ਪੁਲੀਸ ਨੇ ਵਿਖਾਵਾਕਾਰੀ ਕੱਚੇ ਬੱਸ ਕਾਮੇ ਹਿਰਾਸਤ ’ਚ ਲਏ

ਸਰਕਾਰੀ ਬੱਸਾਂ ਦੇ ਕੱਚੇ ਮੁਲਾਜ਼ਮਾਂ ਅਤੇ ਪੁਲੀਸ ਦਰਮਿਆਨ ਅੱਜ ਪੂਰਾ ਦਿਨ ਰੱਸਾਕਸ਼ੀ ਵਾਲਾ ਮਾਹੌਲ ਰਿਹਾ। ਕੁੱਝ ਸੰਘਰਸ਼ਕਾਰੀ ਬੱਸ ਕਾਮਿਆਂ ਨੂੰ ਰੋਸ ਪ੍ਰਦਰਸ਼ਨ ਤੋਂ ਪਹਿਲਾਂ ਹੀ ਪੁਲੀਸ ਵੱਲੋਂ ਹਿਰਾਸਤ ’ਚ ਲੈਣ ਮਗਰੋਂ ਦਰਜਨ ਦੇ ਕਰੀਬ ਬੱਸ ਕਰਮਚਾਰੀ ਪੈਟਰੋਲ ਦੀਆਂ ਬੋਤਲਾਂ ਹੱਥਾਂ ’ਚ ਲੈ ਕੇ ਪੀਆਰਟੀਸੀ ਦੀ ਸਥਾਨਕ ਵਰਕਸ਼ਾਪ ਵਿਚਲੀ ਪਾਣੀ ਵਾਲੀ ਟੈਂਕੀ ’ਤੇ ਚੜ੍ਹ ਗਏ ਤੇ ਬਾਕੀ ਹੇਠਾਂ ਧਰਨੇ ’ਤੇ ਬੈਠ ਗਏ। ਹਿਰਾਸਤ ’ਚ ਲਏ ਮੁਲਾਜ਼ਮਾਂ ਦੀ ਗਿਣਤੀ ਇੱਕ ਸੌ ਦੇ ਕਰੀਬ ਦੱਸੀ ਗਈ।

