ਸਿਰਸਾ: ਪਤੀ-ਪਤਨੀ ਨੇ ਰਲ ਕੇ ਕੀਤਾ ਸੀ ਦੋਹਰਾ ਕਤਲ

ਇੱਥੋਂ ਦੇ ਪਿੰਡ ਸਿਕੰਦਰਪੁਰ ਦੇ ਥੇੜ੍ਹ ਵਿੱਚ ਸ਼ੁੱਕਰਵਾਰ ਦੀ ਰਾਤ ਨੂੰ ਅੰਗੂਰੀ ਦੇਵੀ ਅਤੇ ਉਸ ਦੇ ਕਥਿਤ ਪ੍ਰੇਮੀ ਦਾ ਕਤਲ ਅੰਗੂਰੀ ਦੇਵੀ ਦੇ ਪੁੱਤਰ ਰਾਜ ਕੁਮਾਰ ਤੇ ਉਸ ਦੀ ਪਤਨੀ ਦੋਵਾਂ ਨੇ ਹੀ ਰਲ ਕੇ ਕੀਤਾ ਸੀ। ਇਸ ਮਗਰੋਂ ਉਹ ਦੋਵੇਂ ਜਣੇ ਲਾਸ਼ਾਂ ਪਿਕਅੱਪ ਗੱਡੀ ’ਚ ਰੱਖ ਕੇ ਥਾਣੇ ਪਹੁੰਚੇ ਸਨ ਜਿੱਥੇ ਪੁਲੀਸ ਨੇ ਦੋਵਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁਲੀਸ ਨੇ ਲੇਖ ਰਾਜ ਦੇ ਪਿਤਾ ਜੈ ਰਾਮ ਦੇ ਬਿਆਨਾਂ ਦੇ ਆਧਾਰ ’ਤੇ ਕੇਸ ਦਰਜ ਕੀਤਾ ਹੈ।

ਇਸ ਮੌਕੇ ਕੇਸ ਦੇ ਜਾਂਚ ਅਧਿਕਾਰੀ ਨੇ ਦੱਸਿਆ ਕਿ ਅੰਗੂਰੀ ਦੇਵੀ ਦੇ ਕਥਿਤ ਤੌਰ ’ਤੇ ਲੇਖ ਰਾਜ ਨਾਲ ਨਾਜਾਇਜ਼ ਸਬੰਧ ਸਨ। ਲੇਖ ਰਾਜ ਸ਼ੁੱਕਰਵਾਰ ਦੀ ਰਾਤ ਅੰਗੂਰੀ ਦੇਵੀ ਦੇ ਘਰ ਆਇਆ ਜਿੱਥੇ ਰਾਜ ਕੁਮਾਰ ਦੀ ਪਤਨੀ ਸੁਨੀਤਾ ਨੇ ਉਸ ਨੂੰ ਘਰੋਂ ਚਲੇ ਜਾਣ ਲਈ ਕਿਹਾ ਪਰ ਉਹ ਨਾ ਮੰਨਿਆ। ਸੁਨੀਤਾ ਨੇ ਇਸ ਬਾਰੇ ਆਪਣੇ ਪਤੀ ਨੂੰ ਦੱਸ ਦਿੱਤਾ। ਉਹ ਜਦੋਂ ਦੇਰ ਰਾਤ ਘਰ ਆਇਆ ਤਾਂ ਉਸ ਨੇ ਆਪਣੀ ਮਾਂ ਅੰਗੂਰੀ ਦੇਵੀ ਤੇ ਲੇਖ ਰਾਜ ਨੂੰ ਇਤਰਾਜ਼ਯੋਗ ਹਾਲਤ ਵਿੱਚ ਦੇਖ ਲਿਆ ਅਤੇ ਗੁੱਸੇ ਵਿੱਚ ਆ ਕੇ ਆਪਣੀ ਪਤਨੀ ਸੁਨੀਤਾ ਨਾਲ ਰਲ ਕੇ ਪਹਿਲਾਂ ਲੇਖ ਰਾਜ ਦਾ ਗਲਾ ਘੁੱਟ ਦਿੱਤਾ ਤੇ ਬਾਅਦ ਵਿੱਚ ਅੰਗੂਰੀ ਦੇਵੀ ਦਾ ਕਤਲ ਕਰ ਦਿੱਤਾ। ਇਸ ਮੌਕੇ ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਮੁਲਜ਼ਮਾਂ ਨੇ ਪਹਿਲਾਂ ਲਾਸ਼ਾਂ ਨੂੰ ਟਿਕਾਣੇ ਲਾਉਣ ਦੀ ਯੋਜਨਾ ਬਣਾਈ ਸੀ ਜੋ ਸਿਰੇ ਨਹੀਂ ਚੜ੍ਹੀ। ਸਵੇਰੇ ਰਾਜ ਕੁਮਾਰ ਤੇ ਸੁਨੀਤਾ ਬੱਚੇ ਨਾਲ ਦੋਵੇਂ ਲਾਸ਼ਾਂ ਲੈ ਕੇ ਥਾਣੇ ਪਹੁੰਚ ਗਏ ਜਿੱਥੇ ਪੁਲੀਸ ਨੇ ਦੋਵਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ।