ਨਗਰ ਕੌਂਸਲ ਧਨੌਲਾ ਦੀ ਹੱਦਬੰਦੀ ਬੋਰਡ ਦੀ ਮੀਟਿੰਗ ਕਾਂਗਰਸੀ ਵਿਧਾਇਕ ਨੇ ਰੱਦ ਕਰਵਾਈ

ਨਗਰ ਕੌਂਸਲ ਧਨੌਲਾ ਦੀ ਨਵੀਂ ਵਾਰਡਬੰਦੀ ਦੇ ਮਾਮਲੇ ਵਿੱਚ ਅਧਿਕਾਰੀਆਂ ਵੱਲੋਂ ਰੱਖੀ ਗਈ ਮੀਟਿੰਗ ਸਬੰਧੀ ਕਾਂਗਰਸੀ ਵਿਧਾਇਕ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਦੇ ਸਖ਼ਤ ਰੁਖ਼ ਨੂੰ ਦੇਖਦਿਆਂ ਅਧਿਕਾਰੀਆਂ ਨੇ ਮੀਟਿੰਗ ਰੱਦ ਕਰਨ ’ਚ ਹੀ ਭਲਾਈ ਸਮਝੀ। ਜ਼ਿਕਰਯੋਗ ਹੈ ਕਿ ਡਾਇਰੈਕਟੋਰੇਟ ਸਥਾਨਕ ਸਰਕਾਰ ਵਿਭਾਗ ਪੰਜਾਬ ਵੱਲੋਂ ਮਿਤੀ 24 ਨਵੰਬਰ ਨੂੰ ਜਾਰੀ ਇੱਕ ਸਰਕੁਲੇਸ਼ਨ ਅਨੁਸਾਰ ਨਗਰ ਕੌਂਸਲ ਧਨੌਲਾ ਦੀ ਵਾਰਡਬੰਦੀ ਸਬੰਧੀ ਹੱਦਬੰਦੀ ਬੋਰਡ ਦੀ ਮੀਟਿੰਗ 27 ਨਵੰਬਰ ਨੂੰ ਚੰਡੀਗੜ੍ਹ ਬੁਲਾਈ ਗਈ ਸੀ ਜਿਸ ਵਿੱਚ ਵਿਧਾਇਕ ਕੁਲਦੀਪ ਸਿੰਘ ਕਾਲਾ ਢਿੱਲੋਂ ਦੇ ਨਾਲ ਡੀ ਸੀ ਬਰਨਾਲਾ ਜਾਂ ਉਨ੍ਹਾਂ ਵੱਲੋਂ ਨਾਮਜ਼ਦ ਨੁਮਾਇੰਦਾ, ਐੱਸ ਡੀ ਐੱਮ ਬਰਨਾਲਾ, ਪ੍ਰਧਾਨ/ਪ੍ਰਸ਼ਾਸਕ ਨਗਰ ਕੌਂਸਲ ਧਨੌਲਾ, ਏ ਡੀ ਸੀ ਜਨਰਲ ਬਰਨਾਲਾ, ਈ ਓ ਨਗਰ ਕੌਂਸਲ ਧਨੌਲਾ, ਹਰਦੀਪ ਸਿੰਘ ਵਾਸੀ ਧਨੌਲਾ, ਸੁਰਿੰਦਰ ਸਿੰਘ ਵਾਸੀ ਧਨੌਲਾ ਸਮੇਤ ਸਮੂਹ ਐਸੋਸੀਏਟ ਮੈਂਬਰ ਮਾਰਫਤ ਕਾਰਜਸਾਧਕ ਅਫ਼ਸਰ ਨਗਰ ਕੌਂਸਲ ਧਨੌਲਾ ਨੂੰ ਬਤੌਰ ਹੱਦਬੰਦੀ ਬੋਰਡ ਦੇ ਮੈਂਬਰ ਵਜੋਂ ਬੁਲਾਇਆ ਗਿਆ ਸੀ।