ਪੁਲੀਸ ਅਧਿਕਾਰੀਆਂ ਵੱਲੋਂ ਟੈਂਕੀ ਵਾਲੇ ਪ੍ਰਦਰਸ਼ਨਕਾਰੀਆਂ ਨੂੰ ਹੇਠਾਂ ਉੱਤਰਨ ਲਈ ਵਾਰ-ਵਾਰ ਇਹ ਕਹਿ ਕੇ ਅਪੀਲ ਕੀਤੀ ਜਾਂਦੀ ਰਹੀ ਕਿ ਹਿਰਾਸਤ ’ਚ ਲਏ ਮੁਲਾਜ਼ਮਾਂ ਨੂੰ ਰਿਹਾਅ ਕਰ ਦਿੱਤਾ ਜਾਵੇਗਾ, ਪਰ ਵਿਖਾਵਾਕਾਰੀ ਸ਼ਰਤ ਰੱਖਦੇ ਰਹੇ ਕਿ ਜਦੋਂ ਤੱਕ ਉਨ੍ਹਾਂ ਨੂੰ ਰਿਹਾਅ ਕਰ ਕੇ ਇੱਥੇ ਨਹੀਂ ਲਿਆਂਦਾ ਜਾਂਦਾ, ਉਦੋਂ ਤੱਕ ਉਹ ਟੈਂਕੀ ’ਤੇ ਹੀ ਰਹਿਣਗੇ। ਟੈਂਕੀ ਹੇਠਾਂ ਧਰਨੇ ’ਤੇ ਬੈਠੇ ਮੁਲਾਜ਼ਮਾਂ ਨੇ ਕਿਹਾ ਕਿ ਉਹ ਸਰਕਾਰ ਵੱਲੋਂ ਕਿਲੋਮੀਟਰ ਸਕੀਮ ਰਾਹੀਂ ਰੂਟਾਂ ’ਤੇ ਬੱਸਾਂ ਚਲਾਉਣ ਲਈ ਪ੍ਰਵਾਨਗੀ ਦੇਣ ਦਾ ਵਿਰੋਧ ਕਰ ਰਹੇ ਹਨ। ਉਨ੍ਹਾਂ ਖ਼ਦਸ਼ਾ ਜਤਾਇਆ ਕਿ ਅਜਿਹਾ ਕਰ ਕੇ ਸਰਕਾਰ ਰਾਜ ਦੇ ਟਰਾਂਸਪੋਰਟ ਵਿਭਾਗ ਨੂੰ ਨਿੱਜੀਕਰਨ ਵੱਲ ਲਿਜਾਂਦੀ ਹੋਈ ਸਰਮਾਏਦਾਰਾਂ ਨੂੰ ਫਾਇਦਾ ਦੇ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਸਾਡੀ ਮੰਗ ਹੈ ਕਿ ਵਿਭਾਗ ਵਿੱਚ ਠੇਕਾ ਆਧਾਰਿਤ, ਕੱਚੇ ਅਤੇ ਆਊਟਸੋਰਸ ਕਰਮਚਾਰੀਆਂ ਦੀਆਂ ਸੇਵਾਵਾਂ ਸਥਾਈ ਕੀਤੀਆਂ ਜਾਣ। ਉਨ੍ਹਾਂ ਕਿਹਾ ਕਿ ਹਿਰਾਸਤ ਵਿੱਚ ਲਏ ਗਏ ਉਨ੍ਹਾਂ ਦੇ ਸਾਥੀਆਂ ’ਚੋਂ ਕੁਝ ਕੁ ਨੂੰ ਥਾਣਾ ਸਦਰ ਬਠਿੰਡਾ ਅਤੇ ਕੁਝ ਕੁ ਨੂੰ ਲੰਬੀ ਖੇਤਰ ਦੇ ਥਾਣਿਆਂ ਵਿੱਚ ਲਿਜਾਇਆ ਗਿਆ ਹੈ। ਉਨ੍ਹਾਂ ਇਹ ਵੀ ਖੁਲਾਸਾ ਕੀਤਾ ਕਿ ਕਿਲੋਮੀਟਰ ਸਕੀਮ ਖ਼ਿਲਾਫ਼ ਉਨ੍ਹਾਂ ਵੱਲੋਂ ਅੱਜ ਦੋ ਘੰਟਿਆਂ ਲਈ ਹੜਤਾਲ ਕਰ ਕੇ ਪ੍ਰਦਰਸ਼ਨ ਕੀਤਾ ਜਾਣਾ ਸੀ ਪਰ ਪੁਲੀਸ ਵੱਲੋਂ ਲੰਘੀ ਦੇਰ ਸ਼ਾਮ ਨੂੰ ਹੀ ਆਗੂਆਂ ’ਤੇ ਦਬਸ਼ ਦੇ ਕੇ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਖ਼ਬਰ ਲਿਖ਼ੇ ਜਾਣ ਤੱਕ ਵਿਖਾਵਾ ਕਰਕੇ ਪ੍ਰਦਰਸ਼ਨਕਾਰੀ ਆਪਣੇ ਸਾਥੀਆਂ ਦੀ ਰਿਹਾਈ ਦੀ ਮੰਗ ਕਰ ਰਹੇ ਸਨ।\

ਪ੍ਰਾਈਵੇਟ ਬੱਸਾਂ ਦੀ ਸਾਰਾ ਦਿਨ ਚਾਂਦੀ ਰਹੀ

ਰਾਜ ਟਰਾਂਸਪੋਰਟ ਦੇ ਰੈਗੂਲਰ ਮੁਲਾਜ਼ਮਾਂ ਨੇ ਅੱਜ ਆਮ ਵਾਂਗ ਆਪਣੀ ਡਿਊਟੀ ਦਿੱਤੀ ਅਤੇ ਲਾਰੀਆਂ ਰੂਟਾਂ ’ਤੇ ਲੈ ਕੇ ਗਏ। ਸੰਘਰਸ਼ੀ ਕਾਮਿਆਂ ਦੇ ਅੰਦੋਲਨ ਕਾਰਨ ਬਹੁਤ ਸਾਰੀਆਂ ਸਰਕਾਰੀ ਬੱਸਾਂ ਅੱਜ ਆਪਣੇ ਰੂਟਾਂ ’ਤੇ ਨਹੀਂ ਚੱਲੀਆਂ, ਜਿਸ ਕਾਰਨ ਸਵਾਰੀਆਂ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪਿਆ। ਦੂਜੇ ਪਾਸੇ ਨਿੱਜੀ ਟਰਾਂਸਪੋਰਟਰਾਂ ਦੀਆਂ ਲਾਰੀਆਂ ਅੱਜ ਪੂਰੀਆਂ ਭਰ ਕੇ ਆਪਣੇ ਰੂਟਾਂ ’ਤੇ ਚੱਲੀਆਂ। ਅਜਿਹੇ ’ਚ ਜਿੱਥੇ ਸਰਕਾਰੀ ਟਰਾਂਸਪੋਰਟ ਨੂੰ ਭਾਰੀ ਚੂਨਾ ਲੱਗਿਆ, ਉੱਥੇ ਪ੍ਰਾਈਵੇਟ ਬੱਸਾਂ ਵਾਲਿਆਂ ਦੀ ਪੂਰਾ ਦਿਨ ਚਾਂਦੀ ਰਹੀ।