ਏ320 ’ਚ ਨੁਕਸ ਕਾਰਨ ਹਵਾਈ ਸੇਵਾ ਪ੍ਰਭਾਵਿਤ

ਦੁਨੀਆ ਭਰ ’ਚ ਹਵਾਈ ਆਵਾਜਾਈ ’ਚ ਉਦੋਂ ਵਿਘਨ ਪਿਆ, ਜਦੋਂ ਏਅਰਬਸ ਨੇ ਤਕਰੀਬਨ ਛੇ ਹਜ਼ਾਰ ਏ 320 ਜਹਾਜ਼ਾਂ ਨੂੰ ਖਤਰਨਾਕ ਉਡਾਣ ਕੰਟਰੋਲ ਨੁਕਸ ਕਾਰਨ ਹੰਗਾਮੀ ਹਾਲਤ ’ਚ ਵਾਪਸ ਬੁਲਾਉਣ ਦਾ ਹੁਕਮ ਦਿੱਤਾ, ਜਿਨ੍ਹਾਂ ’ਚ ਭਾਰਤ ਵਿੱਚ ਏਅਰ ਇੰਡੀਆ, ਇੰਡੀਗੋ ਤੇ ਏਅਰ ਇੰਡੀਆ ਐਕਸਪ੍ਰੈੱਸ ਦੇ 338 ਜਹਾਜ਼ ਸ਼ਾਮਲ ਹਨ। ਇਸ ਨੁਕਸ ਕਾਰਨ ਜਹਾਜ਼ ਅਚਾਨਕ ਹੇਠਾਂ ਵੱਲ ਝੁਕ ਸਕਦਾ ਹੈ।ਏਅਰਬੱਸ ਨੇ ਬੀਤੇ ਦਿਨ ਕਿਹਾ ਸੀ ਕਿ ਸੂਰਜੀ ਰੇਡੀਏਸ਼ਨ ਕਾਰਨ ਏ320 ਸ਼੍ਰੇਣੀ ਦੇ ਜਹਾਜ਼ਾਂ ’ਚ ਉਡਾਣ ਕੰਟਰੋਲ ਲਈ ਜ਼ਰੂਰੀ ਡੇਟਾ ਖਰਾਬ ਹੋ ਸਕਦਾ ਹੈ ਅਤੇ ਇਸ ਸਮੱਸਿਆ ਨੂੰ ਠੀਕ ਕਰਨ ਲਈ ਸਾਫਟਵੇਅਰ ਅਪਗਰੇਡ ਕਰਨ ਦੌਰਾਨ ਸੰਚਾਲਨ ’ਚ ਅੜਿੱਕਾ ਪਵੇਗਾ। ਇਸ ਮਗਰੋਂ ਡੀ ਜੀ ਸੀ ਏ ਨੇ ਅੱਜ ਏਅਰ ਲਾਈਨਜ਼ ਨੂੰ ਤੁਰੰਤ ਜ਼ਰੂਰੀ ਸਾਫ਼ਟਵੇਅਰ ਅਪਗਰੇਡ ਕਰਨ ਦਾ ਨਿਰਦੇਸ਼ ਜਾਰੀ ਕੀਤਾ ਸੀ। ਜ਼ਿਕਰਯੋਗ ਹੈ ਕਿ 30 ਅਕਤੂਬਰ ਨੂੰ ਜੈੱਟਬਲੂ ਦਾ ਜਹਾਜ਼ ਉਡਾਣ ਦੌਰਾਨ ਸੱਤ ਸੈਕਿੰਡ ’ਚ ਸੌ ਫੁੱਟ ਹੇਠਾਂ ਚਲਾ ਗਿਆ ਸੀ ਤੇ 15 ਤੋਂ ਵੱਧ ਵਿਅਕਤੀ ਜ਼ਖਮੀ ਹੋਏ ਸਨ। ਇਸ ਦੌਰਾਨ ਪਾਇਲਟ ਨੇ ਕੁਝ ਨਹੀਂ ਕੀਤਾ ਸੀ। ਇਹ ਆਪਣੇ ਆਪ ਹੋਇਆ ਸੀ। ਤੇਜ਼ ਸੂਰਜੀ ਰੇਡੀਏਸ਼ਨ ਕਾਰਨ ਕੰਪਿਊਟਰ ਨੂੰ ਗਲਤ ਸਿਗਨਲ ਮਿਲਿਆ ਤੇ ਉਹ ਹੇਠਾਂ ਵੱਲ ਝੁਕਣ ਲੱਗਾ ਸੀ।