ਜਾਣਕਾਰੀ ਅਨੁਸਾਰ 27 ਨਵੰਬਰ ਨੂੰ ਚੰਡੀਗੜ੍ਹ ਵਿੱਚ ਮੀਟਿੰਗ ਵਾਲੀ ਥਾਂ ’ਤੇ ਉਕਤ ਮੈਂਬਰਾਂ ਤੋਂ ਇਲਾਵਾ ਵਿਧਾਇਕ ਕਾਲਾ ਢਿੱਲੋਂ ਵੀ ਪੁੱਜੇ ਤੇ ਜਦੋਂ ਮੀਟਿੰਗ ਦੀ ਕਾਰਵਾਈ ਸ਼ੁਰੂ ਹੋਣ ਲੱਗੀ ਤਾਂ ਵਿਧਾਇਕ ਨੇ ਅਧਿਕਾਰੀਆਂ ਵੱਲੋਂ ਵਾਰਡਾਂ ਦੀ ਹੱਦਬੰਦੀ ਸਬੰਧੀ ਅਪਣਾਈ ਜਾ ਰਹੀ ਪ੍ਰਕਿਰਿਆ ’ਤੇ ਸਖ਼ਤ ਇਤਰਾਜ਼ ਕੀਤਾ। ਵਿਧਾਇਕ ਸ੍ਰੀ ਢਿੱਲੋਂ ਨੇ ਸਖ਼ਤ ਇਤਰਾਜ਼ ਜ਼ਾਹਿਰ ਕੀਤਾ ਕਿ ਉਨ੍ਹਾਂ ਨੂੰ ਅਜੇ ਤੱਕ ਵੀ ਨਗਰ ਕੌਂਸਲ ਦੇ ਧਨੌਲਾ ਦੀ ਵਾਰਡਬੰਦੀ ਸਬੰਧੀ ਲੋੜੀਂਦੀ ਜਾਣਕਾਰੀ ਜਿਵੇਂ ਪ੍ਰਸਤਾਵਿਤ ਨਕਸ਼ੇ, ਹੱਦਬੰਦੀ ਦਾ ਆਧਾਰ ਆਬਾਦੀ ਡਾਟਾ, ਰਿਜਰਵੇਸ਼ਨ ਮੈਟਰਿਕਸ ਜਾਂ ਤਬਦੀਲੀਆਂ ਦੇ ਤੁਲਨਾਤਮਕ ਚਾਰਟ ਨਹੀਂ ਭੇਜੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਜਦੋਂ ਤੱਕ ਉਨ੍ਹਾਂ ਨੂੰ ਨਗਰ ਕੌਂਸਲ ਧਨੌਲਾ ਦਾ ਮੌਜੂਦਾ ਵਾਰਡ ਨਕਸ਼ਾ (ਹੱਦਬੰਦੀ ਤੋਂ ਪਹਿਲਾਂ), ਪ੍ਰਸਤਾਵਿਤ ਸੋਧਿਆ ਵਾਰਡ ਨਕਸ਼ਾ (ਹੱਦਬੰਦੀ ਤੋਂ ਬਾਅਦ), ਹੱਦਬੰਦੀ ਲਈ ਵਰਤਿਆ ਜਾਣ ਵਾਲਾ ਵਾਰਡ ਵਾਈਜ਼ ਆਬਾਦੀ ਡਾਟਾ, ਅਨੁਸੂਚਿਤ ਜਾਤੀ/ਪਛੜੀ/ਮਹਿਲਾ ਰਾਖਵਾਂਕਰਨ ਸਬੰਧੀ ਜਾਣਕਾਰੀ ਅਤੇ ਮਾਪਦੰਡ, ਆਧਾਰ, ਦਿਸ਼ਾ ਨਿਰਦੇਸ਼ ਅਤੇ ਹਰੇਕ ਵਾਰਡ ਵਿੱਚ ਕੀਤੇ ਗਏ ਬਦਲਾਅ ਦਿਖਾਉਂਦੇ ਤੁਲਨਾਤਮਕ ਬਿਆਨ ਤੋਂ ਇਲਾਵਾ ਅਭਿਆਸ ਨਾਲ ਸਬੰਧਤ ਕਿਸੇ ਵੀ ਸਰਵੇਖਣ ਰਿਪੋਰਟ, ਸੂਚਨਾਵਾਂ ਜਾਂ ਕਾਰਵਾਈ ਦੀਆਂ ਕਾਪੀਆਂ ਮੁਹੱਈਆ ਨਹੀਂ ਕਰਵਾਈਆਂ ਗਈਆਂ। ਉਨ੍ਹਾਂ ਕਿਹਾ ਕਿ ਜਦੋਂ ਤੱਕ ਅਜਿਹਾ ਨਹੀਂ ਹੁੰਦਾ, ਉਸ ਵੇਲੇ ਤੱਕ ਉਹ ਆਪਣੀ ਕਿਸੇ ਵੀ ਤਰ੍ਹਾਂ ਦੀ ਰਾਇ ਨਹੀਂ ਦੇਣਗੇ। ਇਸ ’ਤੇ ਵਿਭਾਗੀ ਅਧਿਕਾਰੀਆਂ ਨੇ ਮੌਕੇ ’ਤੇ ਹੀ ਨਗਰ ਕੌਂਸਲ ਧਨੌਲਾ ਦੇ ਹੱਦਬੰਦੀ ਬੋਰਡ ਦੀ ਮੀਟਿੰਗ ਅਗਲੇਰੇ ਹੁਕਮਾਂ ਤੱਕ ਰੱਦ ਕਰ ਦਿੱਤੀ।

ਇਸ ਸਬੰਧੀ ਕਾਂਗਰਸੀ ਵਿਧਾਇਕ ਸ੍ਰੀ ਢਿੱਲੋਂ ਵੱਲੋਂ ਸਥਾਨਕ ਸਰਕਾਰਾਂ ਵਿਭਾਗ ਦੇ ਡਾਇਰੈਕਟਰ ਨੂੰ ਪੱਤਰ ਵੀ ਲਿਖਿਆ ਗਿਆ ਹੈ।