਹ ਇੱਕ ਅਸਥਾਈ ਮੁਲਾਕਾਤ ਸੀ'। ਮੈਂ ਕਦੇ ਨਹੀਂ ਕਿਹਾ ਕਿ ਮੈਂ ਸ੍ਰੀ ਜੇਤਲੀ ਦੇ ਦਫਤਰ ਗਿਆ ਸੀ, ਉਸਦੇ ਸਾਹਮਣੇ ਬੈਠਾ ਸੀ, ਉਸ ਨਾਲ ਚਾਹ ਪੀਤੀ ਸੀ... ਮੈਂ ਸਿਰਫ ਇਹ ਕਿਹਾ ਸੀ ਕਿ ਮੈਂ ਜਾਂਦੇ ਸਮੇਂ ਵਿੱਤ ਮੰਤਰੀ ਨੂੰ ਕਿਹਾ ਸੀ, ਮੈਂ ਲੰਡਨ ਜਾ ਰਿਹਾ ਹਾਂ, ਮੈਨੂੰ ਇੱਕ ਮੀਟਿੰਗ ਲਈ ਜੇਨੇਵਾ ਜਾਣਾ ਹੈ, ਮੈਂ ਵਾਪਸ ਆਵਾਂਗਾ, ਕਿਰਪਾ ਕਰਕੇ ਬੈਂਕਾਂ ਨੂੰ ਕਹੋ ਕਿ ਉਹ ਮੇਜ਼ ਉਤੇ ਬੈਠਣ ਅਤੇ ਮੇਰੇ ਨਾਲ ਸਮਝੌਤਾ ਕਰਨ।’’ -ਪੀਟੀਆਈ