ਇਸ ਮਗਰੋਂ ਇੰਡੀਗੋ, ਏਅਰ ਇੰਡੀਆ ਤੇ ਏਅਰ ਇੰਡੀਆ ਐਕਸਪ੍ਰੈੱਸ ਨੇ ਅੱਜ ਏ320 ਬੇੜੇ ਦੇ ਹਵਾਈ ਜਹਾਜ਼ਾਂ ਦਾ ਸਾਫਟਵੇਅਰ ਅਪਗਰੇਡ ਸ਼ੁਰੂ ਕਰ ਦਿੱਤਾ ਹੈ ਤਾਂ ਜੋ ਸੰਭਾਵੀ ਜਹਾਜ਼ ਕੰਟਰੋਲ ਸਮੱਸਿਆ ਨੂੰ ਠੀਕ ਕੀਤਾ ਜਾ ਸਕੇ ਅਤੇ ਪ੍ਰਭਾਵਿਤ 338 ਜਹਾਜ਼ਾਂ ’ਚੋਂ 80 ਫੀਸਦ ’ਚ ਜ਼ਰੂਰੀ ਤਬਦੀਲੀਆਂ ਕਰ ਦਿੱਤੀਆਂ ਗਈਆਂ ਹਨ। ਇਸ ਕਾਰਨ ਕਈ ਉਡਾਣਾਂ ’ਚ ਦੇਰੀ ਹੋਈ ਹੈ ਤੇ ਕੁਝ ਉਡਾਣਾਂ ਰੱਦ ਕਰਨੀਆਂ ਪਈਆਂ ਹਨ। ਸਾਰੇ ਪ੍ਰਭਾਵਿਤ ਜਹਾਜ਼ਾਂ ਦਾ ਸਾਫਟਵੇਅਰ ਅਪਗਰੇਡ 30 ਨਵੰਬਰ ਸਵੇਰੇ 5.29 ਵਜੇ ਤੱਕ ਮੁਕੰਮਲ ਕੀਤਾ ਜਾਣਾ ਹੈ।

ਸ਼ਹਿਰੀ ਹਵਾਬਾਜ਼ੀ ਬਾਰੇ ਡਾਇਰੈਕਟੋਰੇਟ ਜਨਰਲ (ਡੀ ਜੀ ਸੀ ਏ) ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ ਇੰਡੀਗੋ ਤੇ ਏਅਰ ਇੰਡੀਆ ਨੇ ਕੋਈ ਉਡਾਣ ਰੱਦ ਨਹੀਂ ਕੀਤੀ। ਏਅਰ ਇੰਡੀਆ ਐਕਸਪ੍ਰੈੱਸ ਨੇ ਚਾਰ ਉਡਾਣਾਂ ਰੱਦ ਕੀਤੀਆਂ ਹਨ। ਅੱਜ ਸ਼ਾਮ 5.30 ਵਜੇ ਤੱਕ ਕੁੱਲ 338 ’ਚੋਂ 270 ਜਹਾਜ਼ਾਂ ’ਚ ਸਾਫਟਵੇਅਰ ਅਪਗਰੇਡ ਮੁਕੰਮਲ ਹੋ ਚੁੱਕਾ ਸੀ। ਇੰਡੀਗੋ ਦੇ 200 ਜਹਾਜ਼ ਪ੍ਰਭਾਵਿਤ ਹਨ, ਜਿਨ੍ਹਾਂ ’ਚੋਂ 184 ’ਚ ਅਪਗਰੇਡ ਮੁਕੰਮਲ ਹੋ ਚੁੱਕਾ ਹੈ। ਏਅਰ ਇੰਡੀਆ ਦੇ 113 ’ਚੋਂ 69 ਤੇ ਏਅਰ ਇੰਡੀਆ ਐਕਸਪ੍ਰੈੱਸ ਦੇ 25 ’ਚੋਂ 17 ਜਹਾਜ਼ਾਂ ’ਚ ਅਪਰਗੇਡ ਮੁਕੰਮਲ ਹੋ ਚੁੱਕਾ ਹੈ। ਇਹ ਅਪਗਰੇਡ ਦਿੱਲੀ, ਬੰਗਲੂਰੂ, ਮੁੰਬਈ, ਚੇਨੱਈ, ਹੈਦਰਾਬਾਦ, ਅਹਿਮਦਾਬਾਦ ਤੇ ਕੋਲਕਾਤਾ ’ਚ ਏਅਰ ਲਾਈਨਜ਼ ਦੇ ਬੇਸ ’ਤੇ ਕੀਤਾ ਜਾ ਰਿਹਾ ਹੈ। ਸਾਫਟਵੇਅਰ ਅਪਗਰੇਡ ਕਾਰਨ ਏਅਰ ਫਰਾਂਸ, ਲੁਫਥਾਂਜ਼ਾ, ਲਾਟਮ, ਕੇਰੀਅਨ ਏਅਰ ਸਮੇ ਹੋਰ ਕੌਮਾਂਤਰੀ ਉਡਾਣਾਂ ਦੀ ਸੇਵਾ ਪ੍ਰਭਾਵਿਤ ਹੋਈ ਹੈ।